ކްލަބް މޯލްޑިވްސް ކްލަސިކްގައި ރޭ ފޯރިގަދަ ކުރިމަތިލުމަކަށް ފަހު، 6-5 އިން ޓްރާންސްޕޯޓް ރެކްރިއޭޝަން ކްލަބް ބަލިކޮށް، ފެހި ފަހި ކްލަބުން ގަދަ 16 ބުރުގެ ޖާގަ ހޯދައިފި އެވެ.

ގްރޫޕް އޭގައި ރޭ ކުޅުނު އަނެއް މެޗުން، ރައްޔިތުންގެ މަޖިލީހުގެ ޓީމު، ޕެމާ އިން މޮޅުވިނަމަ، ފެހި ފަހި ކްލަބް މޮޅުވެގެން ވެސް ގަދަ 16 އަށް ނުދެވޭނެ އެވެ. އެކަމަކު، ޕެމާގެ މައްޗަށް ތައުލީމީ ގުޅުމުން ވަނީ 3-0 އިން ކުރިހޯދައިފަ އެވެ.

ތައުލީމީ ގުޅުން ގްރޫޕް އޭގެ އެއް ވަނަ ހޯދީ ކުޅުނު ތިން މެޗުން ވެސް މޮޅުވެގެންނެވެ. މިދިޔަ އަހަރުގެ ގްރޫޕް ސްޓޭޖުގައި ތައުލީމީ ގުޅުމަށް ލިބުނީ އެންމެ ޕޮއިންޓެކެވެ. އެކަމަކު، މި ފަހަރު އެ ޓީމުން ނޮކައުޓަށް ދިޔައީ ފުރިހަމަ ރެކޯޑަކާ އެކު އެވެ. ގްރޫޕްގެ ދެ ވަނަ ހޯދި ފެހި ފަހި ކްލަބަށް ހަތަރު ޕޮއިންޓް ލިބުނުއިރު، ތިން ވަނަ ހޯދި ޕެމާ އަށް ދެ ޕޮއިންޓް އަދި ފުލުގައި ނިންމި ޓްރާންސްޕޯޓަށް ވަނީ އެއް ޕޮއިންޓް ލިބިފަ އެވެ.

މިދިޔަ އަހަރު ޓްރާންސްޕޯޓުން ސެމީގައި ކުޅުނުއިރު، ޕެމާ އިން ވަނީ ގަދަ 16 ގައި ވާދަކޮށްފަ އެވެ.

ޓްރާންސްޕޯޓަށް ރޭގެ މެޗުގައި ލަނޑުތައް ޖަހައިދިނީ، މުހައްމަަދު އާރިފް ދެ ގޯލާއި މުހައްމަދު ފަޒީލް، އަލީ އަމީން އަދި މަޒުހަރު އަބްދުﷲ (މަޒޭ) އެވެ. ފެހި ފަހި ޓީމުގެ ލަނޑުތައް ޖެހީ، އަބްދުﷲ އަބްދުލް ކަރީމް ދެ ގޯލާއި އީމާން އިސްމާއިލް، މައުމާން އަބްދުލް ރަޝީދު، އަހުމަދު މުއާދު އަދި މުހައްމަދު އަބްދުﷲ އެވެ.

އެސްޑީއެފްސީ އާއި ބަދަހި ކުޅުނު މެޗުގެ ތެރެއިން.---- ފޮޓޯ: އިމޭޖަސް،އެމްވީ

ޕެމާ ކޮޅަށް ތައުލީމީ ގުޅުމުގެ އަލީ އިފުރާދު އާއި އާތިފް މުހައްމަދު ލަނޑު ޖެހިިއިރު، އަނެއް ގޯލަކީ ޕެމާގެ މާން އަތުން ބައިކޮޅަށް ވަން ގޯލެކެވެ.

ގްރޫޕް ބީގެ މެޗުތަކަށް ރޭ ނުކުތްއިރު ވެސް، ޓީމު ބަދަހި އާއި ކްލަބް އެސްޑީއެފްސީ އޮތީ ގަދަ 16 ޔަގީންކޮށްފަ އެވެ. ރޭ ބަދަހި އާއި އެސްޑީއެފްސީ ވެގެންދިޔައީ، ގްރޫޕް އެއް ވަނަ ކަނޑައަޅާ މެޗަށެެވެ. އެ މެޗުން، 2-1 އިން މޮޅުވެ، ބަަދަހި ޓީމު ވަނީ، ކުޅުނު ތިން މެޗުން ވެސް މޮޅުވެ، ނުވަ ޕޮއިންޓް ހޯދައިފަ އެވެ. އެސްޑީއެފްސީ ދެ ވަނަ ހޯދީ ހަ ޕޮއިންޓާ އެކު އެވެ.

ބަދަހި ޓީމުގެ ލަނޑުތައް ޖެހީ، އަލީ ރިޒްވީން އެވެ. އަދި އެސްޑީއެފްސީގެ ލަނޑު ޖެހީ އިބްރާހިމް އަޒްހަމް އެވެ.

މި ގްރޫޕްގެ އަނެއް މެޗުގައި، ހާރިޖީން ވަނީ 4-2 އިން އެގްރި ރެކްރިއޭޝަން ކްލަބް ބަލިކޮށްފަ އެވެ. މިދިޔަ އަހަރުގެ ސެމީ ފައިނަލުގައި ކުޅުނު ހާރިޖީ ޓީމު މި ފަހަރު ގްރޫޕް ސްޓޭޖުން ކެޓިއިރު، ކުޅުނު ތިން މެޗުގެ ތެރެއިން މޮޅުވީ، ރޭގެ މެޗުންނެވެ. އެގްރި ކެޓީ ތިން މެޗުން ވެސް ބަލިވެ، ޕޮއިންޓެއް ނުލިބި އެވެ.

ހާރިޖީ ޓީމަށް ރޭގެ މެޗުގައި ލަނޑުތައް ޖަހައިދިނީ، ހުސެއިން އިބްރާހިމް ދެ ގޯލާއި އަލީ ޒާހިރު އަދި އަހުމަދު ފިރާޒް މޫސާ އެވެ. އެގްރި ޓީމުގެ ލަނޑުތައް ޖެހީ އަޝްރަފް އަބްދުލް ސައްތާރު އާއި މުހައްމަދު އުނައިސް އެވެ.