ލަންޑަން (އޮގަސްޓް 18) - ފާއިތުވި ހަތަރު އަހަރުގެ އިނގިރޭސި ޕްރިމިއާ ލީިގުގެ ޗެމްޕިއަން، މެންޗެސްޓާ ސިޓީން މި ފަހަރުގެ ލީގު ފަށަން ކުޅުނު މެޗުގައި، އެންމެ ގިނަ ޓްރާންސްފާކުރި އެއް ޓީމު، ޗެލްސީ އަތުން 2-0 އިން މޮޅުވެއްޖެ އެވެ.

މިއީ، މި ސީޒަނުގައި ޗެލްސީގެ ކޯޗުކަމާ ހަވާލުވި ލެސްޓާ ސިޓީގެ ކުރީގެ ކޯޗު، އެންޒޯ މަރެސްކާގެ ފުރަތަމަ މެޗެެވެ. މަރެސްކާ އަކީ މެންޗެސްޓާ ސިޓީގެ ކުރީގެ އެސިސްޓަންޓް ކޯޗެކެވެ. ސިޓީގެ ކޯޗު ޕެޕް ގާޑިއޯލާއާ އެކު މަސައްކަތް ވެސް ކޮށްފައިވެ އެވެ.

ޗެލްސީގެ ސްޓެމްފޯޑް ބްރިޖުގައި ކުޅުނު މެޗުގެ 18 ވަނަ މިނިޓްގައި ސިޓީން ވަނީ ލީޑުނަގައިފަ އެވެ. މިއީ، އޭރިއާތެރެއިން ސިޓީގެ އާލިން ބްރައުޓް ހާލަންޑް ޖެހި ގޯލެކެވެ. މި ގޯލު ބަލައިގަންނަން ނިންމީ، ހާލަންޑަށް ފުރުސަތު ތަނަވަސްކޮށްދިން ބެނާޑޯ ސިލްވާ އޮފްސައިޑްތޯ، ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައިފަ އެވެ. ވީއޭއާރުން ގޯލެއްކަމަށް ނިންމުމާ އެކު، ހާލަންޑް މި ވަނީ ސިޓީ އަށް ކުޅެދޭ 100 ވަނަ މެޗުގައި އެ ޓީމަށް 91 ވަނަ ލަނޑު ޖަހައިދީފަ އެވެ.

ސިޓީ އަށް ފުރަތަމަ ހާފުގައި ދެ ވަނަ ގޯލެއް ޖަހައިދޭން ކެވިން ޑި ބްރޭނާ ޖެހި ޝޮޓް ދަނޑިކައިރިން ބޭރަށް ދިޔައިރު، އެ ޓީމުގެ ޖެރެމީ ޑޮކޫ، އޭރިއާބޭރުން ޖެހި ބާރު ބޯޅަ ޗެލްސީގެ ކީޕަރު، ރޮބާޓް ސަންޗޭޒް ވަނީ މަތަކޮށްފަ އެވެ.

ފުރަތަމަ ހާފުގައި ޗެލްސީ އަށް ގޯލެއް ޖަހައިދޭން ކްރިސްޓޮފާ އެންކުންކޫ އާއި ނިކޮލަސް ޖެކްސަން އަދި އެންޒޯ ފެނާންޑޭޒަށް ރަނގަޅު ފުރުސަތުތަކެއް ލިބުނެވެ. އެންޒޯ ޖެހި ބޯޅަ ބްލޮކްވިއިރު، ޖެކްސަން ޖެހި ގޯލު ވަނީ އޮފްސައިޑް ކަމަށް ނިންމައިފަ އެވެ. އަދި އެންކުންކޫ ފޮނުވާލި ބޯޅަ ލަސްވުމުގެ ސަބަބުން ބޭނުމެއް ނުކުރެވުނެވެ.

ދެ ވަނަ ހާފުގައި ޗެލްސީން ކުރިއަށް ޖެހިގެން ލަނޑެއް ޖެހޭތޯ ގިނަ މަސައްކަތްތަކެއް ކުރި ނަމަވެސް ސިޓީގެ ކީޕަރު، އެޑަސަން މޮރާއެސް ކައިރިން ގޯލަށް ބޯޅަ ފޮނުވައިނުލެވުނެވެ.

ސިޓީ އަށް މެޗުގެ ތިން ޕޮއިންޓް ޔަގީންކޮށްދިން ލަނޑު ޖެހީ މަޓެއޯ ކޮވަސިޗް އެވެ. ކުރިން ޗެލްސީ އަށް ކުޅުނު ކޮވަސިޗް މި ލަނޑު ޖެހީ، މެޗުގެ 84 ވަނަ މިނިޓްގަ އެެވެ. އޭރިއާރޮނގުކައިރިން ކޮވަސިޗް ޖެހި ބޯޅަ ގޯލަަށް ވަނީ ޗެލްސީގެ ކީޕަރު ސަންޗޭޒް އަތުގައި ޖެހިފަ އެވެ.

މި މެޗުގެ ރެފްރީ، އެންތަނީ ޓޭލާގެ ގިނަ ނިންމުންތަކަކާ މެދު ޗެލްސީގެ ކުޅުންތެރިންނާއި ބެންޗުން ވަނީ ހިތްހަމަނުޖެހުން ފާޅުކޮށްފަ އެވެ. ޗެލްސީން ވަނީ ޕެނަލްޓީ ހޯދަން ގިނަ އެޕީލްތަކެއް ވެސް ކޮށްފަ އެވެ. އޭގެ ތެރޭގައި، އެންޒޯ ފެނާންޑޭޒަށް ކުރި ފައުލަކަށާއި ކޮވަސިޗްގެ އަތުގައި ޖެހުނު ބޯޅައަކަށް ކުރި އެޕީލް ހިމެނެ އެވެ.