ރާއްޖޭގެ ސައިބާ ސެކިއުރިޓީ ވަރުގަދަ ކުރުމަށް ސަރުކާރުން ކުރަމުންދާ މަސައްކަތްތަކަށް އިތުރު ވަސީލަތްތަކާއި ބައިނަލްއަގުވާމީ އެހީތެރިކަން ބޭނުންވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

އެމެރިކާގެ ނިއުޔޯކުގައި މިހާރު ކުރިއަށްދާ އދ. ގެ އަހަރީ އާންމު މަޖިލީހުގެ ހަވާސާގައި ކުރިއަށްދާ “ސަމިޓް އޮފް ދަ ފިއުޗާ”ގެ ތިންވަނަ ޑައިލޮގުގެ ކޯޗެއާގެ ގޮތުގައި އިންނަވާ ރައީސް ވިދާޅުވީ، އޮންލައިން އެކި ޕްލެޓްފޯމުތަކުގައި ބޭނުންކުރާ އެކައުންޓުތައް ހެކް ކުރުމާއި ހުއްދަ ނެތި މައުލޫމާތު ހޯދުމުގެ އިތުރުންވެސް ޑޭޓާ ޕްރައިވެސީގެ ދާއިރާއިން އެތައް ގޮންޖެހުންތަކެއް މިހާރު ކުރިމަތިވަމުންދާ ކަމަށެވެ.

"މިފަދަ ގޮންޖެހުންތަކަށް އެޑްރެސްކުރުމުގެ ގޮތުން އަޅުގަނޑުމެން ވާނީ ރާއްޖޭގައި ނޭޝަނަލް ސައިބާ ސެކިއުރިޓީ އެޖެންސީ އެއް ގާއިމުކޮށްފަ. ނަމަވެސް، ވިލުންތެރި ސައިބާ ސެކިއުރިޓީ ބިނާރެއް ގާއިމުކުރުމަށް އަޅުގަނޑުމެންނަށް ވަސީލަތްތައް ބޭނުންވޭ،" ރައީސް ވިދާޅުވި އެވެ.

"އެއީ މި ދާއިރާއިން އަޅުގަނޑުމެންގެ އަމިއްލަ ޕްލޭންތަކާއި ވިސްނުންތައް ތަންފީޒުކުރުމަށްޓަކައި. މި ދާއިރާއިން އެމްބިޝަސް މަސައްކަތްތަކެއް ކުރުމަށް ބައިނަލްއަގުވާމީ އެހީތެރިކަމާއި އިންވެސްޓުމަންޓު އަދި އެކުގައި މަސައްކަތް ކުރުމަކީ ލާޒިމުކަމެއް،"

މީގެ އިތުރުން އެމަނިކުފާނު ވަނީ، ޑިޖިޓަލް އިގުތިސޯދީ ވެއްޓެއްގައި ޒުވާނުންނަށް ހާއްސަ، އެ މީހުން ބާރުވެރިކުރުވާނެ ހަރަކާތްތަކެއް ފެށުމަށް ގޮވާލާފަ އެވެ. އަދި ޑިޖިޓަލް ބިނާރެއް ގާއިމުކުރުމަށް 2030 ވަނަ އަހަރަށް ކަނޑައަޅާފައިވާ އެޖެންޑާ ފޯ ސަސްޓެއިނަބަލް ޑިވެލޮޕްމަންޓްގެ އަމާޒުތައް ހާސިލުކުރުމުގެ މުހިންމުކަންވެސް އެމަނިކުފާނު ފާހަގަކުރެއްވި އެވެ.

"އެންމެންގެ ބައިވެރިވުން އޮންނަ، ވިލުންތެރި އަދި އިންސާފުވެރި ޑިޖިޓަލް ދުނިޔެއެއް ބިނާކުރުމުގައި ރާއްޖެއިން ފުރިހަމަ އެއްބާރުލުން ދޭނެ،" ރައީސްގެ ވާހަކަ ނިންމަވާލައްވަމުން ވިދާޅުވި އެވެ.