ކްލަބް މޯލްޑިވްސް ކަޕްގައި ރޭ ކުޅުނު މެޗުތަކުން މޮޅުވެ، މުބާރާތުގެ ގަދަ 16 ބުރުން ޖާގަ ޔަގީންކުރި ފުރަތަމަ ދެ ޓީމަކަށް ފިއުލް ސަޕްލައި މޯލްޑިވްސް (އެފްއެސްއެމް) އާއި ހައުސިން ޑިވެލަޕްމަންޓް ކޯޕަރޭޝަން (އެޗްޑީސީ) ވެއްޖެ އެވެ.

އެ ގޮތުން، ގްރޫޕް އޭގައި އެޗްޑީސީން ކުޅުނު ދެ ވަނަ މެޗުގައި ރޭ އެލައިޑް އަތުން މޮޅުވީ 2-1 އިންނެވެ. މި ގްރޫޕްގެ އަނެއް މެޗުގައި ރޭ އާސަންދަ އަތުން 4-1 އިން ކްލަބް ފެން ވަނީ މޮޅުވެފަ އެވެ. ގްރޫޕް ބީގައި އެފްއެސްއެމް އިން ދެ ވަނަ މޮޅު ހޯދީ ރޭ 5-3 އިން ބަރޮސް މޯލްޑިވްސް ބަލިކޮށްގެންނެެވެ. އަދި މި ގްރޫޕްގެ އަނެއް މެޗުން، ކްލަބް ޓީޓީއެސް އާއި އެމްއޭސީއެލް ވަނީ 1-1 އިން އެއްވަރުވެފަ އެވެ.

އެޗްޑީސީ އަށް ރޭގެ މެޗުގައި ދެ ގޯލު ވެސް ޖަހައިދިނީ ހުސެއިން ސުހައިލް (ސޮކޭ) އެވެ. އެލައިޑްގެ ހަމައެކަނި ލަނޑު ޖެހީ، މުހައްމަދު އައިހަމް އެވެ. ފެން ޓީމަށް ރޭގެ މެޗުގައި ލަނޑުތައް ޖަހައިދިނީ، ހުސެއިން ސަވީލް ދެ ގޯލާއި އަހުމަދު މަހުދީ އާއި ސޮލާހު އަލީ (ސޮލާ) އެވެ. އާސަންދައިގެ ލަނޑު ޖެހީ، މުހައްމަދު ހަމްދޫން އެވެ.

އެޗްޑީސީގެ ސުހައިލް (ވ) ރޭގެ މެޗުގެ ތެރެއިން ބޯޅަ ހިފައިގެން.--- ފޮޓޯ: އިމޭޖަސް.އެމްވީ

ގްރޫޕްގެ އެއް ވަަނައިގައި ހަ ޕޮއިންޓާ އެކު އެޗްޑީސީ އޮތްއިރު، ދެ ވަނައިގައި އޮތް ފެން އާއި ތިނެއްގައި އޮތް އާސަންދަ އަށް ވަނީ ތިން ޕޮއިންޓް ލިބިފަ އެވެ. ހަތަރެއްގައި އޮތް އެލައިޑަށް އަދި ޕޮއިންޓެއް ނުލިބޭއިރު، އެ ޓީމަށް މުބާރާތުގައި ކުރިއަށްދިއުމުގެ އަމިއްލަ ބާރެއް ނެތެވެ.

އެފްއެސްއެމް އަށް ރޭގެ މެޗުގައި ލަނޑުތައް ޖަހައިދިނީ، އިބްރާހިމް ސިމާހު (ތަޑޭ) ހެޓްރިކެއްގެ އިތުރުން، މުހައްމަދު ނާފިއު އަހުމަދު (ނާއްޕެ) އަދި އަހުމަދު އައިހަމް (އައިހު) އެވެ. ބަރޮސްގެ ލަނޑުތައް ޖެހީ، އާދަމް ޝަހީމް ދެ ގޯލާއި އަބްދުﷲ ގުރައިޝް އެވެ.

އެމްއޭސީއެލްގެ އިބްރާހިމް އައިމަން އެ ޓީމަށް ލީޑުނަގައިދީފައިވަނިކޮށް، ޓީޓީއެސް އަށް އެއްވަރުކޮށްދިނީ، މުހައްމަދު އިޔާދު އެވެ.

ގްރޫޕް ބީގެ އެއް ވަނައިގައި އެފްއެސްއެމް އޮތީ ހަ ޕޮއިންޓާ އެކު އެވެ. ދެ ވަނައިގައި އޮތް ޓީޓީއެސް އަށް ހަތަރު ޕޮއިންޓް ލިބިފައިވާއިރު، ތިން ވަނައިގައި އޮތް އެމްއޭސީއެލް އަށް އެއް ޕޮއިންޓް އަދި ބަރޮސް އަށް އަދި ޕޮއިންޓެއް ނުލިބެ އެވެ.