ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) ގެ ދަށަށް ފެނަކަ ކޯޕަރޭޝަން ބަދަލު ކުރުމުގެ މަސައްކަތް ފަށައި، ފެނަކައިގެ ޗެއާމަނަކަށް، އެސްޓީއޯގެ ސީއީއޯ އަދި އެމްޑީ ޝިމާދު އިބްރާހިމް މިއަދު އައްޔަނުކޮށްފި އެވެ.

އަންނަ އަހަރުގެ ޖެނުއަރީން ފެށިގެން އެސްޓީއޯގެ ދަށަށް ފެނަކަ ގެނައުމަށް ކުރަން ޖެހޭ މަސައްކަތް ކުރުމަށް ފެނަކަ އާއި ފިނޭންސް މިނިސްޓްރީ އަދި އެސްޓީއޯ ގުޅިގެން ޕްލޭނެއް އެކުލަވާލުމުގެ މަސައްކަތް އަންނަނީ ކުރަމުންނެވެ.

އެ ޕްލޭންގައި ހިމެނެނީ އެސްޓީއޯ، ފިނޭންސް މިނިސްޓްރީ އަދި އެންވަޔަރަމަންޓް މިނިސްޓްރީ ތަމްސީލްކުރައްވާ ފަރާތްތައް ފެނަކައިގެ އިންޓަރިމް ބޯޑުގައި ހިމެނުމަށެވެ.

އެގޮތުން ފެނަކައިގެ ނޮން އެގްޒެކެޓިވް ޑިރެކްޓަރުންގެ ގޮތުގައި އަހުމަދު މާޒިން އަދި މުހައްމަދު ނިޒާމް ވަނީ އައްޔަނުކޮށްފަ އެވެ.

އެ ޕްލޭންގެ ދަށުން މިނިވަން އޮޑިޓް ފާމެއް މެދުވެރިކޮށް ފެނަކައިގެ ހާލަތު ދެނެގަތުމަށް އެ ކުންފުނީގައި މާލީ އަދި ގާނޫނީ ގޮތުން ފުރިހަމަވާން ޖެހޭ ކަންކަން ހެދުމަށާއި, ކުންފުނީގެ މިލްކިއްޔާތުގެ ދަށުގައި ހުރި މުދަލުގެ އަގު ހޯދާނެ އެވެ.

ފެނަކައިގެ މާލީ ހާލަތު ދެނެގަތުމުގެ މަސައްކަތް ކުރިއަށް ގެންދިޔުމަށާއި ކުންފުނި ކުޑަކޮށް އެ ކުންފުނި ހިންގުން ހަރުދަނާ ކުރުމަށް ފިނޭންސްއާއެކު ކުރަން ޖެހޭ މަސައްކަތް ކުރުމަށް އެސްޓީއޯގެ ބޯޑުުން ވަނީ އިރުޝާދު ދީފަ އެވެ.

އޭގެއިތުރުން ފެނަކައިގެ ދަރަނީގެ ބޮޑު ބަޔަކީ އެސްޓީއޯ ގްރޫޕަށް ދައްކަންޖެހޭ ފައިސާ ކަމަށްވާއިރު އެސްޓީއޯއިން ވަނީ އެ ފައިސާ އެ ކުންފުންޏަށް ލިބޭނެ ގޮތުގެ ޕްލޭނެއް ހެދި އެއާ އެއްގޮތަށް ފައިސާ ހޯދުމަށް މަސައްކަތްކޮށް، ފެނަކައަކީ ފައިދާވާ ކުންފުންޏަކަށް ހެދުމަށް މަސައްކަތް ކުރާނެ ކަމުގެ ޔަގީންކަން އަރުވާފަ އެވެ.