ހުއްދަ ނުހޯދައި ރަށުގައި ބޮޑުހިލަ ޖެހުމުން ހުރަވަޅި ބީޗް ރިސޯޓު އެންމެ 20،000 ރުފިޔާއިން ޖޫރިމަނާކޮށްފި އެވެ.

އެންވަރަމެންޓަލް ޕްރޮޓެކްޝަން އެޖެންސީން ކުރި އިއުލާނެއްގައި ބުނެފައި އޮތީ އެ ރިސޯޓުން ބޮޑުހިލަ ޖެހީ ރަށުގެ އިރުމަތީ ފަރާތުން ފަޅު ތެރޭގައި ކަމަށެވެ. އެ މަސައްކަތް ކުރިއަށް ގެންގޮސްފައި ވަނީ ތިމާވެއްޓަށް އަސަރު ކުރާނެ މިންވަރު ދަނެގަންނަ ރިޕޯޓު ނުހަދައި ކަމަށް ވެސް އެ އެޖެންސީން ބުނެ އެވެ.

އެންވަރަމެންޓަލް ޕްރޮޓެކްޝަން އެޖެންސީން ބުނީ އެހާ ކުޑަ އަދަދަކުން ހުރަވަޅި ރިސޯޓު ޖޫރިމަނާ ކުރީ އެއީ އެފަދަ ކުށެއް އެ ރިސޯޓުން ކުރި ފުރަތަމަ ފަހަރު ކަމަށްވާތީ ކަމަށެވެ.

ހުއްދަ ނުހޯދައި ބޮޑުހިލަ ޖެހި މައްސަލައިގައި އެ ރިސޯޓު ޖޫރިމަނާ ކުރީ މިދިޔަ ހޯމަ ދުވަހެވެ. ޖޫރިމަނާގެ ފައިސާ 30 ދުވަހުގެ ތެރޭގައި ދައްކަން އެ ރިސޯޓަށް އަންގާފައިވާނެ ކަމަށް އެންވަރަމެންޓަލް ޕްރޮޓެކްޝަން އެޖެންސީން ބުނެ އެވެ.