ކެއްސާތީވެ އާންމުކޮށް ބޭނުންކޮށް އުޅޭ ކޮފްސީ ސިރަޕުގައި ކުނޑި ކޮޅުތަކެއް ހުންނަކަން ފާހަގަކުރެވިގެން އެ ބޭސް ރާއްޖެ އެތެެރެކޮށް ވިއްކުމާއި ބޭނުންކުރުން މަނާކޮށްފި އެވެ.

މޯލްޑިވްސް ފުޑް އެންޑް ޑްރަގު އޮތޯރިޓީން ނެރުނު ބަޔާނެއްގައި ވަނީ ރާއްޖެ އެތެރެކޮށް ބޭނުންކުރާ ކޮފްސީ ސިރަޕުގައި ކުނޑި ކޮޅުތަކެއް ހުންނަކަން ފާހަގަކުރެވިފައިވާތީ އެބޭހުގެ ރައްކާތެރިކަން ކަށަވަރުކުރުމަށް މިކަންތައް އިތުރަށް ބަލަމުންދާ ކަމަށެވެ.

"މި ބޭހުގެ ރައްކާތެރިކަން ކަށަވަރުކުރުމަށްޓަކައި މިކަންތައް އިތުރަށް ބެލުމުގެ މަސައްކަތް މިއޮތޯރިޓީގެ ފަރާތުން މިގެންދަނީ ކުރަމުން. ވީމާ ދިމާވެފައިވާ މިވާ މައްސަލަ މި އޮތޯރިޓީން ބެލުމަށްފަހު ވަކި ގޮތެއް އަންގަންދެން މި ޕްރޮޑަކްޓް އެތެރެކުރުމާއި، ވިއްކުމާއި އަދި ބޭނުންކުރުމަކީ މަނާކަމެއް ކަމުގައި ދަންނަވަން،" އެ އިދާރާގެ ބަޔާނުގައިވެ އެވެ.

މީގެ ކުރިން ވެސް ކޮލެޓީގެ މައްސަލަތައް ދިމާވެގެން ވަނީ ބައެއް ބޭސްތައް އެތެރެކުރުމާއި، ވިއްކުމާއި ބޭނުންކުރުން ވެސް ވަނީ އެ އޮތޯރިޓީން މަނާކޮށްފަ އެވެ. އޭގެ ތެރޭގައި ކެއްސާތީ ބޭނުން ކުރާ ބޭސް ވެސް ހިމެނެ އެވެ.