އުރީދޫ މޯލްޑިވްސްގެ 5G ހިދުމަތް ރާއްޖެއަށް ފުޅާކޮށް، އއ. ރަސްދުއަށް ހިދުމަތް ދޭން ފަށައިފި އެވެ.

އުރީދޫއިން އަންނަނީ މުޅި ރާއްޖެއަށް 5G ގެ ހިދުމަތް ދިނުމަށް ބޮޑު މަޝްރޫއެއް ފަށައިގެން މަސައްކަތް ކުރަމުންނެވެ.

"އުރީދޫއިން ވަނީ ރާއްޖޭގެ އާބާދީގެ 60 ޕަސަންޓަށް 5G ގެ ހިދުމަތް މިހާރު ފޯރުކޮށްދީފައި. އަމާޒަކީ ކުރިއަށް އޮތް ދުވަސްތަކުގައި މުޅި ރާއްޖެއަށް ހިދުމަތް ފުޅާކުރުން،" އުރީދޫގެ އަހަރީ ދުވަހާ ގުޅިގެން ބޭއްވި ނޫސްވެރިންގެ ބައްދަލުވުމުގައި އެ ކުންފުނީގެ އެމްޑީ އަދި ސީއީއޯ ހާލިދު އަލް ހަމާދީ ވިދާޅުވި އެވެ.

ރަސްދޫގެ އިތުރުން އުރީދޫގެ 5G ހިދުމަތް އަލަށް ދޭން ފަށާފައި ވަނީ އއ. ތޮއްޑޫ، ކ. މާފުށި، ކ. ގުރައިދޫ، ޅ. ނައިފަރު، ޅ. ހިންނަވަރު، ބ. އޭދަފުށި، ރ. އުނގޫފާރު، ރ. ދުވާފަރު، ހދ. ކުޅުދުއްފުށި، ހއ. އިހަވަންދޫ އަދި ހއ. ދިއްދޫ ހިމެނެ އެވެ.

އުރީދޫއިން ވަނީ ހުޅުމާލެ ފިޔަވައި އިތުރު ރަށަކަށް އެޅި ފުރަތަމަ ބައިނަލްއަގުވާމީ ސަބްމެރިން ކޭބަލްގެ ހިދުމަތް ފަށައި، ރާއްޖެއާއި ޔޫރަޕް އަދި ސިންގަޕޫރު ގުޅުވާލައިފަ އެވެ.

އެ ކޭބަލްއާއެކު މުވާސަލާތީ ހިދުމަތް ދިނުމުގައި އިތުރު ފަސޭހަތަކެއް ލިބި، ހިދުމަތްތައް އިތުރަށް ފުޅާކުރަން ފަސޭހަ ވެގެންދާނެ ކަމަށް އުރީދޫ އިން ބުންޏެވެ.

އުރީދޫއިން އަންނަނީ ރާއްޖޭގައި ފުޅާ ދާއިރާއެއްގައި މުއާސަލާތީ ހިދުމަތް ފޯރުކޮށްދިނުމުގެ އިތުރުން، އާ ހިދުމަތްތަކެއް ރާއްޖެއަށް ފޯރުކޮށްދެމުންނެވެ. އެގޮތުން އެ ކުންފުނިން އަންނަނީ ހިދުމަތްތައް ފުޅާކުރަން ގިނަ އިންވެސްޓްމަންޓްތަކެއް ކުރަމުންނެވެ.