ކްލަބް މޯލްޑިވްސް ކްލަސިކްގައި ރޭ ކުޅުނު މެޗުން 5-3 އިން ކުޅިވަރު ވުޒާރާ ކްލަބް ބަލިކޮށް، ހުޅުމާލެ ހޮސްޕިޓަލް މުބާރާތުގެ ގަދަ 16 ބުރުން ޖާގަ ޔަގީންކޮށްފި އެވެ.

ރޭގެ މި ނަތީޖާއާ އެކު، ގްރޫޕް ޖީގެ އެއް ވަނައިގައި އޮތް ހުޅުމާލެ ހޮސްޕިޓަލަށް ވަނީ ހަ ޕޮއިންޓް ލިބިފަ އެވެ. ދެ ވަނައިގައި އޮތް ކުޅިވަަރު ވުޒާރާ ކްލަބާއި ތިން ވަނައިގައި އޮތް ދާހިލީ ކްލަބް އަށް ތިން ޕޮއިންޓް ލިބިފައިވާއިރު، ފުލުގައި އޮތް ޓްރޭޑްނެޓް ވަނީ ދެ މެޗުން ބަލިވެ ކަޓައިފަ އެވެ.

މި ގްރޫޕްގެ ފަހު މެޗުތަކުގައި، ހުޅުމާލެ ހޮސްޕިޓަލް ކުޅޭނީ ޓްރޭޑްނެޓްއާ އެވެ. އަދި ދާހިލީ އާއި ކުޅިވަރު ވުޒާރާ އަނެއް މެޗުގައި ބައްދަލުކުރާއިރު، އެ މެޗު އެއްވަރުކޮށްލަައިގެން ވެސް ކުޅިވަރު ވުޒާރާ އަށް ގަދަ 16 ގެ ޖާގަ ލިބޭނެ އެވެ.

ހުޅުމާލެ ހޮސްޕިޓަލް ޓީމުގެ ހަސަން ސޮލާހު ހެޓްރިކެއް ހެދިއިރު، އަލީ ޝާޒް ހިލްމީ ވެސް ވަނީ ލަނޑު ޖަހައިފަ އެވެ. ކުޅިވަރު ވުޒާރާގެ ލަނޑުތައް ޖެހީ ސާޖިދު އަހުމަދު އިބްރާހިމް ދެ ގޯލާއި މޫސާ ނަދީމް ގޯލެކެވެ.

މީރާ ޓީމުގެ ނާހިލް ލަނޑު ޖެހުމަށް ފަހު އުފާފާޅުކުރަނީ.--- ފޮޓޯ: އިމޭޖަސް.އެމްވީ

ހުޅުމާލެ ހޮސްޕިޓަލް އަކީ ގަދަ 16 ބުރު ޔަގީންކުރި ހަތް ވަނަ ޓީމެވެ. މީގެ ކުރިން، ގަދަ 16 ޔަގީންކުރި ޓީމުތަކަކީ، ގްރޫޕް އޭގައި ކުޅުނު ދެ މެޗުން މޮޅުވި، ތައުލީމީ ގުޅުމާއި ގްރޫޕް ބީގައި ފުރަތަމަ ދެ މެޗުން މޮޅުވި، ޓީމު ބަދަހި އާއި ކްލަބް އެސްޑީއެފްސީ، ގްރޫޕް ޑީން ފުރަތަމަ ދެ މެޗުން މޮޅުވި، ޓީމު ޑީޖޭއޭ އާއި ޓީމު މާލެ ސިޓީ ކައުންސިލް އަދި ގްރޫޕް އެޗް އިން ކުޅުނު ދެ މެޗުން މޮޅުވި، ކްލަބް 220 އެވެ.

ޓީމު ދަރުމަވަންތަ އިން ވަނީ ރޭ ގްރޫޕް އީގައި ކުޅުނު މެޗުން 5-3 އިން ހިޔާ ކްލަބް ބަލިކޮށްފަ އެވެ. ދަރުމަވަންތަ ޓީމުގެ އިސްމާއިލް އަރީޝް ދެ ގޯލު ޖެހިއިރު، މުހައްމަދު މުނާޒު، އިބްރާހިމް ސޯލިހު އަދި ސަހުބާން ރަޝީދު ވަނީ ލަނޑު ޖަހައިފަ އެވެ. ހިޔާ ކްލަބްގެ ލަނޑުތައް ޖެހީ، އިބްރާހިމް އައުރާފް ދެ ގޯލާއި އަލީ މުހައްމަދު އެވެ.

ގްރޫޕް އެފްގައި ދެ މޮޅުވުން މަޖުބޫރު މެޗަކަށް ނުކުމެ، މީރާ ރެކްރިއޭޝަން ކްލަބުން ވަނީ 7-2 އިން ސިވިލް ކޯޓު ބަލިކޮށްފަ އެވެ. މި މެޗުގައި މީރާގެ އަބްދުލް ރަހުމާން ތިބްޔާން އަލީ ސައީދު ވަނީ ހެޓްރިކެއް ހަދައިފަ އެވެ. އެ ޓީމުގެ އަނެއް ލަނޑުތައް ޖެހީ، މުހައްމަދު ނާވީ ނަޒީރު، ރިމާން އަލީ، ނާހިލް ނައީމް އަދި އަހުމަދު އާސިމް އެވެ. ސިވިލް ކޯޓުގެ ލަނޑުތައް ޖެހީ، އަލީ ފަޒްލީން އާއި ހުސެއިން ޝަމީމް އެވެ.

ގްރޫޕް އެޗްގައި ޓްރޭޑް ކްލަބުން ވަނީ 4-2 އިން ހަޔާ އެޑިއުކޭޝަން ބަލިކޮށްފަ އެވެ. ޓްރޭޑް ކްލަބްގެ ހަސަން އަޒްވާން ދެ ގޯލު ޖެހިއިރު، އަނެއް ލަނޑުތައް ޖެހީ މުހައްމަދު އަސީލް އާއި އަހުމަދު އާލިމް އެވެ. ހަޔާ އެޑިއުކޭޝަންގެ ގޯލުތައް ޖެހީ އަހުމަދުﷲ މައުތޫފް އިބްރާހިމް އާއި އައިޝް އަހުމަދު އެވެ.