އިސްތަންބޫލް، ތުރުކީ (ސެޕްޓެމްބަރު 3) - ނަޕޯލީ ޓީމުން އެކަހެރި ކުރި ނައިޖީރިއާގެ ފޯވާޑް ވިކްޓަ އޮސީމެން ލޯން ޑީލެއްގެ ދަށުން ތުރުކީގެ ގަދަބާރު ގަލަސަތަރާއި އަށް ބަދަލުވާ ގޮތަށް ހަމަޖެހިއްޖެ އެވެ.

މީގެ އަށް މަސް ކުރިން، އޮސީމެން، 24، ވަނީ ނަޕޯލީއާ އެކު، 2026 ވަނަ އަހަރުގެ ޖޫން މަހުގެ ނިޔަލަށް ކޮންޓްރެކްޓް އާ ކޮށްފަ އެވެ.

އެކަމަކު، މިދިޔަ ސީޒަން ނިމުމުން ނަޕޯލީނ ދޫކޮށްލައި އާ ޓީމަކާ ގުޅެން އޮސީމެން ނިންމި އެވެ.

އޮސީމެން ހޯދަން އެންމެ ބޮޑަށް މަސައްކަތްކުރީ ޗެލްސީ އާއި ސައުދީގެ އަލް އަހްލީންނެވެ. އެކަމަކު، އޭގެއިން އެއްވެސް ޓީމަކަށް އޮސީމެން ބޭނުންވާ ކަންކަން ކޮންޓްރެކްޓްގައި ނުހިމެނޭތީ، ޑީލް ކުރިއަށްނުދިޔަ އެެވެ. ނަޕޯލީން އޮސީމެން ދޫކޮށްލަން ނިންމި ނަމަވެސް އޭނާގެ އަމިއްލަ ކަންތައްތަކެއްގެ ސަބަބުން، އެ ޓްރާންސްފާ ނުހިނގި އެވެ. އެކަމާ ހިތްހަމަނުޖެހިގެން ނަޕޯލީން ވަނީ ޓީމުގެ ހަރަކާތްތަކުން، އޮސީމެން ބާކީކޮށް ވަކިން ޓްރެއިނިން ގެންދަން އަންގައިފަ އެވެ.

ނަޕޯލީގެ މި ނިންމުމާ އެކު، ނުކުޅެ ހުންނަން ޖެހޭ މުއްދަތެއް ކުރިމަތިވެދާނެތީވެ، އޮސީމެން ވަނީ ތުރުކީގެ ގަލަސަތަަރާއިއާ އެކު މަޝްވަރާކޮށް ލޯން ޑީލަކަށް އެއްބަސްވެފަ އެވެ.

ރިޕޯޓްތައް ބުނާގޮތުން، ގަލަސަތަރާއި އިން އޮސީމެން ގެންދަނީ ހަަމައެކަނި މި ސީޒަނަށެެވެ. ލޯން އެއްބަސްވުން ނިމުމުން ދާއިމީ ކުރެވޭ ބައެއް ކޮންޓްރެކްޓްގައި ނުހިމެނެ އެވެ.

އޮސީމެން ޓީމު ދޫކޮށްލާނެ ކަމަށް ބަލައި، ނަޕޯލީން ވަނީ 34 މިލިއަން ޑޮލަރު ދީފައި ޗެލްސީން ރޮމެލޫ ލުކާކޫ ގަނެފަ އެވެ.