މެޑްރިޑް (އޮގަސްޓް 29) - މި ސީޒަނުގައި ރެއާލް މެޑްރިޑާއި ގުޅުން ފްރާންސްގެ ތަރި ކީލިއަން އެމްބާޕޭގެ ފަރާތުން ކުރިއަށް އޮތް ތަނުގައި ގިނަ ގޯލުތަކެއް ފެނިގެންދާނެ ކަމަށް ރެއާލްގެ ކޯޗު ކާލޯ އަންޗެލޮޓީ ބުނެފި އެވެ.

ޕީއެސްޖީ ދޫކޮށް ރެއާލަށް ކުޅުނު ފުރަތަމަ ރަސްމީ މެޗުގައި އެމްބާޕޭ ވަނީ ލަނޑު ޖަހައިފަ އެވެ. އެއީ، ޔުއެފާ ސުޕަ ކަޕް މެޗުގައި އެޓަލަންޓާ ކޮޅަށެވެ.

އެކަމަކު، މި ސީޒަނުގެ ސްޕެނިޝް ލީގުގައި މިހާތަނަށް ރެއާލުން ދެ މެޗެއް ކުޅެފައިވާއިރު، މި ދެ މެޗުގައި ވެސް އެމްބާޕޭގެ ފަރާތުން ގޯލެއް ފެނިފައެއް ނުވެ އެވެ.

އަންޗެލޮޓީ ބުނީ، އެމްބާޕޭގެ ފަރާތުން ލީގުގެ މެޗުތަކުގައި ލަނޑެއް ނުފެނުނަސް ކުޅުމާ މެދު ހިތްހަަމަޖެހޭ ކަމަށެވެ.

"އެމްބާޕޭގެ ކުރިއެރުމާ މެދު ހިތްހަމަ އަހަރެން ޖެހޭ. އަހަރެން އަށް ހީވަނީ އެމްބާޕޭ ސްޕެނިޝް ލީގަށް ހޭނޭލެއް ރަނގަޅުހެން. އޭނާގެ ފަރާތުން މި ޓީމަށް ގިނަ ގޯލުތަކެއް ފެންނާނެ،" އަންޗެލޮޓީ ބުންޏެވެ.

އެމްބާޕޭ ދެ މެޗު ގޯލު ނުޖަހައި، ނިންމާލުން އެއީ މާބޮޑު މައްސަލަ އެއް ނޫން ކަމަށާއި، ދެން އަންނަ މެޗުގައި އެމްބާޕޭގެ ގޯލެއް ފެނުމުގެ ފުރުސަތު ބޮޑު ކަމަށް އަންޗެލޮޓީ ވަނީ ބުނެފަ އެވެ.

އަންޗެލޮޓީ ބުނީ، ރެއާލްގެ ކުޅުންތެރިންގެ ކުރިއެރުމާ މެދު ހިތްހަމަ ޖެހޭ ކަމަށާއި, ކުރިއަށް ހުރި މެޗުތަކުގައި އެ ޓީމުގެ ފަރާތުން ކުޅުން ރަނގަޅުކޮށް ގިނަ ގޯލުތަކެއް ފެންނާނެ ކަމާމެދު ޝައްކުނުކުރާ ކަމަށެވެ.

ސްޕެނިޝް ލީގުގައި މިރޭ ރެއާލުން ރަށުންބޭރުގައި ލަސް ޕަލްމާސްއާ ބައްދަލުކުރާނެ އެވެ.