ބޮޑީބޯޑިން އަށް ޝައުގުވެރިވާ ޒުވާން ބޮޑީބޯޑަރުން އުފެއްދުމުގެ މަގުސަދުގައި މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ) އިން ކުރިއަށްގެންދާ "ހުދު ފޮނު" ޕްރޮގްރާމުގެ، ތިން ވަނަ ކްލިނިކްގައި ބައިވެރިވުމުގެ ފުރުސަތު ހުޅުވާލައިފި އެވެ.

މާލެ ސަރަހައްދުގައި ދިރިއުޅޭ ބޮޑީބޯޑިން އަށް ޝައުގުވެރިކަން ހުންނަ ކުދިންނަށް ހާއްސަކޮށް، މި ކްލިނިކް ކުރިއަށްދާނީ އަންނަ ހޮނިހިރު ދުވަހު ހެނދުނު އެވެ. އެމްބީބީއޭ އިން ވަނީ، މި ކްލިނިކްގައި ބައިވެރިވުމުގެ ފުރުސަތު އާންމުކޮށް ހުޅުވާލައިފަ އެވެ.

އެ ގޮތުން، 10-16 އަހަރާ ދެމެދުގެ ކުރިން، ގޫގަލް ފޯމެއް މެދުވެރިކޮށް، ރަޖިސްޓްރީވުމުގެ ފުރުސަތު ދީފައިވާއިރު، އެމްބީބީއޭ އިން ހަމަޖައްސާފައިވަނީ، ކުއްޖާގެ ބެލެނިވެރިއެއްގެ ފަރާތުން މި ފޯމު ބަލައިގަތުމަށެވެ.

އެމްބީބީއޭ އިން ވަނީ "ހުދު ފޮނު" ޕްރޮގްރާމްގައި ބައިވެރިވުމުގެ ކުރިން، އެއްބަސްވާން ޖެހޭ އިގުރާރެއް ވެސް ފޯމާ އެކު، ހިމަނައިފަ އެވެ.

އެމްބީބީއޭގެ ވައިޑީޕީ ޕްރޮގްރާމް "ހުދު ފޮނު" ތައާރަފްކުރީ މިދިޔަ އަހަރުގެ އެ އެސޯސިއޭޝަންގެ އަހަރީ އާންމު ޖަލްސާގަ އެވެ. އެ ގޮތުން، މިދިޔަ އަހަރު މި ޕްރޮގްރާމްގައި އަންހެން ކުދިންނަށް ވައިޑީޕީ ކްލިނިކް ހިންގައިދިނީ ދުނިޔޭގެ ޗެމްޕިއަންކަން ފަސް ފަހަރު ހޯދާފައިވާ ބްރެޒިލްގެ ނޭމަރާ ކަވާލިއޯ އެވެ. އަދި ފިރިހެން ކުދިންނަށް ކްލިނިކް ކުރިއަށްގެންގޮސްދިނީ، ދުނިޔޭގެ ޗެމްޕިއަންކަން ދެ ފަހަރު ހޯދާފައިވާ ފްރާންސްގެ އަމައުރީ ލެވާން އެވެ.