މެންޗެސްޓާ (އޮގަސްޓް 30) - މެންޗެސްޓާ ސިޓީގެ ކޯޗު ޕެޕް ގާޑިއޯލާގެ ޖީބުން އެ ކްލަބްގެ ކޮންމެ ސްޓާފަކަށް 13000 ޑޮލަރު (10،000 ޕައުންޑް)ގެ ބޯނަހެއް ދީފައިވާ ކަމަށް އިނގިރޭސި މީޑިއާތަކުން ރިޕޯޓްކޮށްފި އެވެ.

އިއްތިހާދު ކެމްޕަސްގައި މަސައްކަތްކުރާ ސިޓީ ފުޓްބޯލް ގްރޫޕްގެ ހުރިހާ ސްޓާފުންނަށް ގާޑިއޯލާ ބޯނަހެއް ދޭން ނިންމީ، އޭނާ ހޯދާ ކާމިޔާބީތަކުގައި އެ އެންމެން އަދާކުރާ ދައުރަށް ޝުކުރު އަދާކުރުމުގެ ގޮތުންނެވެ. އެ ގޮތުން، ގާޑިއޯލާގެ މި ބޯނަސް 100 އަށް ވުރެ ގިނަ ސްޓާފުންނަށް ވަނީ ދީފަ އެވެ.

ގާޑިއޯލާގެ ޖީބުން ކުރި މި ހަރަދުގެ ޖުމްލަ، 500،000 ޑޮލަރަށް ވުރެ އިތުރުވާނެ އެވެ.

ސިޓީން ހޯދާ ކާމިޔާބީތަކުގައި އޭނާ އަށް އެކަނި ތައުރީފު ކުރާތީވެ، ގާޑިއޯލާ ނޫސްވެރިންގެ ބައްދަލުވުންތަކުގައި ވާހަކަ ދައްކަމުން ވަނީ، މިއީ އެކުވެގެން މުޅި ސިޓީގެ ބެކްރޫމް ސްޓާފުން ކުރާ މަސައްކަތް ކަމަށް ބުނެފަ އެވެ.

މިދިޔަ ސީޒަނުގައި ސިޓީން ވަނީ ޖެހިޖެހިގެން ހަތަރު ވަނަ ފަހަރަށް ޕްރިމިއާ ލީގުގެ ޗެމްޕިއަންކަން ހޯދި ފުރަތަމަ ޓީމުގެ ޝަރަފް ހޯދައިފަ އެވެ. އަދި ޗެމްޕިއަންސް ލީގުގެ ކުއާޓާ ފައިނަލަށް ސިޓީން ދަތުރުކުރިއިރު، މިއީ އެ ކްލަބުން ޔޫރަޕްގެ އެންމެ ބޮޑު ކްލަބް ފުޓްބޯޅަ މުބާރާތުގެ ކުއާޓާގައި ޖެހިޖެހިގެން ކުޅުނު ހަތް ވަނަ ފަހަރެެވެ.

ސިޓީން ވަނީ މިދިޔަ ފަސް އަހަރު ވެސް އެފްއޭ ކަޕްގެ ސެމީ ފައިނަލަށް ދަތުރުކޮށްފަ އެެވެ.

އަންނަ އަހަރުގެ ޖޫން މަހުގެ ނިޔަލަށް ގާޑިއޯލާ، ސިޓީގެ ކޮންޓްރެކްޓްގައި ހުރީ އަހަރަކު 21 މިިލިއަން ޑޮލަރުގެ މުސާރަ އަކަށެވެ.