ކްލަބް މޯލްޑިވްސް ކްލަސިކްގައި ރޭ ކުޅުނު މެޗުތަކަށް ފަހު، ކްލަބް މޯލްޑިވްސް ކްލަސިކް މުބާރާތުގެ ގަދަ 16 ބުރުން ހަ ޓީމެއް ޖާގަ ޔަގީންކޮށްފި އެވެ.

އެއީ ގްރޫޕް އޭގައި ކުޅުނު ދެ މެޗުން މޮޅުވި، ތައުލީމީ ގުޅުމާއި ގްރޫޕް ބީގައި ފުރަތަމަ ދެ މެޗުން މޮޅުވި، ޓީމު ބަދަހި އާއި ކްލަބް އެސްޑީއެފްސީ، ގްރޫޕް ޑީން ފުރަތަމަ ދެ މެޗުން މޮޅުވި، ޓީމު ޑީޖޭއޭ އާއި ޓީމު މާލެ ސިޓީ ކައުންސިލް އަދި ގްރޫޕް އެޗް އިން ކުޅުނު ދެ މެޗުން މޮޅުވި، ކްލަބް 220 އެވެ.

އިއްޔެ ހަވީރު ކްލަބް 220 ކުޅުނު މެޗުން ވަނީ 4-0 އިން ކްލަބް އެންޑީއޭ ބަލިކޮށްފަ އެވެ. ކްލަބް 220ގެ ލަނޑުތައް ޖެހީ، މައްސޫދު ޝަބީން ދެ ގޯލާއި އަހުމަދު ސާމިހު އަދި އަލީ އިކްރާމް (އައްޔަ) އެވެ. ކްލަބް 220 ދެ މެޗުން މޮޅުވެ، ހަ ޕޮއިންޓް ހަމަކުރިއިރު، ދެން އެ ގްރޫޕުން އިތުރު ދެ ޓީމަކަށް ހަ ޕޮއިންޓް ހޯދުމުގެ ފުރުސަތު ނެތުމާ އެކު، ބާކީ މެޗެއް އޮއްވައި، އެ ޓީމަށް އަނެއް ބުރު ޔަގީންވީ އެވެ.

ހަވީރު ކުޅުނު އަނެއް މެޗުގައި ދާހިލީ ކްލަބް ވަނީ 2-1 އިން ޓްރޭޑްނެޓް ބަލިކޮށްފަ އެވެ. ދާހިލީގެ ލަނޑުތައް ޖެހީ އިޒާން އިސްމާއިލް ޝަރާފް އާއި އަހުމަދު ޝާމިލް އެވެ. ޓްރޭޑްނެޓްގެ ގޯލު ޖެހީ މުހައްމަދު އައުސް އެވެ.

އެގްރިއާ ދެކޮޅަށް ކުޅުނު މެޗުގައި ބަދަހި ޓީމުގެ އާސިފް ބޯޅަ ފޮނުވާލަނީ.--- ފޮޓޯ: އިމޭޖަސް.އެމްވީ

ރޭ ކުޅުނު މެޗުތަކަށް ބަލާއިރު، ޓީމު ބަދަހިން ވަނީ އެގްރި ރެކްރިއޭޝަން ކްލަބް އަތުން 7-0 އިން މޮޅުވެފަ އެވެ. މި މެޗުގައި ބަދަހި ޓީމުގެ އާދަމް އަޒުހާން އާއި އާސިފް ހަނީފް ދެ ގޯލު ޖެހިއިރު، އަނެއް ލަނޑުތައް ޖެހީ އަލީ ރިޒްވީން، އިބްރާހިމް މުއާޒް އަދި އިބާދު އެވެ.

ބަދަހިގެ މި ނަތީޖާއާ އެކު، ފުރަތަމަ ދެ މެޗުން މި މި ގްރޫޕްގައި މޮޅުވެފައި އޮތް އެސްޑީއެފްސީ އަށް ވެސް އަނެއް ބުރު ޔަގީންވީ އެވެ. މިއީ އެސްޑީއެފްސީން ކްލަސިކްގައި ކުޅޭ ފުރަތަމަ ފަހަރެެވެ.

ޓީމު ޕެމާ (ރައްޔިތުންގެ މަޖިލީސް ޓީމު) ދެ ވަނަ މެޗުން ވެސް ވަނީ އެއްވަރުވެފަ އެވެ. ރޭ އެ ޓީމު އެއްވަރުވީ ފެހި ފަހި ކްލަބާ އެވެ. އެއީ 2-2 އިންނެވެ. މި މެޗުގައި، ޕެމާގެ ހަސަން އަދުހަމް ދެ ލަނޑު ޖެހިއިރު، ފެހިފަހި ކްލަބްގެ އަހުމަދު މުއާދު އާއި އަބްދުﷲ އަބްދުލް ކަރީމް ވަނީ ލަނޑު ޖަހައިފަ އެވެ.

މި މެޗު އެއްވަރުވެގެން ނިމުމުން، މި ގްރޫޕްގެ ފުރަތަމަ ދެ މެޗުން މޮޅުވި، ތައުލީމީ ގުޅުމަށް ވަނީ އަނެއް ބުރުގެ ޖާގައެއް ޔަގީންވެފަ އެވެ.

ސިޓީ ކައުންސިލް ޓީމުގެ ކުޅުންތެރިން ލަނޑު ޖެހުމަށް ފަހު އުފާފާޅުކުރަނީ.---- ފޮޓޯ: އިމޭޖަސް.އެމްވީ

ގްރޫޕް ޑީގައި، މާލެ ސިޓީ ކައުންސިލުން ރޭ ވަނީ 3-0 އިން ހެލްތު ރެކްރިއޭޝަން ކްލަބް ބަލިކޮށްފަ އެވެ. ސިޓީ ކައުންސިލްގެ ލަނޑުތައް ޖެހީ އިބްރާހިމް އާގިލް ދެ ގޯލާއި އިސްމާއިލް މުސަބް ނަޖީބް އެވެ. މި މެޗުން ސިޓީ ކައުންސިލް މޮޅުވުމާ އެކު، ފުރަތަމަ ދެ މެޗުން މޮޅުވި، އެންމެ ފަހުގެ ޗެމްޕިއަން، ޑީޖޭއޭ އަށް ވެސް އަނެއް ބުރުގެ ޖާގަ ލިބުނީ އެވެ.

ގްރޫޕް ސީގައި ރޭ ކްލަބް ބިނާރާ އިން ވަނީ ފިޝަރީސް ރެކްރިއޭޝަން ކްލަބް 4-1 އިން ބަލިކޮށް، ގަދަ 16 ގެ ޖާގައެއް ކަށަވަރުކުރުމާ ގާތަށް ޖެހިލައިފަ އެވެ. ބިނާރާ ފުރަތަމަ ދެ މެޗުން ވަނީ މޮޅުވެފަ އެވެ. ރޭގެ މެޗުގައި ބިނާރާގެ ލަނޑުތައް ޖެހީ މުހައްމަދު ޝައުޔާ ދެ ގޯލާއި އަބްދުލް ބާސިތު ރަޝީދު އަދި އަހުމަދު ޝާމް އެވެ. ފިޝަރީސްގެ ލަނޑު ޖެހީ، މިނިސްޓަރު، އަހުމަދު ޝިޔާމް އެވެ.