ރައީސް ޑރ. މުހައްމަދު މުއިއްޒު އިންޑިއާއަށް ވަޑައިގަންނަވަނީ މާލީ ކާރިސާއިން އަރައިގަތުމަށް ފައިސާގެ އެހީ ހޯދުމަށް މަޝްވަރާ ކުރަން ކަމަށް އެ ގައުމުގެ އޮފިޝަލުންނާ ހަވާލާދީ ބައިނަލްއަގުވާމީ މީޑިއާތަކުން ރިޕޯޓުކޮށްފި އެވެ.

"ވަރަށް އަވަހަށް" ރައީސް މުއިއްޒު އިންޑިއާއަށް ވަޑައިގަންނަވާނެ ކަމަށް ސަރުކާރުން ބުނީ ސެޕްޓެމްބަރު 10، ގަ އެވެ.

"ރައީސުލްޖުމްހޫރިއްޔާ ވަރަށް އަވަހަށް އިންޑިއާއަށް ދަތުރުފުޅެއް ކުރެއްވުމަށް ހަމަޖެހިފައިވޭ. ދިވެހިރާއްޖެ އާއި އިންޑިއާއާ އެކީގައި މިވަގުތު އެންމެ ރަނގަޅު ތާރީހަކީ, އެކަމާ ގުޅޭ މަޝްވަރާތައް ކުރިއަށް މިދަނީ," އެ ދުވަހު ރައީސް އޮފީހުން ބޭއްވި ނޫސްވެރިންގެ ބައްދަލުވުމެއްގައި ތަރުޖަމާނު ހީނާ ވަލީދު ވިދާޅުވި އެވެ.

މި ދަތުރާ ގުޅިގެން "ބްލޫމްބާގް" އަދި އިންޑިއާގެ "އިކޮނޮކިމް ޓައިމްސް" ގައި އެ ގައުމުގެ އޮފިޝަލަކާ ހަވާލާދީ ބުނެފައިވަނީ، ރާއްޖެއަށް އެހީވުމުގެ ގޮތުން ރިޒާވް ބޭންކް އޮފް އިންޑިއާ އިން 400 މިލިއަން ޑޮލަރުގެ ކަރެންސީ ސްވޮޕް ފެސިލިޓީއެއް ހަމަޖެއްސުމުގެ މަސައްކަތް މިހާރު ކުރިއަށްދާ ކަމަށެވެ.

ނަން ހާމަނުކުރަން ޝަރުތުކޮށް ބައިނަލްއަގުވާމީ މީޑިއާތަކަށް މައުލޫމާތު ދިން އިންޑިއާގެ އޮފިޝަލު އިތުރަށް ބުނީ، ނިމިދިޔަ އެމްޑީޕީ ސަރުކާރުން އިންޑިއާއާއެކު 2019 ވަނަ އަހަރު ސޮއިކުރި 800 މިލިއަން ޑޮލަރުގެ ލައިން އޮފް ކްރެޑިޓުގެ ދަށުން ރާއްޖެއަށް ލޯނު ދޫކުރުމަކީ ވެސް އެ ގައުމުން ފޯރުކޮށްދޭން ތައްޔާރަށް އޮތް އެހީއެއް ކަމަށެވެ.

ރަސްމީކޮށް އިންޑިއާގެ މާލީ އެހީއަށް ރައީސް މުއިއްޒުގެ ސަރުކާރުން އެދިފައިވާކަން ސާފެއް ނޫނެވެ. ނަމަވެސް މީޑިއާ ރިޕޯޓުތައް ބުނާ ގޮތުން އެމަނިކުފާނު ދިއްލީއަށް ވަޑައިގެން ކުރައްވާނެ އެންމެ މުހިންމު މަޝްވަރާއަކީ ފައިސާ ހޯދުމުގެ މަޝްވަރާ އެވެ.

