ރައީސް ޑރ. މުހައްމަދު މުއިއްޒުގެ ލީގަލް ސެކްރެެޓަރީގެ މަގާމުގައި އަދިވެސް ހުންނެވި އައްބާސް ޝަރީފު ޕްރޮސެކިއުޓާ ޖެނެރަލްގެ މަގާމަށް ކުރިމަތިލެއްވީ ރައީސް މުއިއްޒު ނުވަތަ ސިޔާސީ އެހެން ބޭފުޅަކު ވެސް ވިދާޅުވެގެން ނޫން ކަމަށާއި އެ މަގާމަށް ކުރިމަތިލައްވަން ނިންމެވިކަން އެހެން ބަޔަކަށް ނުވެސް އެނގޭނެ ކަމަށް އޭނާ މިއަދު ވިދާޅުވެއްޖެ އެވެ.
ޕްރޮސެކިއުޓާ ޖެނެރަލް ކަމަށް ކުރިމަތިލެއްވި ބޭފުޅުންނާ އިންޓަވިއުކުރަން ރައްޔިތުންގެ މަޖިލީހުގެ ޖުޑީޝަރީ ކޮމިޓީން މިއަދު ބޭއްވި ބައްދަލުވުމުގައި މެންބަރަކު ކުރެއްވި ސުވާލަކަށް ޖަވާބުދެއްވަމުން އައްބާސް ވިދާޅުވީ ޕީޖީގެ މަގާމަށް އޭނާ ކުރިމަތިލައްވާ ވާހަކަ ނޫސްތަކުގައި ޖެހީ ކުށުގެ ރެކޯޑް ސާފުކުރަން ހުށަހެޅުއްވުމުން ކަމަށެވެ. އެ މަގާމަށް ކުރިމަތިލާން އެއްވެސް ބޭފުޅަކު އެދިވަޑައިގެންފައި ނުވާ ކަމަށް ވެސް އޭނާ ވިދާޅުވި އެވެ.
"ނޫހުގައި ޖެހި ހިސާބުން، [އަޅުގަނޑު ޕްރޮސެކިއުޓާ ޖެނެރަލްގެ މަގާމަށް ކުރިމަތިލާކަން] އަޅުގަނޑާ އެކީ މަސައްކަތްކުރައްވާ ކެބިނެޓް މިނިސްޓަރުންނަށް ވެސް އެނގިވަޑައިގަތީ. އަޅުގަނޑަށް މިހާތަނަކަށް، އޭގެން މިނިސްޓަރެއްގެ ފަރާތުން ވެސް އަދި ވަރަށް ސާފުކޮށް، ރައީސުލް ޖުމްހޫރިއްޔާގެ ފަރާތު ވެސް ނޫނިއްޔާ ސިޔާސީ ބޭފުޅެއްގެ ފަރާތުން ވެސް މި މަގާމަށް ކުރިމަތިލާކަށެއް ވަކި ދަންނަވައިފައެއް ނެތް،" އައްބާސް ވިދާޅުވި އެވެ.
އޭނާ ވިދާޅުވި ގޮތުގައި ކުރިމަތިލީ ފަހުން ބައެއް ބޭފުޅުން މަރުހަބާ ވިދާޅުވެ އޭނާއަށް މެސެޖް ކުރެއްވި އެވެ. ޕީޖީގެ މަގާމަށް ކުރިމަތިލެއްވީ އޭނާ ވިދާޅުވި ގޮތުގައި އެމަގާމާ އެކަށީގެންވާ ގާބިލުކަން ހުރުމާ އެކު ގައުމަށް ހިދުމަތް ކުރުމަށެވެ.
އޭނާ މި މޭރުމުން ވާހަކަ ދެއްކެވީ ޕީޖީގެ މަގާމަށް ކުރިމަތިލެއްވީ "ބަޔަކު ބޭނުންވެގެންތޯ" ހިތަދޫ ދެކުނު ދާއިރާގެ އެމްޑީޕީ މެންބަރު އިބްރާހީމް ނާޒިލު ސުވާލުކުރެއްވުމުންނެވެ.
ޕްރޮސެކިއުޓާ ޖެނެރަލްގެ މަގާމަށް ވަޑައިގެންނެވިއްޖެ ނަމަ އެ މަގާމުގެ ޒިންމާ އަދާކުރެއްވުމުގައި މީހެއްގެ މޫނަކަށް ނުބައްލަވާނެ ކަމަށް ވެސް މިއަދުގެ އިންޓަވިއުގައި އައްބާސް ވިދާޅުވި އެވެ.
