ބ. އޭދަފުށީގައި ކުރިއަށްދިޔަ ކްލަބް ކޮމްބިނޭޝަން (ސީސީ) އިންޓަ ރިސޯޓް ކްރިކެޓް މުބާރާތުގެ ޗެމްޕިއަންކަން އަމިއްލަ މޯލްޑިވްސް އިން ހޯދައިފި އެވެ.

މިއީ ސީސީން އިންޓަ ރިސޯޓް ކްރިކެޓް މުބާރާތް ކުރިއަށްގެންދިޔަ ދެ ވަނަ ފަހަރެވެ. މިދިޔަ އަހަރު ޗެމްޕިއަންކަން ހޯދީ ސޮނޭވާފުށިންނެވެ.

މި ފަަހަރުގެ މުބާރާތުގައި އަށް ރިސޯޓަކުން ވާދަކުރިއިރު، އަމިއްލަ ޗެމްޕިއަންކަން ހޯދީ ރަނގަޅު ރެކޯޑަކާ އެކު އެވެ.

މި ފަހަރުގެ މުބާރާތުގައި އަމިއްލަ އާއި ފިނޮޅުގެ އިތުރުން ދެން ވާދަކުރި ރިސޯޓްތަކަކީ، ސޮނޭވާފުށި، ރޯޔަލް އައިލެންޑް ރިސޯޓް އެންޑް ސްޕާ، މިލައިދޫ މޯލްޑިވްސް، ދުސިތު ތާނީ މޯލްޑިވްސް، އަވަނި+ފަރެސް މޯލްޑިވްސް އަދި އަނަންތަރާ ކިހާވަށް މޯލްޑިވްސް އެވެ.

އަމިއްލަ އާއި ފިނޮޅު ބައްދަލުކުރި ފައިނަލް މެޗުގެ ތެރެއިން.---- ފޮޓޯ: ރައްޔާން ފޮޓޯސް

އޭދަފުށީ ވެލި ދަނޑުގައި ކުރިއަށްދިޔަ މި މުބާރާތުގެ މެޗުތައް ކުޅުނީ އަށް ވިކެޓަށެވެ. އިއްޔެ ކުޅުނު ފައިނަލް މެޗުގައި، އަމިއްލަ އިން މޮޅުވީ ހޯދީ ހަތް ވިކެޓުން މެޗު ކާމިޔާބުކޮށްގެންނެވެ.

މެޗުގައި، ފިނޮޅުން ވަނީ ފުރަތަމަ ކުޅެން އަރައި، އަށް އޯވަރުގެ ތެރޭގައި ތިން ވިކެޓަށް 131 ލަނޑު ހަދައިފަ އެވެ. ޖަވާބުގައި އަމިއްލަ އިން ކުޅެން އަރައި، 7.5 ވިކެޓް ތެރޭ، ތިން ކުޅުންތެރިން ނުބައިވި ނަމަވެސް، 132 ލަނޑު ހަދައި މެޗުން މޮޅުވީ އެވެ.

ފައިނަލް މެޗުގެ މޮޅު ކުޅުންތެރިއަކީ، އަމިއްލަ ޓީމުގެ ރޯޝަން އެވެ.

ރިސޯޓް ކްރިކެޓް މުބާރާތްތަކީ، މި ފަހުން ރާއްޖޭގައި މަގުބޫލުކަން ހޯދަމުން އަންނަ މުބާރާތްތަކެކެވެ. އެއީ ރިސޯޓްތަކުގައި މަސައްކަތްކުރާ ކްރިކެޓް ސަޕޯޓަރުން އަދި އެ ކުޅިވަރު ކުޅެން ޝައުގުވެރިވާ ފަރާތްތަކަށް ހުޅުވިފައި އޮންނަ ޕްލެޓްފޯމެކެވެ. ބ. އަތޮޅަކީ، ނިސްބަތުން ބަލާއިރު، ރާއްޖޭގެ އެންމެ ރިސޯޓްގިނަ އަތޮޅެކެވެ. އެހެންކަމުން، ސީސީން އިންތިޒާމްކޮށްގެން މި ބާއްވާ ކްރިކެޓް މުބާރާތަށް ލިބޭ ތަރުހީބަށް ބަލާއިރު، މިއީ ކުރިއަށް އޮތްތަނުގައި ވެސް އިތުރު ކުރިއެރުން ހޯދާނެ މުބާރާތަކަށްވުމުގެ ފުރުސަތު ބޮޑެވެ.