މެންޗެސްޓާ (ސެޕްޓެމްބަރު 28) - މީޑިއާގައި ވާހަކަ ދައްކާއިރު ބުނާ އެއްޗެއް ފުރިހަމަ އަށް އޮޅުންފިލާނެ ގޮތަށް ވާހަކަ ދެއްކުމަށް ބުނެ، އާސެނަލްގެ ކޯޗު މިކޭލް އާޓެޓާ އަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ރައްދުދީފި އެވެ.

މިދިޔަ ހަފްތާގައި އިނގިރޭސި ޕްރިމިއާ ލީގުގައި އާސެނަލާއި ސިޓީ ކުޅުނު މެޗު 2-2 އިން އެއްވަރުވިއިރު، އެ މެޗަށް ފަހު ދެ ޓީމުގެ ކުޅުންތެރިންނާއި އޮފިޝަލުން ވަނީ މީޑިއާގައި ބަހުގެ ހަމަލާ ބަދަލުކޮށްފަ އެވެ.

އެ ގޮތުން، އާސެނަލްގެ ކޯޗު އާޓެޓާ ވަނީ ސިޓީގައި އޭނާ ހަތަރު އަހަރު ހޭދަކުރި ކަމަށާއި އެ ތަނުގައި ހިނގާ ކަންތައްތައް އޭނާ އަށް އެނގޭ ކަމަށް ބުނެފަ އެވެ. އެއީ، ގާޑިއޯލާގެ އެސިސްޓަންޓް ކޯޗެއްގެ ގޮތުގަ އެވެ.

"ދެން ފަހަރަކުން މިކޭލް (އާޓެޓާ) އެބަޖެހޭ އޭނާ ދައްކާ ވާހަކަަ ސާފުކޮށް ބުނެދެން. އޭނަ އެބަ ބުނޭ މި ތަނުގައި ހަތަރު އަހަރު ހޭދަކުރީމޭ، މި ތަނުގައި ހިނގާ ކަންތައްތައް ވަރަށް ރަނގަޅަށް އެނގެޔޭ. އެ ވެދާނެ މިހާރު އަހަރެމެންނާ ދެކޮޅަށް އެ ހިނގާ 115 މައްސަލައާ ގުޅޭ ވާހަކަ އަކަށް ވެސް. ފަހަރެއްގައި އޭނަ އަށް އެ މައުލޫމާތު އެނގެނީ ކަަމަށް ވެސް ވެދާނެ. އުންމީދަކީ އަހަރެން މި ދައްކާ ވާހަކައިގެ ސުވާލުތައް އޭނާއާ ކުރެވި ސާފުކޮށް ޖަވާބުތަކެއް ލިބޭނެ ކަމަށް،" ގާޑިއޯލާ ބުންޏެވެ.

ގާޑިއޯލާ ބުނީ، އާސެނަލުން ބޭނުންވަނީ ސިޓީ ރުޅިއަރުވާލައިގެން މިއީ ހަނގުރާމައެއް ފަދަ ވާދަވެރިކަމަކަށް ހެދުން ކަމަށްވާނަމަ އެ ކަމަށް އެ ޓީމުން ވެސް ތައްޔާރު ކަމަށެވެ.

އާސެނަލްގެ ބްރެޒިލް ޑިފެންޑަރު، ގަބްރިއެލް މަގާޅައެސް ވަނީ ސިޓީ މެޗަށް ފަހު، މިއީ ހަނގުރާމައެއް ކަމަށާއި ފުރަތަމަ މެޗު މި ނިމުމުން ދެން ވިސްނުން ހުރީ ސިޓީން އާސެނަލް ދަނޑަށް އަންނަ މެޗުގައި ބަދަލު ހިފުމަށް ކަމަށެވެ.

"އެ މީހުން (އާސެނަލް) މިއީ ހަނގުރާމަ އަކަށް ހަދަން ބޭނުމިއްޔާ. އަހަރެމެން މި ތިބީ މި ހަނގުރާމަ ވެސް ކުރަން ތައްޔާރަށް،" ގާޑިއޯލާ ބުންޏެވެ.