ގައުމީ އަންހެން ފުޓްބޯޅަ ޓީމަށް އެންމެ ގިނަ މެޗު ކުޅެދިން ކުޅުންތެރިންގެ ތެރޭގައި ހިމެނޭ ކުރީގެ ކެޕްޓަނެއް ކަމަށްވާ އައިމިނަތު ޒާހިޔާ، މި ފަހަރުގެ ސާފް ވިމެންސް ޗެމްޕިއަންޝިޕަށް ފަހު ޓީމުން ރިޓަޔާކޮށްފި އެވެ.

ޒާހިޔާ، 31، ރިޓަޔާކުރިކަން އިއުލާނުކުރީ ސާފް ވިމެންސް ޗެމްޕިއަންޝިޕްގައި މި ފަހަރު ރާއްޖޭން ކުޅުނު ފަހު މެޗަށް ފަހު އެވެ. ބޫޓާން އަތުން 13-0 އިން ރާއްޖެ ބަލިވި މެޗުގައި ޒާހިޔާ ކުޅެން އެރީ ބަދަލަކަށެވެ. މި މުބާރާތުގައި ރާއްޖޭން ނޭޕާލާ ދެކޮޅަށް ކުޅުނު މެޗުގައި ޒާހިޔާ ވަނީ ޓީމުގެ ފުރަތަމަ އެގާރައިގައި ކުޅެފަ އެވެ.

ދިވެހި ސިފައިންގެ ކްލަބްގައި ވެސް ތަފާތު ދައްކާ ޒާހިޔާ، ވަނީ ގައުމީ ޓީމަށް 10 އަކަށް ވުރެ ގިނަ އަހަރު ކުޅެދީފަ އެވެ. އޭނާ އެންމެ ފަހުން ބޭއްވި ދެ ސާފް ވިމެންސް ޗެމްޕިއަންޝިޕްގައި ކުޅެފައިވަނީ ކެރިއަރުގައި ދިމާވި ބޮޑު އަނިޔާއަކުން އަރައިގަނެ، އަލުން ކުޅުމަށް އެނބުރި އައުމަށް ފަހު އެވެ.

މި ފަހަރުގެ ސާފް ވިމެންސް ޗެމްޕިއަންޝިޕްގައި ނޭޕާލާއި ރާއްޖެ ކުޅުނު މެޗުގެ ތެރެއިން ޒާހިޔާ (ކ).

ޒާހިޔާ އަށް އަނިޔާވީ 2018 ވަނަ އަހަރު ގައުމީ އަންހެން ޓީމުން ބަހްރޭނާ ދެކޮޅަށް އެ ގައުމުގައި ކުޅުނު މެޗުގަ އެވެ. އެ މެޗުގައި ޒާހިޔާގެ އަތްބިންދައިގެން ގޮސް، އޭނާ އިތުރު ފަރުވާ އަށް އެމްބިއުލަންސްގައި ހޮސްޕިޓަލަށް ގެންދިޔަ އެވެ.

އަންހެން ފުޓްބޯޅައިގައި ރާއްޖޭގެ ތާރީހު ދުށް އެންމެ މޮޅު ކުޅުންތެރިންގެ ތެރޭގައި ހިމެނޭ، ޒާހިޔާގެ އަތްބިންދައިގެން ދިޔައިރު، ދެ ކަށިގަނޑު އެއްކޮށް ދިއުމުން އޭރު ވެސް އޭނާ އަށް އޮތް ބިރަކީ "އެނބުރި ދަނޑަށް އާދެވޭނެތޯ" އުފެދޭ ސުވާލަށް ޔަގީން ޖަވާބެއް ސިކުނޑީގައި ވެސް ނެތުމެވެ.

ބަހްރޭނުގައި ފުރަތަމަ އޮޕަރޭޝަނެއް ކުރިއިރު، އަތުގައި ދަގަނޑު ޕްލޭޓެއް އަޅައި، އެތެެރެއިން ބޯލްޓް ލައްވައިގެން، ދުވަސްތައް ގުނީ އަނިޔާއިން ރިކަވަރީވުމަށް ޝެޑިއުލެއް ހަދައިގެންނެވެ.

