ތިލަފުށީގައި ހުރި މެރިންޑޯ މެރިންވޯކްސް ވޯކްޝޮޕްގައި މިއަދު ހެނދުނު ރޯވެއްޖެ އެވެ.

"މެރިންޑޯ ވޯކްޝޮޕުގައި" ހެނދުނު 8:25 ގައި ރޯވި އެ އަލިފާނުގެ ސަބަބުން އެއްވެސް މީހަކަށް ގެއްލުންވި ކަމެއް ނޭނގެ އެވެ. ނަމަވެސް ރޯވެފައި ހުރި އިމާރާތުން މީހަކު ފުންމާލި މަންޒަރު ފެނުނު ކަމަށް ބައެއް މީހުން ބުނެ އެވެ.

އިތުރު މީހަކު ވެސް އަލިފާން ރޯވި ތަނުގެ ތެރޭގައި ހުރި ކަމަށްވެ އެވެ. ނަމަވެސް އަދި އެކަން ޔަގީނެއް ނުވެ އެވެ. އަލިފާން ރޯވިއިރު ގާތްގަނޑަކަށް 30 މީހުން ވޯކްޝޮޕު ތެރޭގައި ތިބޭނެ ކަމަށްވެ އެވެ.

މިހާރު އަލިފާން ނިއްވާލުމުގައި ތިލަފުށީ ފަޔާ ސްޓޭޝަނުން ހަރަކާތްތެރިވަމުން ދާ ކަމަށް ވެސް ސިފައިން ބުނެ އެވެ.

ގުޅީފަޅުގައި ތިބި ބައެއް މީހުން "އަދަދު" އަށް މައުލޫމާތު ދިން ގޮތުގައި އެ ސަރަހައްދުން ކަޅު ދުމާ އެކީ އެއްޗެހި ގޮވާ އަޑު ވެސް އެބަ އިވެ އެވެ. ރޯވި ތަނުގައި ހުރީ ކޮން އެއްޗެއް ކަމެއް އަދި ސާފެއް ނޫނެވެ.

ތިލަފުއްޓަކީ އިންޑަސްޓްރިއަލް ގިނަ މަސައްކަތްތަކެއް ހިނގާ، އަދި ނުރައްކާތެރި އެތައް ކެމިކަލްތަކާއި ތަފާތު އެކި މައުދަންތައް ރައްކާކޮށްފައި ހުރެ އެވެ.

މީގެ ކުރިން ވެސް މިތަނުގައި އަލިފާނުގެ ހާދިސާތައް ހިނގައި އެކި ވަރުގެ ގެއްލުންތައް ލިބިފައިވެ އެވެ. މިދިޔަ ޖޫންގައި ވެސް އެފަދަ ހާދިސާއެެއް ހިނގައި، "ރާއްޖެ ލޮޖިސްޓިކްސް" ގުދަނުގައި ހުރި ގިނަ ސާމާނު ވަނީ ބޭނުންނުކުރެވޭ ވަރަށް ހަލާކުވެފަ އެވެ.