މާލެ ވޯޓާ އެންޑް ސްވަރޭޖް ކޮމްޕެނީ (އެމްޑަބްލިއުއެސްސީ) ގެ ވޯޓާ ސެކިއުރިޓީ ޕްލޭންގެ ދަށުން ހުޅުމާލޭގައި 10،000 ޓަނުގެ ފެން ރައްކާކުރެވޭ ތާނގީއެއް ބެހެއްޓުމުގެ އަމަލީ މަސައްކަތް ފަށައިފި އެވެ.

އެމްޑަބްލިއުއެސްސީ އިން މިއަދު ބުނީ، މި ތާނގީ ބެހެއްޓުމުގެ އަމަލީ މަސައްކަތް ފެށުމަށް މިއަދު ހުޅުމާލޭގައި ހުންނަ އޮޕަރޭޝަން ސެންޓަރުގައި ހާއްސަ ރަސްމިއްޔާތެއް ބޭއްވި ކަމަށެވެ. މި ރަސްމިއްޔާތުގައި ކޮންސްޓްރަކްޝަން މިނިސްޓަރު އަބްދުﷲ މުއްތަލިބު އަދި އެ ކުންފުނީގެ މެނޭޖިން ޑިރެކްޓަރު އަބްދުﷲ މަތީނުގެ އިތުރުން ކުންފުންޏާއި ވުޒާރާގެ އިސްވެރިން ބައިވެރިވި އެވެ.

މިއަދު އަމަލީ މަސައްކަތް ފެށި މި މަޝްރޫއުގެ ދަށުން ހުޅުމާލޭގައި މި ތާނގީ ރާވާ ބެހެއްޓުމުގެ މަސައްކަތް ކުރާނީ ސަރުކާރުގެ ފެން ކުންފުނި ކަމަށްވާ އެމްޑަބްލިއުއެސްސީގެ މުވައްޒަފުންނެވެ. މި ތާނގީއާއެކު ހުޅުމާލޭގައި ފެން ރައްކާކުރެވޭ މިންވަރު 22،600 ޓަނަށް އިތުރު ވާނެ ކަމަށް އެ ކުންފުނިން ބުނެ އެވެ.

މި މަޝްރޫއަށް ޖުމްލަ 34.7 މިލިއަން ރުފިޔާ ހަރަދުވާނެ ކަމަށް އަންދާޒާކޮށްފައިވާއިރު އަމަލީ މަސައްކަތް ނިމޭނެ ކަަމަށް ލަފާކޮށްފައިވަނީ ފެބްރުއަރީ، 2025، ގެ ނިޔަލަށެވެ.

"މި މަޝްރޫޢުގެ ސަބަބުން ހުޅުމާލޭގައި ފެން ރައްކައުކުރެވޭ މިންވަރު އިތުރުކޮށް. މެދުކެނޑުމެއް ނެތި، ދެމެހެއްޓެނިވި ގޮތެއްގައި ސާފު ބޯފެން ފޯރުކޮށްދިނުމަށް މިކުންފުނިން ކުރަމުން ގެންދާ މަސައްކަތްތައް އިތުރަށް ހަރުދަނާވެގެން ދާނެ،" އެމްޑަބްލިއުއެސްސީން ނޫސްތަކަށް ދިން މައުލޫމާތުގައި ބުނެފައިވެ އެވެ.

މި ތާނގީގެ އިތުރުން، ސިނަމާލެ ބުރިޖުގައިވާ ފެންހޮޅި މެދުވެރިކޮށް މާލެ އާއި ހުޅުމާލޭގެ ފެނުގެ ވިއުގަ ގުޅުވާލުމުގެ މަސައްކަތާއި މާލޭގެ 378 ނަންބަރު ކޮށީގައި ފެން ރައްކާކުރާ އިތުރު ދެ ތާނގީ ބެހެއްޓުމުގެ މަސައްކަތް ކުރަމުންދާ ކަމަށް ވެސް އެ ކުންފުނިން ބުނެފައިވެ އެވެ.