އިތުރު ވަގުތުގެެ ފަހު މިނިޓްގައި ލަނޑު ޖަހައި، 1-0 އިން ރާއްޖެ ބަލިކޮށް، އެންމެ ފަހުން ތިން ފަހަރުގެ ސާްފް 20 އަހަރުން ދަށުގެ ޗެމްޕިއަން، އިންޑިއާ އިން މި ފަަހަރުގެ މުބާރާތުގެ ސެމީ ފައިނަލަށް ދަތުރުކޮށްފި އެވެ.

ކޮންމެ ގްރޫޕެއްގައި ތިން ޓީމު ކުޅޭއިރު، ގްރޫޕް ބީގެ ފުރަތަމަ މެޗުން އިންޑިއާ އިން ވަނީ 1-0 އިން ބޫޓާން ބަލިކޮށްފަ އެވެ. އެ މެޗުގައި އިންޑިއާގެ ދެ ކުޅުންތެރިއަކަށް އަދި ބޫޓާނުގެ ކުޅުންތެރިއަކަށް ވަނީ ރަތް ކާޑު ދައްކައިފަ އެވެ. ދެ ވަނަ މެޗުން ބޫޓާނުން ވަނީ އެއް ކުޅުންތެރިއަކު މަދުކޮށް ކުޅެ، ރާއްޖެ އަތުން 2-1 އިން މޮޅުވެފަ އެވެ.

އެހެންކަމުން، މިއަދުގެ މެޗަށް ނުކުތްއިރު، ސެމީ ފައިނަލަށް ދިއުމަށް އިންޑިއާ އަށް ބޭނުންވަނީ ޕޮއިންޓެކެވެ. އަދި ރާއްޖެ އަށް ސެމީ ފައިނަލަށް ދެވެން އޮތީ މޮޅުވެގެންނެވެ.

އިންޑިއާ އިން މި މެޗުން މޮޅުވެ، ގްރޫޕް ބީގެ އެއް ވަނައިގެ ގޮތުގައި ސެމީ ފައިނަލަށް ދިޔައީ ހަ ޕޮއިންޓާ އެކު އެވެ. ސެމީގައި އިންޑިއާ ކުޅޭނީ ބަންގްލަދޭޝްއާ އެވެ. އަދި އަނެއް ސެމީގައި ބޫޓާން ކުޅޭނީ ނޭޕާލާ އެވެ.

އަންފާ ކޮމްޕްލެކްސްގައި މިއަދު ކުޅުނު މެޗު ފަށައިގެން އިންޑިއާ އިން ކޮންޓްރޯލް ނަގައިގެން ރަނގަޅު ކުޅުމެއް ދައްކަން ފެށި އެވެ. އެ ގޮތުން، އިންޑިއާ އިން ރަނގަޅު ފުރުސުތަކެއް ހޯދި ނަމަވެސް، ރާއްޖެ ޓީމުގެ ޑިފެންޑަރުންނާއި ކީޕަރު މުހައްމަދު ޔާމީން ވަނީ މޮޅު ކުުޅުމެއް ދައްކައި އެ ބޯޅަތައް ހުއްޓުވައިފަ އެވެ.

ރާއްޖެ ޓީމުގެ ކީޕަރު ޔާމީން: މިއަދުގެ މެޗުގައި ގިނަ ބޯޅަތަކެއް ވަނީ ހުއްޓުވައިފައި.--- ފޮޓޯ: އުދިޕްތު ސިންގް

އެ ގޮތުން، ފުރަތަމަ ހާފުގައި، ކީޕަރު ޔާމީން ވަނީ އިންޑިއާގެ ކެލްވިން ސިންގް ތައޮރެމް ޖެހި ޝޮޓެއް މަތަކޮށްފަ އެެވެ. އޭގެ ފަހުން، ކެލްވިން ގޯލެއް ޖެހި ނަމަވެސް، އެ ލަނޑު ވަނީ އޮފްސައިިޑްވެފަ އެވެ. އިންޑިއާގެ މުނީރުލް މުއްލާ އަށް ގޯލު ކުރިމަތިން ހުސްކޮށް ލިބުނު ބޯޅަ ރަނގަޅަށް ފޮނުވާނުލެވުނެވެ.

