އިސްތަންބޫލް، ތުރުކީ (އޮކްޓޫބަރު 25) - ޔުއެފާ ޔޫރޮޕާ ލީގުގައި ރޭ މެންޗެސްޓާ ޔުނައިޓެޑާ 1-1 އިން އެއްވަރުވި މެޗުގައި ފެނަބާޗޭގެ ކޯޗު ހޯސޭ މޮރީނިއޯ އަށް ރަތް ކާޑު ދެއްކި ރެފްރީ އަކީ ދުނިޔޭގައި އެންމެ މޮޅު އެއް ރެފްރީ ކަމަށް އޭނާ ބުނެފި އެވެ.

ފެނަބާޗޭ އަށް ޕެނަލްޓީ އެއް ނުދޭން ނިންމުމުން، މޮރީނިއޯ ވަނީ ޓަޗްލައިން މަތީގައި ހުރެ އެ ނިންމުމާ މެދު ވަރަށް ބޮޑަށް ހިތްހަަމަނުޖެހުން ފާޅުކޮށްފަ އެވެ.

މެޗަށް ފަހު މީޑިއާ އަށް ދިން އިންޓަވިއުއެއްގައި މޮރީނިއޯ ބުނީ މި މެޗުގައި އޭނާ އަށް ރަތް ކާޑެއް ދެއްކި ރެފްރީ، ފްރާންސްގެ ކްލަމޯން ޓާފިން އަކީ ދުނިޔޭގެ ވެސް އެންމެ މޮޅު އެއް ރެފްރީ ކަމަށެވެ.

"ރެފްރީ ބުނީ ވަރަށް އާދަޔާހިލާފު ވާހަަަކައެއް. އެއީ އޭނާ އަށް އެ ފަހަރާ ރަނގަޅަށް ފެނުނު ކަމަށް އަހަރެން ޓަޗްލައިންގައި އުޅުނު ގޮތާއި އޭރިއާތެރޭގައި ހިނގި ކަންތައް. މި ދެ ކަންތައް އެއް ފަހަރާ ރަނގަޅަށް ފެންނާނީ ވަރަށް އާދަޔާހިލާފު މީހަކަށް،" މޮރީނިއޯ ބުންޏެވެ.

"އަހަރެން އޭނަ އަށް މަރުހަބާ ކިޔަން. އެއީ އެހާ އަވަހަށް ހިނގި ދެ ކަންތައް އެހާ ރަނގަޅަށް ބެލީމަ. ޕެނަލްޓީ ވި ފައުލާއި ބެންޗުގައި އަހަރެން އުޅުނު ގޮތާ ވަރަށް ރަނގަޅަށް ބަލާފައި އެ ބުނީ. އެއީ އޭނަ އަހަންނަށް މި ކަމުގައި ދިން ތަފްސީލަކީ. އެހެންވީމަ، އެއީ އެންމެ މޮޅު ރެފްރީ، ނޫނީ އެންމެ މޮޅު ރެފްރީންގެ ތެރެއިން އެކަކު،"

ކުރިން ޗެލްސީ، ޔުނައިޓެޑް އަދި ޓޮޓެންހަމަށް ކޯޗުކޮށްދިން މޮރީނިއޯ ބުނީ، އިނގިރޭސި މީޑިއާ އިން މި މެޗުގައި ޔުނައިޓެޑުން ދެއްކީ ދަށް ކުޅުމެއް ކަމަށް ބުނެ، ނޫސްތަކުގެ ފަލަސުރުހީ އަށް އެ ވާހަކަ ގެންނައިރު، އިދިކޮޅަށް ނުކުތް ޓީމުގެ ވެސް ރަނގަޅު ވާަހަކަ ދައްކައި، އެ މީހުންނަށް ހައްގުވާ ކްރެޑިޓް ދިނުން ވެސް ރަަނގަޅުވާނެ ކަމަށެވެ.