ތިމާވެއްޓަށް ލިބޭ ގެއްލުމަށް ޖޫރިމަނާ ކުރުމުގެ ބާރު ދީފައި އޮތަސް އެ ފައިސާ ހޯދަން އެއްވެސް އިތުރު ކަމެއް ކުރަން ބާރެއް ދީފައި ނޯންނަ ކަމަށް އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ) އިން މިއަދު ބުނެފި އެވެ.

ތިމާވެއްޓަށް ލިބޭ ގެއްލުންތަކަށް ކުރާ ޖޫރިމަނާ ފައިސާ ނުލިބޭ މައްސަލައިގައި، ރައްޔިތުންގެ މަޖިލީހުގެ އެންވަޔަރަމަންޓް އެންޑް ކްލައިމެޓް ޗޭންޖު ކޮމިޓީގައި އީޕީއޭއިން މިހެން ބުނީ ފައިސާ ހޯދަން އެ އިދާރާއަށް ދިމާވެފައިވާ ގޮންޖެހުންތައް މެމްބަރުންނާ ހިއްސާކުރައްވަމުންނެވެ.

އެގޮތުން އީޕީއޭގެ ޑިރެކްޓާ ޖެނެރަލް އިބްރާހިމް ނައީމް ވިދާޅުވީ، ޖޫރިމަނާ ކުރުމުގެ މަސައްކަތަކީ އެ އިދާރާއަށް އެކަނި ކުރެވޭ ވަރަށް ވުރެ ދަތި، އުނދަގޫ އަދި "ކޮމްޕްލެކްސް" މަސައްކަތެއް ކަމަށެވެ. އަދި ޖޫރިމަނާއާ ގުޅޭ ކަންކަމުގައި މީހުން ހީކުރާ ވަރުގެ ބާރެއް އީޕީއޭއަށް ނޯންނަ ކަމަށް ވެސް އޭނާ ވިދާޅުވި އެވެ.

"ބައެއް ބޭފުޅުންގެ އެކްސްޕެކްޓޭޝަން ހުންނަ ވަރަކަށް ނޫން އީޕީއޭއަށް މިނިވަންކަން ދީފައި އޮންނަނީ. މިސާލަކަށް މައްސަލައެއް ހިފައިގެން ކޯޓަކަށް އީޕީއޭއަކަށް ނުދެވޭ. އީޕީއޭއިން ޖެހޭނީ އެޓާނީ ޖެނެރަލްއަށް ދަންނަވަން. އަނެއްކާ ޖޫރިމަނާ ކުރުމާ އެއްކޮށް، އެއާ ބެހޭ ގޮތުން އެޕީލް ކުރެވެނެ އެބަ އޮވޭ މިނިސްޓަރަށް،" ނައީމް ވިދާޅުވި އެވެ.

ޖޫރިމަނާއާ ގުޅޭ ކަންކަން އިންތިޒާމުވެފައި އޮތް ގޮތުގައި އީޕީއޭއަށް ބާރު ނެތުމުގެ އިތުރަން، އެހެން ބައެއް މައްސަލަތައް ވެސް އެ އިދާރާއިން ފާހަގަކުރި އެވެ. އޭގެ ތެރޭގައި ފަރަށް އަރާ ބޯޓު ފަރުން ނެގުމުން ނޫނީ ލިބުނު ގެއްލުން ނުބެލޭ ގޮތަށް އޮތުމާއި ބޯޓުތަކުގެ އެޖެންޓުން ބަދަލުވެ މުއާމަލާތް ކުރަން އުނދަގޫވާ މައްސަލަ ހިމެނެ އެވެ.

ކޮމިޓީގައި ނައީމް އާއި އީޕީއޭގެ އެހެން ވެރިން ވެސް ވަނީ ޖޫރިމަނާއާ ގުޅޭ ކަންކަމުގައި އީޕީއޭގެ ދައުރު ހަރުދަނާކުރަން އެ އިދާރާ ގާނޫނީ ގޮތުން ބާރުވެެރިކުރަން ޖެހޭ ކަމަށް ވިދާޅުވެފަ އެވެ. އޭގެން އެއް ކަމަކީ ތިމާވެއްޓާ ބެހޭ މިނިސްޓްރީގެ ދަށުން އީޕީއޭ މިނިވަންކޮށް، މިނިވަން މުއައްސަސާއަކަށް ހެދުމެވެ.

