އޭއެފްސީ ޗެލެންޖް ލީގުގައި ރާއްޖޭގެ މާޒިޔާ ސްޕޯޓްސް އެންޑް ރެކްރިއޭޝަނުން ކުޅުނު ފުރަތަމަ މެޗުން ތުރުކުމެނިސްތާން ޗެމްޕިއަން، އަކްރަޑަގް އަތުން 2-1 އިން ބަލިވެއްޖެ އެވެ.

ރާއްޖޭގެ ޗެމްޕިއަން، މާޒިޔާ އިން މި ފަހަރު މި ވާދަކުރަނީ އޭއެފްސީން މި ފަހަރު އަލަށް ފެށި ތިން ވަނަ ފަންތީގެ ކްލަބް ފުޓްބޯޅަ މުބާރާތް، ޗެލެންޖް ލީގުގަ އެވެ. ކުވެއިތު ސިޓީގައި ކުޅޭ ގްރޫޕް ބީގައި ކުޅުނު ފުރަތަމަ މެޗުން، ޕްލޭއޮފް ބުރުން އައި ކިރްގިސްތާންގެ ލީގު ޗެމްޕިއަން އަބްދީޝް އާޓާ ވަނީ، 1-0 އިން ކުވެއިތު ލީގުގެ ދެ ވަނަ، އަލް އަރާބީ އަތުން މޮޅުވެފަ އެވެ.

އަލް ކުވެއިތު ސްޕޯޓްސް ކްލަބްގައި މިރޭ ކުޅުނު މެޗު ފަށައިގެން މާޒިޔާ އިން ދިޔައީ ލިބޭ ފުރުސަތުތަކުގައި ނުރައްކާ ކުރަމުންނެވެ. އެ ގޮތުން، މާޒިޔާގެ ހަމްޒާ މުހައްމަދު (ހަމްޕު) ހުސްކޮށްލާފައި އޭރިއާތެރެއިން ދިން ބޯޅައެއް އަރްކަޑަގްގެ ކީޕަރު، އަހަލިއޭވް ރުސްޓަމް ކައިރިން ނައްޓާފައި މާޒިޔާގެ އޮސްޓްރޭލިއާ ފޯވާޑް، ނިކޮލަސް އޮލްސެން ޖެހި ބޯޅަ އަރްކަޑަގް ޑިފެންޑަރަކު ވަނީ ސަލާމަތްކޮށްފަ އެވެ.

އޭއެފްސީ ޗެލެންޖް ލީގުގައި މާޒިޔާގެ އޮލްސެން ބޯޅަ ހިފައިގެންދަނީ.--- ފޮޓޯ: އަތޫފް އާތިފް / އަދަދު ސްޕޯޓްސް

އޭގެ ފަހުން، މާޒިޔާގެ ބްރެޒިލް ފޯވާޑް، ވިލްކްސަން ބޮލުން ޖެހި ބޯޅައެއް، އަރްކަޑަގް ކީޕަރު، އަހަލިއޭވް ވަނީ މަތަކޮށްފަ އެވެ.

މާޒިޔާގެ ކީޕަރު ނެމަންޏާ ލެމަޖިޗް ވަނީ މެޗު 0-0 ގައި އޮއްވައި، ރަނގަޅު ހަމަލާއެއް ހުއްޓުވައިފަ އެވެ. ކޯނަރެއްގައި ކުޑަ އޭރިއާތެރެއިން ލިބުނު ފުރުސަތެއްގައި އަރްކަޑަގްގެ ފޯވާޑް ޝަނާޒް ޓާކިޝޯފް ޖެހި ބޯޅަ ކީޕަރު ނެމާންޏާ ވަނީ މަތަކޮށްފަ އެވެ.

ފުރަތަމަ ހާފު ނިމެން ކައިރިވެފައިވަނިކޮށް، މާޒިޔާ އިން ލީޑުނެގީ އެ ޓީމަށް ކުޅޭ ފަލަސްތީނުގެ މިޑްފީލްޑަރު ޖޮނަތަން ކަންޓިއާނާ ޖެހި ގޯލުންނެވެ. މެޗުގެ 42 ވަނަ މިނިޓްގައި، އަލީ ފާސިރު (ސެންޓޭ) ނެގި ހުރަހެއް ރަނގަޅަށް އަރްކަޑަގް ކުޅުންތެރިންނަށް ސަލާމަތްނުކުރެވުނުއިރު، އެ ބޯޅަ ހޯދައި، ޖޮނަތަން ވަނީ މަތީ ކަނަށް ބޯޅަ ފޮނުވާލައިފަ އެވެ.

