ކޮންމެ ހަފުތާއަކު ވެސް އާންމު ކުރަންޖެހޭ ވީކްލީ ފިސްކަލް ރިޕޯޓު އާންމު ނުކުރާތާ ހަތަރު މަސް ފަހުން އެ ހިސާބުތައް މިއަދު ފިނޭންސް މިނިސްޓްރީން އާންމުކޮށްފި އެވެ.

ހިސާބުތައް އާންމު ކުރީ އޮކްޓޯބަރު 24، ގެ ނިޔަލަށް ބެލުމަށްފަހު އެވެ. އެހެންކަމުން ހިސާބުތައް މި އާންމު ކުރީ 130 ދުވަސް ފަހުންނެވެ.

ދައުލަތުގެ މާލީ ހިސާބުތައް އާންމުކޮށްފައި މި ވަނީ އެ ހިސާބުތައް އާންމުނުކޮށްގެން އިދިކޮޅު ޕާޓީތަކާއި ބައިނަލްއަގްވާމީ އިދާރާތަކުން ކަންބޮޑުވުން ފާޅުކޮށްފައި ވަނިކޮށެވެ.

ހިސާބުތައް އާންމުނުކޮށްގެން ކަންބޮޑުވުން ފާޅު ކުރި އެއް އިދާރާއަކީ ވޯލްޑް ބޭންކެވެ. ކަންބޮޑުވުން ފާޅު ކުރީ އެ އިދާރާއިން ނެރުނު "މޯލްޑިވްސް ޑިވެލޮޕްމަންޓު އަޕްޑޭޓް: ސީކިން ސްޓެބިލިޓީ އިން ޓާބިއުލެންޓް ޓައިމްސް" ރިޕޯޓުގަ އެވެ.

"ޖޫން މަހުގެ 20 ވަނަ ދުވަހުން ފެށިގެން، ރިކޮންސިލިއޭޝަން މަސައްކަތްތަކުގެ ސަބަބުން ކަމާ ބެހޭ ފަރާތްތަކުން ފިސްކަލް ސްޓެޓިސްޓިކްސް އާންމުކޮށްފައި ނުވާތީ، މުޅި އިގުތިސޯދީ ހާލަތުގެ ދެފުށް ފެންނަ ކަމާ ގުޅޭ ކަންބޮޑުވުންތަކެއް އުފެދިފައިވޭ," ވޯލްޑް ބޭންކުން ނެރުނު ރިޕޯޓުގައި ބުނެފައިވެ އެވެ.