"ފެންޑާ ފްލޭވާސް" ގެ ނަމުގައި ފުޑް ފެއާ އެއް ބޭއްވުމަށް ނިންމަވާފައިވާ ކަމަށް ބޮޑުފެންޑާގެ ވެރިޔާ ޖެނިފާ މުސްތަފާ ބުނެފި އެވެ.

"އަދަދު" ނޫހާއި ވާހަކަދައްކަމުން ޖެނިފާ ބުނީ މި ފެއާ އަކީ ގޭގައި އަމިއްލަ ވިޔަފާރިކުރަމުން އަންނަ މީހުންނަށް ހުޅުވާލައިގެން ކުރިއަށް ގެންދާ ފެއާއެއް ކަމަށެވެ. އަދި އަތުން ކުދިކުދި ކެވެލި، ފަށް ތަކެތި އުފައްދާ މީހުންނަށް ވެސް އެއްޗެހި ވިއްކުމުގެ ފުރުސަތު މި ފެއާގައި ފަހިވެގެން ދާނެ ކަމަށް އޭނާ ބުންޏެވެ.

"މި ފެއާއަކީ ގޭގައި ތަކެތި ހަދައިގެން ވިއްކާ މީހުންނަށް އަމާޒުކޮށްގެން ބާއްވާ ފެއާއެއް. މި ފެއާގައި އެމީހުން ހަދާ ކާ ތަކެތީގެ އިތުރުން ކްރާފްޓްސް އެއްޗެހި ވެސް ވިއްކޭނެ" ޖެނިފާ ބުންޏެވެ.

މި އިވެންޓުގައި ތަކެތި ވިއްކަން ޖެހެނީ 500 ރުފިޔާ ދީފައި މޭޒެއް ގަނެގެންނެވެ. އެ ތަނުން ތަކެތި ވިއްކައިގެން ލިބޭ ރުފިޔާ ލިބޭނީ އެ ތަކެތި ވިއްކާ މީހާއަށެވެ. އަދި އިތުރު އެހެން ފައިސާތަކެއް ދައްކަން ނުޖެހޭނެ ކަމަށް ވެސް ޖެނިފާ ބުންޏެވެ.

ބޮޑުފެންޑާ އިން 2021 ގައި ވެސް "ބޭކާސް ފެއާ" ގެ ނަމުގައި ވަރަށް ކާމިޔާބު ފެއާއެއް ބޭއްވި އެވެ. މި ފެއާ ކުރިއަށް ގެންދަން ނިންމާފައި ވަނީ ބޮޑުފެންޑާ އިން ކުރިއަށް ގެންދާ އެހެން އިވެންޓުތައް ވެސް ކުރިއަށް ގެންދާ ގޮތަށް "ޕްލާސްޓިކް ފްރީ" ކޮށެވެ.

އަންނަ މަހުގެ ހަތެއްގައި ބޭއްވުމަށް ނިންމާފައިވާ "ފެންޑާ ފްލޭވާސް" ގައި ބައިވެރިވުމަށް ބޭނުންވާ ފަރާތްތަކުން 7777649 ނުވަތަ 7870331 އަށް ގުޅުއްވައިގެން މޭޒެއް ނެގޭނެ އެވެ.