އޭގެ އިތުރުން، ބަޖެޓު ތާށިކަމާއި ހަބީރުން ނެތުމަކީ ވެސް އީޕީއޭއަށް ދިމާވާ ގޮންޖެހުމެއްގެ ގޮތުގައި ނައީމް ފާހަގަކުރެއްވި އެވެ. އޭނާ ވިދާޅުވީ ބޭރުގެ ތަންތަނުން މޮޅު ކޮންސަލްޓަންޓުންނާއި ތަޖުރިބާކާރު ލޯޔަރުން ފޮނުވާއިރު، ރާއްޖޭގައި ތިބީ ކަމުގެ ފަންނީ ސެޓިފިކޭޝަން ލިބިފައި ތިބި ދެ ތިން މީހުން ކަމަށެވެ.

"ވަރަށް ވަރުގަދަ ބަޔަކާ އެކީ އަޅުގަނޑުމެން މި ޖެހެނީ ހަނގުރާމަ ކުރަން މިކަމުގައި. ބޯޓުގެ ފަރާތުން އަންނާނެ ދުނިޔޭގެ ފެންވަރުގެ ކޮންސަލްޓަންޓުން އެމެރިކާއިންނާއި އެތަން މިތަނުން އައިސް، އެ މީހުން ވެސް މި ސާވޭ ކުރާނެ. ކޮށްފައި އަޅުގަނޑުމެން މި ތިބޭ، ދިވެހިރާއްޖޭގައި މި އުޅޭ ދެ ތިން މީހަކު އެކަމަށް ސެޓިފައި ވެފައި ވެސް މި ތިބެނީ،" ނައީމް ވިދާޅުވި އެވެ.

ހަމަ މި މޭރުމުން ވާހަކަ ކުރިއަށް ގެންދަވަމުން އީޕީއޭގެ ޑިރެކްޓަރަކު ވެސް ވިދާޅުވީ މިކަމަށް ހައްލެއް ނެތީ އީޕީއޭގެ ބަޖެޓުން އެ އިދާރާ ތަރައްގީކުރަން އެއްވެސް ހަރަދެއް ނުކޮށް، މުސާރަ އާއި އިދާރާ ހަރަދުތަކަަށް ބަޖެޓު ހުސްކޮށްލަން ޖެހޭތީ ކަމަށެވެ.

"އިންޓަނޭޝަނަލް ބޮޑެތި ކުންފުނިތަކުން އޮޕަރޭޓު ކުރާ ބޯޓު ފަހަރު. އެ މީހުން ބޯޓުތައް ފަރަށް އެރީމައި އެ މީހުން އެބަ މޯބިލައިޒްކޮށްލާ ބޮޑެތި ލޯޔަރުންނާ ވަރަށް ވަރުގަދަ މީސްމީހުން އެބަ އާދޭ. އަންނަ އިރުގައި އަޅުގަނޑުމެންނަށް އެ ވަރަށް، އެ ލެވަލްގައި ރިސޯސް ކުރެވިފައި ނެތީމަ އެ އަންނަ ޑިފިކަލްޓީ ވެސް ވަރަށް ބޮޑަށް ފާހަގަކުރެވޭ،" އޭނާ ވިދާޅުވި އެވެ.

އީޕީއޭއިން ކޮމިޓީގައި އިތުރު ކަމަކަށް އެދުނީ، ތިމާވެއްޓާ ގުޅޭ މައްސަލަތަކުގައި ކުރާ ޖޫރިމަނާ އިސްތިއުނާކުރަން މުއްދަތެއް ކަނޑައެޅުމަށެވެ. މިހާރު އޮންނަ ގޮތުން އީޕީއޭއިން ކުރާ ޖޫރިމަނާ ތިމާވެއްޓާ ބެހޭ މިނިސްޓަރަށް އިސްތިއުނާފު ކުރެވެ އެވެ. ނަމަވެސް އެއާ މެދު ގޮތެއް ނިންމަން ވަކި މުއްދަތެއް ނޯވެ އެވެ.

ކުރާ ހުރިހާ ޖޫރިމަނާ ފައިސާ ނުލިބުނަސް ދައުލަތުގެ އެހެން އިދާރާތަކުން ކުރާ ޖޫރިމަނާތަކަށް ލިބޭ ފައިސާއާ ބަލާފައި ރަނގަޅު ކަމަށް އީޕީއޭއިން ބުންޏެވެ. އެ އިދާރާއިން ބުނީ ވޭތުވީ ދެ ތިން އަހަރުގެ ތެރޭގައި 37 މައްސަލައެއްގައި 228 މިލިއަން ރުފިޔާ ހޯދާފައި ވާނެ ކަމަށެވެ.