އައްޑޫ ސިޓީ ހިތަދޫގައި ހުންނަ ފިހާރައަކަށް ވަދެ ސޭޓަށް ބިރުދައްކާ ފޭރުނު މައްސަލައެއްގައި ދެ މީހަކު ހައްޔަރުކޮށްފި އެވެ.

ފުލުހުން ބުނީ އޮކްޓޯބަރު 14، ގައި ރިޕޯޓުކުރި މި މައްސަލާގައި ހައްޔަރުކުރީ 40 އަހަރު އަދި 31 އަހަރުގެ ދެ ދިވެހި ފިރިހެނުން ކަމަށެވެ.

މީގެ ތެރެއިން 41 އަހަރުގެ މީހާ އިއްޔެ ހައްޔަރުކުރިއިރު އޭނާގެ ބަންދަށް ކޯޓުން ވަނީ 30 ދުވަސް ޖަހާފަ އެވެ. ދެވަނަ މީހާ ހައްޔަރުކުރީ މިއަދެވެ. މި ދެ މީހުން ވެސް ހައްޔަރުކުރީ ކޯޓު އަމުރެއްގެ ދަށުން ކަމަށް ފުލުހުން ބުންޏެވެ.

އެ މީހުން ފޭރުނު ތަކެތީގެ ތަފުސީލެއް އަދި ވަނަވަރެއް ފުލުހުން ހާމައެއް ނުކުރެ އެވެ. ނަމަވެސް މައްސަލަ އިތުރަށް ތަހުގީގުކުރަމުންދާ ކަމަށް ބުންޏެވެ.

މި ހާދިސާގެ މަންޒަރު ފެންނަ ވީޑިއޯއެއް ސޯޝަލް މީޑިއާގައި ދަނީ ދައުރުވަމުންނެވެ. އެ ވީޑިއޯއިން ފެންނަ ގޮތުން ފޭރުނު ދެ މީހުން ސޭޓަށް ބިރުދެއްކީ ލަކުޑި ބުރިއަކާއި ވަޅިއެއް ބޭނުންކޮށްގެނެވެ.