ރޯމް، އިޓަލީ (ސެޕްޓެމްބަރު 6) - ރޯމާގެ ކޯޗު ޑަނިއޭލޭ ޑި ރޮސީގެ އެދުމަށް، ޖަރުމަނުގެ ތަޖުރިބާކާރު ޑިފެންޑަރު، މެޓް ހަމެލްސް ރޯމާ އަށް ސޮއިކޮށްފި އެވެ.

މިދިޔަ ސީޒަނަށް ފަހު، ބޮރޫޝިއާ ޑޯޓްމަންޑް ދޫކޮށްލަން ހަމެލްސް، 35، ނިންމީ އޭނާ އަށް އެ ކްލަބުން އާ ކޮންޓްރެކްޓެއް ދޭން އެއްބަސްނުވުމުންނެވެ.

މިދިޔަ ސީޒަނުގައި ޑޯޓްމަންޑުން ޗެމްޕިއަންސް ލީގުގެ ފައިނަލަށް ދަތުރުކުރިއިރު، މޮޅަށް ކުޅުނު ހަމެލްސް އަށް ޖަރުމަނު ގައުމީ ޓީމުގެ ޔޫރޯ ސްކޮޑުން ވެސް ފުރުސަތު ނުލިބުނެވެ.

ހިލޭ ޓްރާންސްފާއެއްގައި ހަމެލްސްގެ ސޮއި ހޯދަން، ސްޕެއިނުގެ ރެއާލް ބެޓިސް، ރެއާލް ސޮސިއެޑާޑްގެ އިތުރުން، އިނގިރޭސި ދެ ކްލަބް ކަމަށްވާ ބްރައިޓަން ހޯލްވް އެންޑް އަލްބިއަން އާއި ވެސްޓް ހޭމް ޔުނައިޓެޑުން ވެސް މަސައްކަތްކުރި އެވެ.

އެކަމަކު، ފަހު ވަގުތު ހަމެލްސް ސޮއިކުރީ އެއް އަހަރުގެ ޑީލެއްގައި ރޯމާއާ އެކު އެވެ. ރޯމާގެ ކޯޗު ޑި ރޮސީއާ މަޝްވަރާ ކުރުމަށް ފަހު، ހަމެލްސް އެ ކްލަބަށް ބަދަލުވީ، ނިސްބަތުން ބަލާއިރު ކުޑަ މުސާރަ އަކަށެެވެ. އެއީ ސީޒަނަށް ޖުމްލަ އެކު، ޓެކްސް އަށް ފަހު، ތިން މިލިއަން ޑޮލަރު ލިބޭ ގޮތަށެވެ.

ރޯމާ އިން ވަނީ ހަމެލްސްއާ އެކު ހެދި ކޮންޓްރެކްޓްގައި، ހާއްސަ މާއްދާއެއް ހިމަނައިފަ އެވެ. އެއީ ހަމެލްސް އާއި ރޯމާގެ މެނޭޖްމަންޓަށް އެއްބަސްވެވޭ ކަންކަން ފުރިހަމަ ވެއްޖެނަމަ، އިތުުރު އެއް އަހަރަށް ކޮންޓްރެކްޓް އާ ކުރެވޭ ގޮތަށެވެ.

މިއީ، ޑޯޓްމަންޑާއި ބަޔާން މިއުނިކް ފިޔަވައި، އެހެން ކްލަބަކުން ހަމެލްސް ފެންނަ ފުރަތަމަ ފަހަރެވެ.