އެންޓި ކޮރަޕްޝަން ކޮމިޝަނުގެ ރައީސް އައްޔަން ކުރުމުގެ ބާރު ރައީސުލްޖުމްހޫރިއްޔާއަށް ލިބޭ ގޮތަށް ގާނޫނު އިސްލާހު ކުރަން ސަރުކާރުން ބޭނުންވަނީ އެ ކޮމިޝަނަށް ނުފޫޒު ފޯރުވަން ކަމަށް ގަލޮޅު ދެކުނު ދާއިރާގެ މެންބަރު މީކާއީލް ނަސީމް މިއަދު ވިދާޅުވެއްޖެ އެވެ.

އޭސީސީ އަދި އިލެކްޝަންސް ކޮމިޝަން (އީސީ) ގެ މައްޗަށް ސަރުކާރަށް ނުފޫޒު ފޯރުވޭ ގޮތަށް, އެ ދެ ކޮމިޝަނުގެ ރައީސް އާއި ނައިބު ރައީސް އައްޔަނު ކުރުމުގެ ބާރު ރައީސުލްޖުމްހޫރިއްޔާ ދިނުމަށް ގާނޫނު ބަދަލުކުރަން ސަރުކާރުން ހުށަހެޅި ބިލަށް ބަހުސްކުރައްވަމުން މީކާއިލް އެ ބިލު ސިފަކުރެއްވީ ރާއްޖޭގެ ޑިމޮކްރަސީގައި ފަހަތަށް އެޅޭ ފިޔަވަޅެއްގެ ގޮތުގަ އެވެ.

"އަޅުގަނޑުމެން އަނެއްކާވެސް މިދަނީ އޭސީސީގެ ރައީސަކަށް ހުންނަ މީހަކު ހައްލާލަން އޭނާއަށް ރިޝްވަތު ދިނުމުގެ ގޮތުން ރައީސުލްޖުމްހުރިއްޔާ ހުށަހަޅުއްވައިގެން އޭނާއަށް ރެހެންދި ފުލެޓު ދިން ޒަމާނަށް އަޅުގަނޑުމެން ރުޖޫއަވާންތޯ، 20 ވަނަ ރައްޔިތުންގެ މަޖިލީހުގައި އަޅުގަނޑުމެން ސުވާލުކޮށްލަން އެބަޖެހޭ،" އިދިކޮޅު އެމްޑީޕީގެ މީކާއިލް ވިދާޅުވި އެވެ.

މިއަދުގެ ބަހުސްގައި ސަރުކާރަށް ތާއީދުކުރާ މެންބަރުން ބިލުގެ ދިފާއަށް ވާހަކަ ދައްކަވަމުން އޭސީސީން މަސައްކަތެއް ނުކުރާ ކަމަށް ވިދާޅުވިއިރު، އޭސީސީން އެމީހުންނާ މަތިކޮށްފައިވާ ޒިންމާ އަދާނުކުރުމަކީ ރާއްޖޭގައި އެތައް ބައެއްގެ މަސައްކަތުން އުފެދިފައި އޮތް ޑިމޮކްރެޓިކް ނިޒާމަށް ގޮންޖަހަން ޖެހޭ ސަބަބެއް ނޫން ކަމަށް ވެސް އޭނާ ވިދާޅުވި އެވެ.

މިދިޔަ ސަރުކާރުގައި އެ ކޮމިޝަނުން ގިނަ މަޝްރޫއުތަކެއް ހުއްޓާލަން ލިޔުން ނެރުނު ކަމަށާއި އެކަމާ ގުޅިގެން އޭސީސީއާ ދެކޮޅަށް ފިޔަވަޅު ނޭޅީ އަދި ނުފޫޒު ފޯރުވުމަށް ގާނޫނު ބަދަލުނުކުރީ ވެސް އެމްޑީޕީގެ ސަރުކާރަށް އެޅޭ ވަގުތީ ހުރަހަކަށްވުރެ ޑިމޮކްރަޓިކް ނިޒާމަކީ މުހިންމު ކަމެއް ކަމަށް އެމްޑީޕީން ދެކޭތީ ކަމަށް ވެސް މީކާއިލް ވިދާޅުވި އެވެ.

އެހެންކަމުން، ގައުމުގެ ރައީސް އައްޔަންކުރާ ރައީސުންނާއި ނައިބުންނަށް ނޫނީ ކޮމިޝަންތައް ނުހިންގޭނެ ކަމަށް ސަރުކާރުގެ މަޖިލިސް މެންބަރުން ދެކެނީ، ރައީސް އައްޔަންކުރާ މީހުންގެ ވިސްނުމަށް އާދަޔާ ހިލާފު ބަދަލެއް އަންނަނީތޯ ވެސް މީކާއިލް ވަނީ ސުވާލު އުފައްދަވާފަ އެވެ.

"2024 ވަނަ އަހަރު އަޅުގަނޑު ލަދުގަނޭ 20 ވަނަ ރައްޔިތުންގެ މަޖިލީހުގައި އަނެއްކާވެސް އިއްޒަތްތެރި ރައީސް 90 ގެ އަހަރުތަކުގައި ރައްޔިތުންގެ މަޖިލީހަށް ހުށަހެޅޭ ފަދަ ބިލުތައް އަނެއްކާވެސް މި ރައްޔިތުންގެ މަޖިލީހަށް ހުށަހެޅިގެންދާކަމީ ލަދުވެތިކަމެއް،" އޭނާ ވިދާޅުވި އެވެ.

މީކާއިލް ވިދާޅުވީ މިއީ ބޯދާ ޑިމޮކްރަސީއާ ބީރައްޓެހި ބިލުތަކެއްގެ ފެށުން ކަމަށާއި ޕީޕީއެމްގެ ފުރަތަމަ ވެރިކަމުގައި 18 ވަނަ ރައްޔިތުންގެ މަޖިލީހުގައި ވެސް މި މަންޒަރު ފެނިގެންދިޔަ ކަމަށެވެ. އަދި އާހިރުގައި އޭރު ސަރުކާރުން ހުށަހެޅި ބިލުތަކަށް ތާއީދުކޮށް ވާހަކަދެއްކި ބައެއް މެންބަރުން އާހިރުގައި މަޖިލީހުގެ ފާރުމަތިން އެއްލައިލި ކަމަށްވެސް އޭނާ ވިދާޅުވި އެވެ.

އަދި، ޑިމޮކްރަސީއާ ބީރަށްޓެހި ފަހަތަށް އެޅޭ ފިޔަވަޅުތަކަށް ރައްޔިތުން ހޮވާފައި ތިބި މަޖިލިސް މެންބަރުން އެއްބާރުލުން ނުދިނުމަށްވެސް މީކާއިލް މިއަދު ގޮވާލެއްވި އެވެ.