2016 ވަނަ އަހަރުގެ ސައުތު އޭޝިއަން ގޭމްސްގައި ނޭޕާލާ ދެކޮޅަށް ކުޅުނު މެޗެއްގެ ތެރެއިން ޒާހިޔާ (މ) ބޯޅަ ފޮނުވާލަނީ.

އެކަމަކު، މާލެ އައިސް ރިކަވަރީ މުއްދަތުގައި އިތުރު ކަންތައްތަކާ ކުރިމަތިލާން ޖެހުނެވެ. އައިޖީއެމްއެޗުން އިތުރު އޮޕަރޭޝަނެއް ކުރުމުން ވެސް އަތުގައި ހުރި ރިހުމަށް ލުޔެއް ނުލިބި ދިއުމުން، ދެން ޖެހުނީ އިތުރު ޑޮކްޓަރެއްގެ ލަފާ ހޯދާށެވެ.

އެހެންވެ، ޓްރީޓޮޕަށް ދައްކައިގެން ބެލިއިރު، އަތުގެ ކަށިގަނޑު އޮތީ ފީވެފަ އެވެ. އެހެންވެ، އަތުގެ އެ ކަށިގަނޑު ބުރިކޮށްލައިގެން ވެސް ކުޅުން ކުރިއަށްގެންދަން ބޭނުންވާތީ އެ ގޮތަށް ކުރިއަށް ދިޔައީ އެވެ. އަތުގައި ބޭންޑެއް އަޅައިގެން ވެސް ހުރި ހިތްވަރެއް ނެރެގެން، ކެރިއަރު ނިންމާލީ އެންމެ މަތީ ފަންތީގައި ރާއްޖެ ތަމްސީލްކޮށްގެންނެވެ.

ޒާހިޔާގެ ރިޓަޔާމަންޓް ހަބަރާ އެކު، ރާއްޖޭގެ އަންހެން ފުޓްބޯޅައިގައި ހިދުމަތްކޮށްދިން އެތައް ފަރާތަކުން އަންނަނީ، އޭނާ ގައުމީ ޓީމުގައި ހިމެނިގެން ކުރި މަސައްކަތުގެ އަގުވަޒަންކޮށް ޝުއޫރު ފާޅުކުރަމުންނެވެ.

ޒާހިޔާގެ ރިޓަޔާމަންޓަށް ހާއްސަކޮށް، ގައުމީ އަންހެން ޓީމުގެ ކުޅުންތެރިން ދިން ގާޑް އޮފް އޮނާ އަށް ފަހު.-- ފޮޓޯ: ސޯޝަލް މީޑިއާ

ރިޓަޔާމަންޓް އިއުލާނުކުރިއިރު، ޒާހިޔާ އަށް ލިބޭނެ އެންމެ ބޮޑު އެއް ހިތްހަމަޖެހުމަކީ، ގައުމީ ޓީމުގައި އޭނާއާ އެކު، އެއް ޓީމެއްގައި ގިނަ އަހަރުތަކެއް ވަންދެން ކުޅުނު ތިން ކުޅުންތެރިން މި ވަގުތު ކޯޗިން ޓީމުގައި ތިބުމެވެ. އެއީ، ކޯޗިންގައި މުހިންމު ހަރުފަތްތަކެއް ކަނޑަތުކުރަމުން އަންނަ، ކުރީގެ ކުޅުންތެރިން ކަމަށްވާ، މަރިޔަމް މިރުފަތު، ޝީނީޒް މުހައްމަދު އަދި އާމިނަތު ޝިޔާނާ އެވެ.

ޒާހިޔާ، ރިޓަޔާކޮށްފައި މި ވަނީ ރާއްޖޭގެ އަންހެން ފުޓްބޯޅައިގައި އައި ދެ ޖީލުގެ ކުޅުންތެރިންނާ އެއް ޓީމެއްގައި ކުޅެ، ނަމޫނާ ދެއްކުމަށް ފަހު އެވެ.