ކައުންޓަ އެޓޭކުގައި ރާއްޖޭން ވެސް ފުރުސަތު ހޯދޭތޯ ބަލަމުންދިޔަ އެވެ. އެ ގޮތުން، ރާއްޖޭގެ ކެޕްޓަން، ޝަނާން ރަޝާދު އަށް ލިބޭ ބޯޅަތައް ހިފަހައްޓައި، ގިނަ ކުޅުންތެރިން އެޓޭކުގައި ބައިވެރިކުރެވޭތޯ ބަލަމުންދިޔަ އެވެ.

އެ ގޮތުން ފަޅިން ކުޅެމުންދިޔަ، އަބްދުﷲ ލޫތު އިބްރާހިމް އަށް ލިބޭ ބޯޅަތަކުގައި އޭނާ ހުއްޓުވަން އިންޑިއާ އިން ފައުލުކުރަމުންދިޔަ އެެވެ.

ދެ ވަނަ ހާފުގައި ރާއްޖެ އަށް ގިނަ ބޯޅަތަކެއް ކުރިއަށް ކުޅެން ފުރުސަތު ލިބުނެވެ. އެ ގޮތުން، އިންޑިއާ އޭރިއާބޭރުން ލިބުނު ހިލޭޖެހުމަކުން، ޝަނާން ފޮނުވާލި ބޯޅަ ދިޔައީ، ހުރަސްދަނޑިމަތިންނެވެ.

އިންޑިއާގެ ކޮރޯ ސިންގް (ވ) އަތުން ބޯ:ޅަ ހޯދަން ރާއްޖެ ޓީމުގެ ލޫތު މަސައްކަތްކުރަނީ.--- ފޮޓޯ: އުދިޕްތު ސިންގް

އިންޑިއާ އިން އޭރިއާތެރެއަށް ހުރަސްކޮށްގެންނާއި އޭރިއާބޭރުން ޝޮޓު ފޮނުވާލައިގެން ވެސް ގޯލު ޖެހޭތޯ ބެލިއިރު، ރާއްޖޭގެ ކީޕަރު، ޔާމީން ވަނީ އެ ބޯޅަތައް ހިފަހައްޓައިފަ އެވެ.

ކައުންޓަ އެޓޭކުގައި ރާއްޖެ އަށް އެންމެ ރަނގަޅު ފުރުސަތެއް ލިބުނީ، މެޗުގެ 84 ވަނަ މިނިޓްގަ އެވެ. އެ ގޮތުން ރަނގަޅު ކުޅުމަކަށް ފަހު، ލޫތު ދިން ބޯޅަ ކޮންޓްރޯލް ކޮށްލުމަށް ފަހު، އޭރިއާތެރެއިން މުޒްދާން ހަސަން ޖެހި ޝޮޓް އަމާޒުވީ އަރިމަތީ ދާގަނޑަށެވެ.

އޭގެ ފަހުން، އިތުރު ވަގުުތުގައި، ޝަނާން ދިން ބޯޅައެއް، ހިފައިގެން ހުސްކޮށް އޭރިއާތެރެއިން ލޫތަށް ކުރިއަށްދާން ލިބުނު ބޯޅަ ރަނގަޅަށް ކޮންޓްރޯލް ނުކުރެވުނެވެ.

އިންޑިއާ އިން މޮޅުވި ގޯލު ޖެހީ އިތުރު ވަގުތުގެ ފަސް ވަނަ މިނިޓްގަ އެެވެ. މި ލަނޑު ޖެހީ، ބަދަލަކަށް ކުޅެން އެރި މަންގްލެންތަން ކިޕްގެން އެވެ. އޭރިއާބޭރުންޖެހި ބޯޅަ އަމާޒުވީ ގޯލުގެ ތިރީ ކަނަށެވެ. މި ފަހަރުގެ މުބާރާތުގައި ބަދަލަކަށް އަރައި މަންގްލެންތަން އަންނަނީ މޮޅު ކުޅުމެއް ދައްކަމުންނެވެ.

އިންޑިއާ ޓީމުގެ މަންގްލެންތަން ފަހު ވަގުތު ލަނޑު ޖެހުމަށް ފަހު އުފާފާޅުުކުރަނީ.--- ފޮޓޯ: އުދިޕްތު ސިންގް