ހ. ޝީރީންވިލާ ގައި އަނިޔާވެރި ގޮތަކަށް މަރާލާފައި އޮއްވައި ފެނުނު ޝިއާއު މުހައްމަދު ސައީދުގެ މަރުގެ މައްސަލާގައި ދައުވާ އުފުލާފައިވާ އަލީ ޝާހިލް ބޭނުންވަނީ ދިފާއީ ވަކީލަކާ ނުލައި ޝަރީއަތް ހިންގަން ކަމަށް އޭނާ ކޯޓުގައި ބުނެފި އެވެ.

ކްރިމިނަލް ކޯޓުން މީޑިއާތަކަށް ފޮނުވި މެސެޖެއްގައި ބުނީ ދިފާއީ ވަކީލަކާ ނުލައި ޝަރީއަތް ހިންގަން ޝާހިލް ބޭނުންވާތީ އެ ފުރުސަތު ފަހިކޮށްދޭން މަސައްކަތް ކުރަމުންދާ ކަމަށެވެ. މީގެ ކުރިން ޝާހިލް ވަނީ ތިން ދިފާއީ ވަކީލުން އައްޔަންކޮށްފަ އެވެ. ނަމަވެސް ޝާހިލް ވަކީލުން އެއްބާރުލުން ނުދޭތީ މައްސަލަ އޮތީ މަޑުޖެހިފަ އެވެ.

ޝާހިލް ކުރިން އައްޔަން ކުރި ދިފާއީ ވަކީލުންނަށް ހަވާލުކުރި ލިޔުންތައް ހޯދުމަށްފަހު ޝާހިލަށް ހަވާލުކުރުމަށް މިހާރު ނިންމާފައިވާ ކަމަށް ކޯޓުން ބުންޏެވެ.

"އަލީ ޝާހިލް އަމިއްލައަށް ދައުވާ ކުރިއަށް ގެންދަން ބޭނުންވާތީ އެޓާނީ ޖެނެރަލް އޮފީސް (އޭޖީ އޮފީސް) އިން ހަމަޖައްސާ ދިން ވަކީލުންނަށް ދޫކޮށްފައި ހުރި ލިޔުންތައް ހޯދުމަށްފަހު އަލީ ޝާހިލް އާ ހަވާލުކުރުމަށް،" ކޯޓުން ފޮނުވި މެސެޖުގައި ބުނެފައި އޮތެވެ.

މީގެ އިތުރުން އެ މެސެޖުގައި ބުނެފައިވަނީ ހެކި ރައްކާތެރިކުރުމުގެ އަމުރު ނެރިފައިވާ ލިޔުންތައް ބެލުމަށް ޝާހިލް ބޭނުންވާތީ އެ ލިޔުންތައް ބެލުމުގެ ކަންކަން ކޯޓު މެދުވެރިކޮށް ބެލޭނެ ގޮތެއް އޭނާއަށް ހަމަޖައްސައިދޭނެ ކަމަށެވެ.

އެ މައްސަލައިގައި ދެން އޮންނާނީ ދައުވާ ހުށައަޅައި، ދައުވާއަށް ޖަވާބުދާރީވުމަށް ފުރުސަތު ދިނުމެވެ.

ހ. ޝީރީންވިލާގައި، މަރާލާފައި އޮއްވާ ފެނުނު ޝިއާއުގެ މަރުގެ މައްސަލައިގައި ޝާހިލްގެ މައްޗަށް ދައުވާ އުފުލީ ޑިސެމްބަރު 28، 2022، ގަ އެވެ. ޝިއާއު، 22، މަރާލާފައި އޮއްވާ ފެނުނީ އޯގަސްޓު 6، 2022 ގަ އެވެ.