މިއީ މި ފަހުން މާލީ މަޝްވަރާތަކަށް ސީދާ ރައީސް ވަޑައިގަންނަވާ ފުރަތަމަ ފަހަރެވެ. ވޭތުވެދިޔަ ދެތިން މަހެއް ތެރޭ ފޮރިން މިނިސްޓަރު މޫސާ ޒަމީރު ވަނީ ޗައިނާ، ބަހްރެއިން، ސައުދީ އަދި ޔޫއޭއީގެ ވެރިންނަށް މާލީ ހާލަތު ބަޔާންކޮށްދީ ރައީސް ފޮނުއްވި ސިޓީއެއް އަރުއްވާފަ އެވެ. އެކަމާ ގުޅޭ މަޝްވަރާތައް ވެސް ކުރެއްވި އެވެ.

ސާކް ފްރޭމްވާކްގެ ދަށުން ރިޒާވް ބޭންކް އޮފް އިންޑިއާއާ އެކީ 400 މިލިއަން ޑޮލަރުގެ ފޮރިން ކަރަންސީ ސްވޮޕް ފެސިލިޓީއެއް ގާއިމުކުރުމަށް ތައްޔާރުވެފައިވާ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އޮގަސްޓު 29، ގައި ވަނީ ބުނެފަ އެވެ.

ރޭޓިން އެޖެންސީ، ފިޗުން ރާއްޖޭގެ ރޭޓިން ދަށްކުރުމާ ގުޅިގެން މަރުކަޒީ ބޭންކުން ނެރުނު ބަޔާނުގައި އެހެން ބުނި ނަމަވެސް އެކަމުގެ ތަފުސީލެއް ފަހުން ނުދެ އެވެ.

ސަރުކާރުން ރައީސްގެ ދަތުރާ ގުޅޭ އިތުރު ތަފުސީލެއް އަދި ހާމައެއް ނުކުރެ އެވެ. އެކުގައި ވަޑައިގަންނަވާ ވަފުދުގައި ހިމެނޭ ބޭފުޅުންނެއް ވެސް ނޭނގެ އެވެ.

ނޮވެމްބަރު، 2023، ގައި ރައީސް މުއިއްޒު ވެރިކަމާ ހަވާލުވެވަޑައިގަތުމަށް ފަހު ޗައިނާއަށް ކުރެއްވި ރަސްމީ ދަތުރުން އެނބުރި މާލެ ވަޑައިގެން އިންޑިއާއަށް ނުސީދާކޮށް ބަހުގެ ހަމަލާތަކެއް ދެއްވި އެވެ. އޭގެ އިތުރުން, ސަރުކާރުގެ އިސް މަގާމުތަކުގައި ތިއްބެވި ބައެއް ބޭފުޅުން މޯދީއަށް ކުޑައިމީސްކޮށް ސޯޝަލް މީޑިއާގައި ކުރި ޕޯސްޓްތަކެއްގެ ސަބަބުން ދެ ގައުމުގެ ގުޅުން ގޯސްވި އެވެ.

ނަމަވެސް, މޯދީ ހުވާ ކުރެއްވުމުގެ ރަސްމިއްޔާތަށް ރައީސް ވަޑައިގެންނެވިފަހުން ދެ ގައުމުގެ ގުޅުން ދަނީ ރަނގަޅުވަމުންނެވެ.

ސަރުކާރުގެ މާލީ ހާލަތު ގޯސްވެފައިވާއިރު ރާއްޖޭން ދައްކަން ޖެހޭ ދަރަނީގެ އެންމެ ބޮޑު ބައެއް ހިއްސާކުރާ އެއް ގައުމަކީ އިންޑިއާ އެވެ. ބެލެވޭ ގޮތުގައި ރައީސްގެ މި ދަތުރުގައި ސަރުކާރުގެ މާލީ ހާލަތު ރަނގަޅު ކުރުމަށް އިންޑިއާގެ އެއްބާރުލުމަށް އެދިވަޑައިގަންނަވާނެ އެވެ.