ގަވާއިދާ ހިލާފަށް ރާއްޖޭގައި އުޅުނު 3322 ބިދޭސީން މިހާތަނަށް ޑީޕޯޓުކޮށްފައިވާ ކަމަށް ހޯމް މިނިސްޓްރީން މިއަދު ބުނެފިި އެވެ.

އެ މިނިސްޓްރީ އިން ބުނީ ނޮވެމްބަރު 17، 2023، އިން ފެށިގެން އޮގަސްޓް 25، އާ ހަމައަށް ޖުމުލަ 3322 ބިދޭސީން ޑީޕޯޓުކޮށްފައިވާ ކަމަށެވެ.

ގަވާއިދާ ހިލާފަށް އުޅޭ ބިދޭސީން ހޯދަން "އޮޕަރޭޝަން ކުރަނގި" ގެ ނަމުގައި މެއި، 2024، ގައި ފެށި ޕްރޮގްރާމުގެ ދަށުން ބިދޭސީން ގަވާއިދާ ހިލާފަށް ވިޔަފާރި ކުރަމުން އައި ޖުމުލަ 257 ތަނެއް ރެއިޑްކޮށްފައިވާ ކަމަށް ހޯމް މިނިސްޓްރީން ބުނެ އެވެ. އަދި އެ ހުރިހާ ތަނެއް މިހާރު ބަންދުކޮށްފައިވާ ކަމަށް ވެސް ސަރުކާރުން ބުންޏެވެ.

ބަންދު ކުރި ތަންތަނުގެ ތެރޭގައި ސެލޫންތަކާއި އާންމުކޮށް ފިހާރައިގައި ވިއްކަން ބަހައްޓާފައި ހުންނަ ލުއިކާނާ ހަދާ ބަދިގެތައް ވެސް ހިމެނެ އެވެ.

ހޯމް މިނިސްޓްރީގެ އަމާޒަކީ ތިން އަހަރު ދުވަހުގެ ތެރޭގައި ބިދޭސީންގެ މައްސަލައަށް ހައްލު ކުރުމެވެ. އެގޮތުން ފުރަތަމަ އަހަރުގެ ތެރޭގައި ގަވާއިދާ ހިލާފަށް އުޅޭ ބިދޭސީން ޑީޕޯޓުކޮށް، ދެވަނަަ އަދި ތިންވަނަ އަހަރުގެ ތެރޭގައި ގަވާއިދާ ހިލާފަށް އުޅޭ މީހުން ގާނޫނީ އިމުގެ ތެރެއަށް ގެނައުމުގެ މަސައްކަތް ކުރިއަށް ގެންދާނެ ކަމަށް ހޯމް މިނިސްޓަރު އަލީ އިހުސާން ވަނީ ވިދާޅުވެފަ އެވެ.