ޔުނައިޓެޑް ނޭޝަންސް އޮފީސް އޮން ޑްރަގްސް އެންޑް ކްރައިމް (ޔޫއެންއޯޑީސީ) ގެ ގްލޯބަލް މެރިޓައިމް ކްރައިމް ޕްރޮގްރާމުން އެމްއެންޑީއެފް ކޯސްޓްގާޑަށް ކަނޑުމަތީގެ ރައްކާތެރިކަމާ ގުޅޭ ސާމާނު ހަދިޔާކޮށްފި އެވެ.

އެމްއެންޑީއެފްއިން ބުނީ އެ ސާމަނާއެކު ކަނޑުމަތީގެ ރައްކާތެރިކަމާއި ޓެރެރިޒަމާ ދެކޮޅަށް ކުރާ މަސައްކަތްތައް ހަރުދަނާ ކުރަން ފަސޭހަވެގެންދާނެ ކަމަށެވެ.

"ހަދިޔާކުރި އިކުއިޕްމަންޓާއެކު، ރާއްޖޭގެ ހާއްސަ އިގްތިސާދީ ކަނޑުގެ ސަރަހައްދުގައި ހިނގާ މެރިޓައިމް ޓެރަރިޒަމްއާ ދެކޮޅަށް ކުރެވޭ މަސައްކަތް އިތުރަށް ހަރުދަނާކުރުމަށް މަގުފަހިވެގެންދާނެ،" އެމްއެންޑީއެފްއިން ބުންޏެވެ.

ޔޫއެންއޯޑީސީން އެމްއެންޑީއެފް ކޯސްޓްގާޑަށް މެރިޓައިމް އިކިއުޕްމަންޓް ދިނުން -- ފޮޓޯ: އެމްއެންޑީއެފް

ޔޫރަޕިއަން ޔޫނިއަން ސާވިސް ފޯ ފޮރިން ޕޮލިސީ އިންސްޓްރޫމަންޓްސްއިން ފަންޑުކޮށްފައިވާ އެ އިކުއިޕްމަންޓް ހަވާލުކުރީ ވިލިމާލޭގައި ހުންނަ މެރިޓައިމް ރެސްކިޔު ކޯޑިނޭޝަން ސެންޓަރ (އެމްއާރުސީސީ) ގައި ބޭއްވި ރަސްމިއްޔާތެއްގަ އެވެ.

ޔޫއެންއޯޑީސީގެ ފަރާތުން އިކުއިޕްމަންޓް ހަވާލުކޮށްދެއްވީ ޔޫއެންއޯޑީސީގެ ހެޑް އޮފް އޮފީސް އޮފް މޯލްޑިވްސް، އެންރީކޯ ބޮނަސެންޏާ އެވެ. އަދި އެމްއެންޑީއެފް ކޯސްޓްގާޑުގެ ފަރާތުން އިކުއިޕްމަންޓާ ހަވާލުވެލެއްވީ އެމްއެންޑީއެފް ކޯސްޓްގާޑުގެ ކޮމަޑާންޓް، ބްރިގޭޑިއާ ޖެނެރަލް މުހައްމަދު ސަލީމެވެ.