ކުރިއަށް އޮތް ފަސް ދުވަހު ރާއްޖޭގެ ހުރިހާ އަތޮޅެއްގެ ކަނޑުތައް ވެސް ވަރަށް ގަދަވެ، ގަދަ ވަޔާއެކު ބޯކޮށް ވާރޭވެހޭނެ ކަމަށް ލަފާކޮށް، މޫސުމަށް ސަމާލުވާން މޯލްޑިވްސް މީޓިއޮރޮލޮޖިކަލް ސާވިސް (މެޓް އޮފީސް) އިން އިލްތިމާސްކޮށްފި އެވެ.

އެ އޮފީހުން މިއަދު ކުރި އިއުލާނެއްގައި ބުނީ ރާއްޖެ ސަރަހައްދުގައި ހުޅަނގު މޫސުމުގެ ބާރު ގަދަވެފައިވާ ކަމަށާއި ކުރިއަށް އޮތް ފަސް ދުވަހު އުތުރާއި މެދުރާއްޖެތެރޭގެ ސަރަހައްދުގައި އާންމުވައި ހުންނާނީ ގަޑިއަކު 15 މޭލާއި 25 މޭލު ބާރުމިނުގައި ކަމަށް ލަފާ ކުރެވޭ ކަމަށެވެ. އަދި، ދެކުނުގެ ސަރަހައްދުގައި އާންމުވައި ހުންނާނީ 13 މޭލާއި 23 މޭލު ބާރުމިނުގައި ކަމަށް ލަފާ ކުރެވޭ ކަމަށް ވެސް އެ އޮފީހުން ބުންޏެވެ.

ނަމަވެސް ވިލާގަނޑުގައި ގާތްގަނޑަކަށް ގަޑިއަކު 45 މޭލާއި 55 މޭލަށް ވައިގަދަވެގެން ގޮސްދާނެ ކަމަށް މެޓް އޮފީހުން ލަފާ ކޮށްފައިވެ އެވެ.

"އެހެންކަމުން ރާއްޖޭގެ ހުރިހާ އަތޮޅުތަކެއްގެ ކަނޑުތައް ވަރަށް ގަދަވާނެ ކަމަށް ލަފާ ކުރެވެ އެވެ. އަދި ގަދަ ވަޔާއެކު ބޯކޮށް ވާރޭވެހި ގުގުރާނެ ކަމަށް ބެލެވެ އެވެ. މީގެ އިތުރުން ދިޔަވަރު ބޮޑުވާ ގަދިތަކުގައި އުދައިގެ އަސަރު ކުރުމަކީ އެކަށީގެންވާ ކަމެއް،" މެޓް އޮފީހުން ނެރުނު އިއުލާނުގައި ބުންޏެވެ.

މެޓް އޮފީހުން ބުނީ މޫސުން ގޯސްވާނެ ކަމަށް ލަފާ ކުރެވޭތީ ކަނޑުދަތުރު ކުރާ ފަރާތްތަކުން ދަތުރުތަކަށް ފުރުމުގެ ކުރިން އެންމެ ފަހުގެ މޫސުމީ މައުލޫމާތު ހޯދުމަށް އެދޭ ކަމަށެވެ.