އުރީދޫ މޯލްޑިވްސްއިން ކޮންމެ އަހަރަކު ބާއްވާ އުރީދޫ މަސްރޭސް 2024 ގދ. ތިނަދޫ އެޑިޝަންގެ ޗެމްޕިއަންކަން ބްލެކް އޭންޓް ފިޝިން ހޯދައިފި އެވެ.

ހުކުރު ދުވަހު ކުރިއަށްދިޔަ މުބާރާތުގެ ޗެމްޕިއަންކަން ބްލެކް އޭންޓް ފިޝިން ހޯދީ 1،665.81 ޕޮއިންޓާއެކުގަ އެވެ. ދެވަނަ 523.25 ޕޮއިންޓާއިއެކު ޓީމް އެމްއައިބީ ހޯދިއިރު ތިންވަނަ ހޯދީ 478.85 ޕޮއިންޓާއެކު ހޯނޑެއްދޫ މަސްވެރިންނެވެ.

އަށް ޓީމު ވާދަކުރި މުބާރާތުގައި ޖުމްލަ 7.15 ކިލޯގެ ހަންޖެއް ބާނައިގެން އެންމެ ބަރު މަސް ބޭނީ ބްލެކް އޭންޓް ފިޝިންގެ އަބްދުﷲ ދީދީ އެވެ.

އުރީދޫ މަސް ރޭސް ގދ. ތިނަދޫ އެޑިޝަންގެ ތެރެއިން -- ފޮޓޯ: އުރީދޫ

މުބާރާތުގެ އެންމެ މޮޅު ފިރިހެން ކެޔޮޅަކަށް 12 މަސް ބާނައިގެން ހޮވުނީ ހޯނޑެއްދޫ މަސްވެރިންގެ ދައުސް ހަސަން އެވެ. އަދި އެންމެ މޮޅު އަންހެން ކެޔޮޅަކަށް ހަތަރު މަސް ބާނައިގެން ހޮވުނީ އެމްއައިބީގެ އައިޝަތު ނޫފާ އަލީ އެވެ.

އުރީދޫ މޯލްޑިވްސްގެ 19 ވަނަ އަހަރީ ދުވަސް ފާހަގަކުރުމުގެ ގޮތުން މި އަހަރު މަސްރޭސް އިތުރަށް ކުލަގަދަކޮށް ބާއްވަނީ ކ. ހިންމަފުށި، ޅ. ނައިފަރު، ގދ. ތިނަދޫގަ އެވެ.