މާލޭގައި ހިންގާ ގެސްޓްހައުސްގެ ތެރޭގައި ބޮޑެތި ޒަހަމްތަކަކާއެކު ވެއްޓިފައި އޮތް މީހަކަށް އަނިޔާކޮށް މާރާމާރީ ހިންގުމުގެ ތުހުމަތުގައި ދެ މީހުން ހައްޔަރުކޮށްފި އެވެ.

ހެންވޭރުގައި ހުންނަ ގެސްޓްހައުސްއެއްގެ ކޮޓަރިއެއްގައި އުޅޭ މީހެއްގެ ހަބަރެއް ނުވެގެން ގޮސް ބެލިއިރު ޒަހަމްތަކަކާއެކު އޮތް މީހަކު ފެނުނީ ސެޕްޓެމްބަރު 9, ގަ އެވެ. އެ މީހާއަށް ފަރުވާ ދިނީ އައިސީޔޫގަ އެވެ.

ފުލުހުން މިއަދު ހާމަކުރި ގޮތުގައި އެ މައްސަލާގައި ހައްޔަރުކުރީ ކ. ތުލުސްދޫ, ޕެރިސް, ފައުޒާން ޒަރީރު އަދި މއ. ވޮއްކޮޅުގެއާގެ, އަހުމަދު މާޒިން އިބްރާހިމް އެވެ. މި ދެ މީހުންނަކީ ވެސް 23 އަހަރުގެ ޒުވާނުންނެވެ.

ކޯޓު އަމުރެއްގެ ދަށުން މި ދެ މީހުން ހައްޔަރުކުރީ އިއްޔެ އެވެ. އަދި, ބަންދާމެދު ގޮތެއް ނިންމުމަށް ހާޒިރު ކުރުމުން ކޯޓުން ވަނީ ޝަރީއަތް ނިމެންދެން އެ މީހުން ބަންދުކޮށްފަ އެވެ.