ކުށްވެރިންނަށް ފޯނާއި މަސްތުވާތަކެއްޗާއި އެހެނިހެން ސާމާނު ފޯރުކޮށްދެމުން ދިޔަ ކަމުގެ ތުހުމަތުގައި ހައްޔަރުކުރި މޯލްޑިވްސް ކަރެކްޝަނަލް ސާވިސްގެ 13 އޮފިސަރުންގެ ތެރެއިން ފަސް އޮފިސަރެއްގެ މައްޗަށް ދައުވާ އުފުލައިފި އެވެ.

ފުލުހުންނާއި ކަރެކްޝަންސް ގުޅިގެން ހިންގި އޮޕަރޭޝަނެއްގައި މި މީހުން ހައްޔަރުކުރީ ޖޫން 28، ގަ އެވެ. އެ މީހުން ދިރިއުޅެމުންދިޔަ ތަންތަން ވެސް އޭރު ބަލާފާސްކުރި އެވެ. އޭގެ ތެރެއިން 11 މީހަކު ތަހުގީގު ނިމެންދެން ވަނީ ބަންދުކޮށްފަ އެވެ. މި ތަހުގީގު ހިންގީ ފުލުހުންނާއި އެންޓި ކޮރަޕްޝަން ކޮމިޝަން (އޭސީސީ) ގުޅިގެންނެވެ.

ޕްރޮސެކިއުޓާ ޖެނެރަލް (ޕީޖީ) އޮފީހުން މިއަދު ބުނީ އެ 13 އޮފިސަރުންގެ ތެރެއިން ފަސް އޮފިސަރެއްގެ މައްޗަށް ދައުވާ ކުރަން ކްރިމިނަލް ކޯޓަށް ހުށަހެޅީ އިއްޔެ ކަމަށެވެ.

ދައުވާ ކުރި މީހުންނާއި ކުރެވޭ ދައުވާތަށް:

• ރ. އުނގޫފާރު، އައިވަރީހައުސް، ޖިނާހު އަބްދުއްރަހީމް؛ ރަސްމީ ހައިސިއްޔަތު ނަހަމަގޮތުގައި ބޭނުންކުރުމުގެ ދައުވާ، މަނީ ލޯންޑަރިންގެ ދައުވާ، އަދި ނުހައްގު މުއްސަނދިކަން ހޯދައި ލިބިގަތުމުގެ ދައުވާ
• ކ. މާފުށި، ބީޗްހައުސް، އަލީ ހިޝާމް؛ ރަސްމީ ހައިސިއްޔަތު ނަހަމަގޮތުގައި ބޭނުންކުރުމުގެ ދައުވާ، އަދި ނުހައްގު މުއްސަނދިކަން ހޯދައި ލިބިގަތުމުގެ ދައުވާ
• ހދ. ނޭކުރެންދޫ، ތަރާނާގެ، ޢަލީ ނާޒިމް؛ ރަސްމީ ހައިސިއްޔަތު ނަހަމަގޮތުގައި ބޭނުންކުރުމުގެ ދައުވާ، އަދި ނުހައްގު މުއްސަނދިކަން ހޯދައި ލިބިގަތުމުގެ ދައުވާ
• ގއ. ވިލިނގިލި، ކުއްޅަވައްގެ، މުހއްމަދު ފަތޫހު ފަތުހުﷲ - ރަސްމީ ހައިސިއްޔަތު ނަހަމަގޮތުގައި ބޭނުންކުރުމުގެ ދައުވާ، އަދި ނުހައްގު މުއްސަނދިކަން ހޯދައި ލިބިގަތުމުގެ ދައުވާ
• ނ. ލަންދޫ، ކާމިނީގެ، ޢަލީ އަސްފާގު؛ ރަސްމީ ހައިސިއްޔަތު ނަހަމަގޮތުގައި ބޭނުންކުރުމުގެ ދައުވާ، އަދި ނުހައްގު މުއްސަނދިކަން ހޯދައި ލިބިގަތުމުގެ ދައުވާ

މިކަމާ ގުޅިގެން ޖޫން 27، ގައި ބޭއްވި ނޫސްވެރިންގެ ބައްދަލުވުމެއްގައި ހޯމް މިނިސްޓަރު އަލީ އިހުސާން ވިދާޅުވީ މި މައްސަލާގައި ހިމެނޭ އޮފިސަރުންގެ އެކައުންޓަށް މިދިޔަ އަހަރު އެކަނި ވެސް 73.3 މިލިއަން ރުފިޔާ ޖަމާކޮށްފައިވާ ކަމަށެވެ.

އެއް އޮފިސަރެއްގެ އެކައުންޓަށް އަހަރެއް ތެރޭގައި 24 މިލިއަން ރުފިޔާ ޖަމާކޮށްފައިވާއިރު، އެ ފައިސާ ޖަމާކޮށްފައި ވަނީ ކުދި އަދަދުތަކުން ކަމަށް ވެސް އޭނާ ވިދާޅުވި އެވެ.

ޕީޖީ އޮފީހުން އިތުރަށް ބުނީ ހައްޔަރުކުރި އަނެއް އަށް އޮފިސަރުންނަށް ދައުވާ ނުކުރީ، ދައުވާ އުފުލޭވަރަށް މިވަގުތު ހެކި ލިބިފައިނުވާތީ ކަމަށެވެ. ނަމަވެސް މި މައްސަލާގެ ތަހުގީގު އަދިވެސް ކުރިއަށްދާ ކަމަށާއި އިތުރު މީހުންގެ މައްޗަށް ދައުވާ ކުރުމާމެދު ގޮތެއް ނިންމާނީ ތަހުގީގު ނިމުމުން ކަމަށެވެ.