ލ. ގަމުން ފުރައިގެން މާލެއަށް ދަތުރު ކުރަމުން ދަނިކޮށް ގެއްލުނު "އަކިރިސް" ބޯޓުގެ އިންޖީނު ހުއްޓިފައި އޮއްވައި އެމްއެންޑީއެފުން ހޯދައިފި އެވެ.

އަކިރިސް ބޯޓު ގެއްލުނީ ބުރާސްފަތި ދުވަހުގެ ފަތިހު އެވެ. އެމްއެންޑީއެފުން ބުނީ އެ ބޯޓުން ދަތުރު ކުރި ހުރިހާ އެންމެންގެ ހާލު ވެސް ރަނގަޅު ކަމަށެވެ.

އަކިރިސް ބޯޓު ގެއްލުނުއިރު، އެ ބޯޓުގައި ދެ ދިވެހީންނާއި 12 ބިދޭސީން ތިއްބެވެ. އެ ބޯޓު ހޯދީ އެމްއެންޑީއެފް ސެންޓްރަލް އޭރިއާ ކޮމާންޑު، ކޯސްޓުކާޑު ތާޑު ސްކޮންޑްރަންގެ ފާސްޓް އިންޓަސެޕްޓާ ކްރާފްޓަ "މާފަތް" އިންނެވެ.

އެމްއެންޑީއެފުން ބުނީ އަކިރިސް ބޯޓު ގެއްލުނު ކަމުގެ ރިޕޯޓު ލިބުނީ ރޭ 7:10 ހާއިރު ކަމަށެވެ. ސިފައިންނަށް އެ ބޯޓު ފެނުނީ މިއަދު ހެނދުނު 8:50 ހާއިރު، މ. ރަތްމަންދޫގެ އިރުން 22 ނޯޓިކަލް މޭލު ބޭރުންނެވެ.