ކްލަބް މޯލްޑިވްސް ކަޕް 2024ގެ ފުރަތަމަ މެޗުތަކުން، ކްލަބް ޓީޓީއެސް، ކްލަބް އެޗްޑީސީ، ޓީމު އެފްއެސްއެމް އަދި ކްލަބް އާސަންދަ މޮޅުވެއްޖެ އެވެ.

ގްރޫޕް އޭގައި ރޭ އެޗްޑީސީން ކްލަބް ފެން ބަލިކުރީ 2-0 އިންނެވެ. އެ ގްރޫޕްގެ އަނެއް މެޗުން، ޓީމު އެލައިޑް އަތުން އާސަންދަ މޮޅުވީ 3-2 އިންނެވެ.

ގްރޫޕް ބީގައި އެފްއެސްއެމް އިން 1-0 އިން އެމްއޭސީއެލް ބަލިކުރިއިރު، އެ ގްރޫޕްގެ އަނެއް މެޗުން، ޓީޓީއެސް އިން ވަނީ، 5-0 އިން ބަރޮސް މޯލްޑިވްސް ބަލިކޮށްފަ އެވެ.

އެޗްޑީސީ އަށް ރޭގެ މެޗުގަައި ލަނޑުތައް ޖަހައިދިނީ، ސާމިން މުހައްމަދު ނަސީރު އާއި އަބްދުﷲ ޝައްފާން (ޝާކާ) އެވެ. މެޗުގެ މޮޅު ކުޅުންތެރިއަކީ، އެޗްޑީސީގެ ކެޕްޓަން، އަބްދުﷲ ޝާފިއު (ޝާއްޕެ) އެވެ.

ފެން ޓީމުގެ ސޮލާހު ކައިރިން ބޯޅަ ހިފައިގެން އެޗްޑީސީގެ ޝާފިއު ދަނީ.--- ފޮޓޯ: އިމޭޖަސް.އެމްވީ

އެ ގްރޫޕްގެ އަނެއް މެޗުގައި، އާސަންދަގެ ލަނޑުތައް ޖެހި އަލީ މީސާގް އީސާ އާއި، މެޗުގެ މޮޅު ކުޅުންތެރިޔާ، އަލީ ހަމްދާން (އައްޔަ) އަދި އަހުމަދު އަބްދުﷲ (ލިލީ) އެވެ. އެލައިޑްގެ ލަނޑުތައް ޖެހީ، އަހުމަދު ޒަމީމް އާއި އަހުމަދު ހުނައިފް އެވެ.

އެފްއެސްއެމް އިން އެމްއޭސީއެލް އަތުން އުނދަގޫ މޮޅެއް ހޯދިއިރު، މި މެޗުގައި އެ ޓީމުގެ ލަނޑު ޖެހީ، އަހުމަދު އައިހަމް (އައިހު) އެވެ. މެޗުގެ މޮޅު ކުޅުންތެރިއަކަށް ހޮވުނީ ވެސް އައިހު އެވެ.

ޓީޓީއެސް އިން މި ފަހަރު ވަރުގަދަކޮށް ފެންނައިރު، އެ ޓީމުގެ ލަނޑުތައް ޖެހީ، މުހައްމަދު އިޔާދު ހަތަރު ގޯލާއި އިބްރާހިމް އާޒިމް ގޯލެކެވެ. މެޗުގެ މޮޅު ކުޅުންތެރިއަކީ، ކުރިން ޓީމު ފެނަކައިގައި ހިމެނިގެން މި މުބާރާތް ކާމިޔާބުކުރި އިޔާދު އެވެ.