ކްލަބް މޯލްޑިވްސް ކަޕްގައި އިއްޔެ ހަވީރު އާއި ރޭ ކުޅުނު މެޗުތަކުން ކާމިޔާބު ހޯދި އެސްޓީއޯ ރެކްރިއޭޝަން ކްލަބް އާއި ސްޓެލްކޯ ކްލަބް އަދި ރޯޑް ރެކްރިއޭޝަން ކްލަބް (އާރްއާރްސީ) މުބާރާތުގެ ގަދަ 16 ބުރުން ޖާގަ ހޯދައިފި އެވެ.

ގްރޫޕް ސީގައި އެސްޓީއޯ އިން ވަނީ އޭވިއޭޝަން ސެކިއުރިޓީ އަތުން 7-1 އިން މޮޅުވެފަ އެވެ. އެ ގްރޫޕްގެ އަނެއް މެޗުން، ޕްރިޒަން ކްލަބުން ވަނީ ޕޮލިސް ކްލަބް 4-0 އިން ބަލިކޮށްފަ އެވެ. ގްރޫޕް ޑީގައި އިމިގްރޭޝަން އަތުން ސްޓެލްކޯ 2-0 އިން މޮޅުވިއިރު، އެ ގްރޫޕްގެ އަނެއް މެޗުން، ކަސްޓަމްސް އާއި ދިރާގު ވަނީ ލަނޑެއް ނުޖެހި 0-0 އިން އެއްވަރުވެފަ އެވެ.

ގްރޫޕް އީގައި ޔުނައިޓެޑް ބީއެމްއެލް އިން 5-0 އިން އެމްޓީސީސީ ބަލިކުރިއިރު، ގްރޫޕް އެފްގައި އާރްއާރްސީން އުރީދޫ އަތުން މޮޅުވީ 4-0 އިންނެވެ.

އާރްއާރްސީގެ ހާފިޒް ރޭގެ މެޗުގައި ލަނޑު ޖެހުމަށް ފަހު އުފާފާޅުކުރަނީ.---- ފޮޓޯ: އިމޭޖަސް،އެމްވީ

އިމިގްރޭޝަން އަތުން ސްޓެލްކޯ މޮޅުވި މެޗުގައި އެ ޓީމުގެ ލަނޑުތައް ޖެހީ އިބްރާހިމް ރިމާހު (ރިމޭ) އާއި އަބްދުﷲ ޒިޔާން އެވެ.

އެސްޓީއޯ އިން އޭވިއޭޝަން ސެކިއުރިޓީ ބަލިކުރި މެޗުގައި ލަނޑުތައް ޖެހީ، މުހައްމަދު އިސާމް ހަތަރު ގޯލުގެ އިތުރުން އިޔާން އަހުމަދު ރަޝީދު، އިސްމާއިލް އީސާ (މެސީ) އަދި ހަސަން ނަޒީމް (ޗޯޓު) އެވެ. އޭވިއޭޝަން ސެކިއުރިޓީގެ ލަނޑު ޖެހީ، އަހުމަދު ޒައުލް ނާޒިމް އެވެ. ޕްރިޒަން އިން ޕޮލިސް ބަލިކޮށް ފުރަތަމަ މޮޅު ހޯދިއިރު، ލަނޑުތައް ޖެހީ އިބްރާހިމް އިމްރާން (އިންމި) ދެ ގޯލާއި މުހައްމަދު ނޫހު އިބްރާހިމް އާއި އިސްމާއިލް ޒަރީރު ކޮންމެ ކުޅުންތެރިއަކު ގޯލެކެވެ.

ގްރޫޕް އީގައި އެމްޓީސީސީ ކޮޅަށް ބީއެމްއެލްގެ ލަނޑުތައް ޖެހީ، އިޝާން އިބްރާހިމް (ސައްޓު)، ޒައިން ޒަފަރު، އަހުމަދު މަހުދޫމް، މުހައްމަދު ފާލިލް ފާއިގް އަދި އަލީ އުޒައިރު މުހައްމަދު އެވެ. އާރްއާރްސީން ރޭގެ މެޗުގައި، އުރީދޫ ކޮޅަށް ލަނޑުތައް ޖެހީ، އަބްދުﷲ މިދުހަތު ފަހުމީ (ބިޗަޑް) ދެ ގޯލާއި އަލީ ހާފިޒް (ހާއްޕެ) އަދި އަބްދުﷲ ޔާމީން (ޔާނު) އެވެ.