ކްލަބް މޯލްޑިވްސް ކްލަސިކް މުބާރާތުގެ ޗެމްޕިއަންކަން، އެމްއެމްއޭ ސޯޝަލް ކްލަބް އަތުން 8-0 އިން މޮޅުވެ، ކުޅިވަރު ވުޒާރާ ކްލަބުން ހޯދައިފި އެވެ.

މިދިޔަ އަހަރު ކްލަބް މޯލްޑިވްސް އިން މުޅިން އަލަށް ފެށި ކްލަސިކް މުބާރާތުގައި އެ ފަހަރު 24 ޓީމު ވާދަކުރި އެވެ. މި ފަހަރުގެ މުބާރާތުގައި، 32 ޓީމުން ވާދަކުރިއިރު، ކުޅިވަރުގެ ވުޒާރާ އިން ވަނީ ކުޅުނު ހަތް މެޗުގެ ތެރެއިން ހަަ މެޗުން މޮޅުވެފަ އެވެ. އެ ޓީމު ބަލިވީ ގްރޫޕް ސްޓޭޖުގައި ހުޅުމާލެ ހޮސްޕިޓަލް އަތުންނެވެ.

ކުޅިވަރުގެ ވުޒާރާ އިން ވަނީ މި މުބާރާތުގެ ޗެމްޕިއަންކަން ފުރަތަަމަ ފަހަރަށް ހޯދި ޓީމު ޑީޖޭއޭ އަތުން ކުއާޓާ ފައިނަލުގައި މޮޅުވެފަ އެވެ. އެންމެ ފަހުގެ ޗެމްޕިއަން، ޑީޖޭއޭ އަތުން ކުޅިވަރުގެ ވުޒާރާ މޮޅުވީ، 7-1 އިންނެވެ، އަދި ކުޅިވަރުގެ ވުޒާރާ އިން ވަނީ ސެމީ ފައިނަލުގައި، ޓީމު ބަދަހި އަތުން، 6-2 އިން މޮޅުވެފަ އެވެ.

ފައިނަލް މެޗުގައި ލަނޑު ޖެހުމަށް ފަހު، ސާޖިދު (ވ) އާއި ނާއިފް އުފާފާޅުކުރަނީ.--- ފޮޓޯ: އިމޭޖަސް،އެމްވީ

މި ކާމިޔާބީގައި އެންމެ ބޮޑު ތަފާތަކީ، ކުޅިވަރު ވުޒާރާ ޓީމުގެ ސާޖިދު އަހުމަދު އިބްރާހިމް އާއި ނާއިފް ޝަފީގު (ސީއާރް3) އެވެ. ފައިނަލް މެޗުގައި ސާޖިދު ވަނީ ހަތަރު ގޯލު ޖަހައިފަ އެވެ. ނާއިފް، ތިން ގޯލު ޖެހިއިރު، އަނެއް ލަނޑު ޖެހީ އާދިލް އަބްދުލް ރަހުމާން އެވެ.

ފައިނަލް މެޗާއި މުބާރާތުގެ މޮޅު ކުޅުންތެރިއާ އަށް ދޭ ކިންގްގެ މަގާމު ދިނީ ސާޖިދު އަށެވެ. އަދި އެންމެ ގިނަ ލަނޑު ޖެހި ކުޅުންތެރިއަކީ، ކުޅިވަރު ވުޒާރާ ޓީމަށް 17 ލަނޑު ޖަހައިދިން ނާއިފް އެވެ.

ނާއިފް އާއި ސާޖިދުގެ އިތުރުން ޑްރީމް ޓީމުގައި ހިމެނެނީ، އެމްއެމްއޭގެ މުހައްމަދު ނާއިފް، ޓީމު ބަަދަހިގެ އާސިފް ހަނީފް އަދި ކްލަބް 220 ގެ ގޯލްކީޕަރު، މުހައްމަދު މިއުރާޝް އަފްރާހު އެވެ. އެންމެ މޮޅު ކޯޗަކީ، ކުޅިވަރު ވުޒާރާ ޓީމުގެ ހުސެއިން ޖަލީލް އެވެ. ފެއާ ޕްލޭ ކުޅުންތެރިއަކީ، ކްލަބް 220 ގެ މުހައްމަދު ނިޝާހު (ނިއްކޮ) އެވެ. ފެއާޕްލޭ ޓީމުގެ ޓްރޮފީ ލިބުނީ، ކްލަބް 220 އަށެވެ.

މީގެ ކުރިން، ކުޅިވަރާއި ޔޫތު މިނިސްޓްރީ އެއްކޮށްލައިގެން، ކްލަބް މޯލްޑިވްސްގައި ވާދަކުރި އެވެ. އެކަމަކު، މިހާރު ސަރުކާރުން މި ދެ ވުޒާރާ ވަކިކޮށްލުމުން، ދެ ޓީމެއްގެ ނަމުގައި މި ފަހަރުގެ ކްލަސިކްގައި ވާދަކުރި އެެވެ. އެ ގޮތުން ސްޕޯޓްސް މިނިސްޓްރީން، ކުޅިވަރު ވުޒާރާ ކްލަބް ކުޅުނުއިރު، ޔޫތުން ނެރުނީ ޔޫތު ރެކްރިއޭޝަން ކްލަބް (ވައިއާރްސީ) އެވެ.