އަރްކަޑަގް އިން ދެ ވަނަ ހާފް ފަށައިގެން ވަރަށް ބޮޑަށް ކުރިއަށް ޖެހިގެން ކުޅެ، މެޗުގެ 57 ވަނަ މިނިޓްގައި ރަނގަޅު ޝޮޓެއް ފޮނުވާލި އެވެ. އެ ގޮތުން، އޭރިއާރޮނގުމަތިން ވެލްމިރާޓް ބަލަކޯވް ޖެހި ބޯޅަ ވެސް ކީޕަރު ނެމާންޏާ ވަނީ މަތަކޮށްފަ އެވެ.

ލަނޑު ޖެހުމަށް ފަހު މާޒިޔާ ކުޅުންތެރިން އުފާފާޅުކުރަނީ.--- ފޮޓޯ: އަތޫފް އާތިފް / އަދަދު ސްޕޯޓްސް

މެޗުގެ 62 ވަނަ މިނިޓްގައި ކައުންޓަ އެޓޭކުގައި މާޒިޔާގެ ހަމްޕުއާ ގުޅިގެން އޮލްސަން ކުރި އެޓޭކެއްގައި އޭނާ އޭރިއާތެރެއިން ޖެހި ބޯޅަ ގޯލާ ސީދާވާގޮތެއްނުވި އެވެ. އޭގެ ހަތަރު މިނިޓް ފަހުން، އަރްކަޑަގް އިން އެއްވަރުކުރި އެވެ. މިއީ، އޭރިއާތެރެއަށް ހުރަސްވި ބޯޅައަކުން ޑުރްޑިއޭވް ބޮލުން ވައްދާލި ގޯލެކެވެ. އޭނާ ކުޅެން އެރީ މި ހާފުގައި ބަދަލަކަށެެވެ. އަރްކަޑަގުން ލީޑުނެގީ މެޗުގެ 77 ވަަނަ މިނިޓްގަ އެވެ. މިއީ، އޭރިއާތެރެއަށް ހުރަސްވި ބޯޅައަކުން އަނަދުއަދިއޭވް ބޮލުން ޖެހި ގޯލެކެވެ.

ބަދަލުތަކެއް ގެނެސްގެން މާޒިޔާ އިން ލަނޑެއް ޖެހޭތޯ ކުރި މަސައްކަތުގައި އެ ޓީމުން ފޮނުވާލި ހަމަލާތައް ގޯލާ ސީދާނުވި އެވެ. އެ ގޮތުން، ނާއިޒު ހަސަން (ދާދު) ޖެހި ބޯޅަ ބްލޮކްވިއިރު، ހަސަން ރާއިފް (ހަންނަ) ޖެހި ޝޮޓް ދިޔައީ ހުރަސްދަނޑިމަތިންނެވެ. ފަހު ވަގުތު ދިގު އެއްލުންތަކެއް އެއްލައިގެން ގޯލެއް ޖަހައި އެއްވަރުކުރެވޭތޯ މާޒިޔާ އިން ކުރި މަސައްކަތް ކާމިޔާބެއްނުވި އެވެ.

މިއީ މިދިޔަ އަހަރުގެ ޑިސެމްބަރު މަހުގެ ފަހުން މާޒިޔާ އިން ކުޅުނު ފުރަތަމަ ރަސްމީ މެޗެެވެ. ރާއްޖޭގެ ފުޓްބޯޅަ ސީޒަން ނުފަށާތީ މާޒިޔާ އިން މި ފަހަރުގެ ޗެލެންްޖް ލީގަށް މި ނުކުތީ ދޮޅު މަހެއްހާ ދަވަހު ޕްރެކްޓިސްކޮށް ރަސްމީ މެޗެއް ނުކުޅެ އެވެ.

ޗެލެންޖް ލީގުގައި މާޒިޔާ ކުޅޭ ދެ ވަނަ މެޗުގައި އަންގާރަ ދުވަހު ބައްދަލުކުރާނީ އަލް އަރާބީއާ ދެކޮޅަށެވެ. ޗެލެންޖް ލީގުގެ ވެސްޓް ޒޯނުގައި އޮތީ ތިން ގްރޫޕެކެވެ. ތިން ގްރޫޕުން އެއް ވަނަ އަށް ކުއާޓާ ފައިނަލުގެ ޖާގަ ކަށަވަރުވާއިރު، ދެން ކުއާޓާ އަށް ދާނީ، ތިން ގްރޫޕްގެ ދެ ވަނަ ޓީމުތަކުގެ ތެރެއިން އެންމެ ނަތީޖާ ރަނގަޅު ޓީމެވެ.