ބ. އޭދަފުށީގައި މިހާރު ކުރިއަށްދާ ކްލަބް ކޮމްބިނޭޝަން (ސީސީ) އިންޓަ ރިސޯޓް ކްރިކެޓް މުބާރާތުގެ ފައިނަލުން އަމިއްލަ މޯލްޑިވްސް އާއި ފިނޮޅު މޯލްޑިވްސް ފުރުސަތު ހޯދައިފި އެވެ.

މިއީ، ސީސީން މި މުބާރާތް ބާއްވާ ދެ ވަނަ ފަހަރެވެ.

މިދިޔަ އަހަރުގެ ޗެމްޕިއަން ސޮނޭވާފުށި ވަނީ މި ފަހަރުގެ މުބާރާތުގެ ސެމީ ފައިނަލުން ކަޓައިފަ އެވެ.

ސެމީގެ ފުރަތަމަ މެޗުގައި އިއްޔެ ސޮނޭވާފުށިން ނުކުތީ އަމިއްލައާ ދެކޮޅަށެެވެ. އެ ގޮތުން، ފުރަތަމަ ކުޅެން އަރައި، އަމިއްލަ އިން ވަނީ އަށް އޯވަރުގެ ތެރޭގައި ހަތަރު ވިކެޓަށް 101 ލަނޑު ހަދައިފަ އެވެ. ޖަވާބުގައި ސޮނޭވާފުށިން ކުޅެން އަރައި، 7.3 އޯވަރުގެ ތެރޭގައި ހުރިހާ ކުޅުންތެރިން ނުބައިވެގެން ހެދުނީ 72 ލަނޑެވެ.

އަމިއްލަ އިން ފައިނަލުގެ ޖާގަ ޔަގީންކުރީ 29 ލަނޑުން މޮޅުވެގެންނެވެ. މެޗުގެ މޮޅު ކުޅުންތެރިއަކީ، އަމިއްލަ ޓީމުގެ މަމުން އެވެ.

ދެ ވަަނަ ސެމީ ފައިނަލުގައި ފިނޮޅު ބައްދަލުކުރީ ދުސިތު ތާނީއާ އެވެ. މި މެޗުން ފިނޮޅު މޮޅުވީ 10 ލަނޑުންނެވެ.

ފިނޮޅުން ވަނީ އަށް އޯވަރުގެ ތެރޭގައި ހަ ކުޅުންތެރިން ނުބައިވެގެން 85 ލަނޑު ހަދައިފަ އެވެ. ދުސިތަށް އަށް އޯވަރުގެ ތެރޭގައި ފަސް ކުޅުންތެރިން ނުބައިވެގެން ހެދުނީ 75 ލަނޑެވެ. މެޗުގެ މޮޅު ކުޅުންތެރިއަކީ ފިނޮޅުގެ ސަންތޯ އެވެ.

އަށް ޓީމު ވާދަކުރާ މި ފަހަރުގެ މުބާރާތުގެ ފައިނަލް މެޗު ކުޅޭނީ އޭދަފުށީ ވެލި ދަނޑުގައި މިއަދު ހަވީރު އެވެ.