މެޑްރިޑް (ސެޕްޓެމްބަރު 12) - ހިލޭ ޓްރާންސްފާއެއްގައި މި ފަހަރު ރެއާލް މެޑްރިޑަށް ސޮއިކުރި ފްރާންސްގެ ކެޕްޓަން، ކީލިއަން އެމްބާޕޭ، 2022 ވަނަ އަހަރު ޝަރުތަކާ އެކު، ލިވަޕޫލަށް ސޮއިކުރަން އެއްބަސްވި ކަމަށް ފްރާންސްގެ ނޫހެއް ކަމަށްވާ ލެކިއުޕޭ އިން ރިޕޯޓްކޮށްފި އެވެ.

އެމްބާޕޭ، 25، އާއި ލިވަޕޫލުން 2022 ވަނަ އަހަރު ގިނަ މަޝްވަރާތަކެއް ކުރިއަށްގެންދިޔައިރު، ލިވަޕޫލް ހިންގާ ފެންވޭ ސްޕޯޓްސް ގްރޫޕްގެ ވެރިޔާ، ޖޯން ހެންރީ ވަނީ އެމްބާޕޭގެ އާއިލާއާ ވެސް ބައްދަލުކޮށްފަ އެވެ. އެ ގޮތުން، 2022 ވަނަ އަހަރު ލިވަޕޫލުން ނިންމީ އެމްބާޕޭ ގަންނަން 200 މިލިއަން ޔޫރޯގެ ބިޑެއް ކުރުމަށް ކަމަށާއި އެ ޑީލަށް އެމްބާޕޭ ރުހުނީ ޝަރުތަކާ އެކު ކަމަށް ވެސް ލެކިއުޕޭ އިން ރިޕޯޓްކޮށްފައިވެ އެވެ.

އެ ޝަރުތަކީ، އެމްބާޕޭ އަށް ވަކި ހިސާބަކުން ރެއާލް މެޑްރިޑަށް ބަދަލުވެވޭ ގޮތަށް، ލިވަޕޫލާ އެކު ސޮއިކުރާ ކޮންޓްރެކްޓްގައި މާއްދާއެއް ހިމެނުމަށް ފަހު އެވެ.

މި ހުރިހާ މަޝްވަރާއެއް ކުރިއަށްދަނިކޮށް ޑީލްގެ ވާހަކަތައް ހުއްޓުނީ، ޕީއެސްޖީން އެމްބާޕޭ ވިއްކާލަން ކީ އަގު އަނެއްކާ ވެސް ބޮޑުކުރަން ފެށުމުން ކަމަށް އެ ރިޕޯޓްގައިވެ އެވެ.

މީގެ ކުރިން، 2020 ވަނަ އަހަރު އެމްބާޕޭ ވަނީ ލިވަޕޫލްގެ ކުޅުމަށާއި އެ ޓީމުގެ އޭރުގެ ކޯޗު ޔާގަން ކްލޮޕްގެ ފިލޯސަފީ އަށް ތައުރީފުކޮށް ވާހަކަ ދައްކައިފަ އެވެ. އެމްބާޕޭއާ ބެހޭގޮތުން، ކްލޮޕް ވެސް ވަނީ ވާހަކަ ދައްކައިފަ އެވެ. އެ ގޮތުން، ކްލޮޕް ބުނީ، އެމްބާޕޭ ލެވަލްގެ ކުޅުންތެރިއަކު ލިވަޕޫލުން ސޮއިކުރާނަމަ އަމަލުކުރަން ޖެހޭނީ އެއްވެސް އުސޫލެއް ހަަމައެެއް ނެތި، ހަރަދުކުރާ ކްލަބެއް ގޮތަށް ކަމަށާއި އެއީ އޭނާ ވިސްނާ ގޮތެއް ނޫން ކަމަށެވެ.

ގިނަ އަހަރުތަކެއްގެ އިންތިޒާރަށް ފަހު، އެމްބާޕޭ މި ފަހަރު ރެއާލަށް ސޮއިކުރީ ޕީއެސްޖީގެ ކޮންޓްރެކްޓް ނިންމާލުމަށް ފަހު އެވެ. އެމްބާޕޭ، ރެއާލާ އެކު ހެދީ ފަސް އަހަރުގެ ކޮންޓްރެކްޓެކެވެ.