މިއަދު ބޯކޮށް ވާރޭ ނުވެހޭނެ ކަމަށާއި ނަމަވެސް ވަޔާއި ކަނޑު ވަރަށް ގަދަވާނެ ކަމަށް، މޫސުމާބެހޭ ގައުމީ އިދާރާ، މޯލްޑިވްސް މީޓިއޮރޮލޮޖިކަލް ސާވިސްއިން ލަފާކޮށްފި އެވެ.

އެ އިދާރާއިން ބުނީ މާލޭ ސަރަހައްދަށް އަދި މުޅި ރާއްޖެ އަށް ވެސް ވާރޭ ވެހޭނެ ކަމަށާއި ނަމަވެސް ބޯކޮށް، ގިނަ އިރުވަންދެން ވާރޭވެހުން ހިފެހެއްޓިފައި ނުހުންނާނެ ކަމަށެވެ. އެއީ ވައި ބާރުވުމާއެކު، ވިއްސާރަ ވިލާގަނޑު ކަހައިލާނެތީ އެވެ.

މާލޭ ސަރަހައްދުގައި ވައިގެ ބާރުމިން 25 މޭލުގައި ހިފެހެއްޓިފައި ހުންނާނެ ކަމަށާއި ވިލާގަނޑުގައި 45 މެލާއި 50 މޭލު ބާރުމިނުގައި ވައިޖެހޭނެ ކަމަށް މޯލްޑިވްސް މީޓިއޮރޮލޮޖިކަލް ސާވިސް (މެޓު އޮފީސް) އިން ބުންޏެވެ.

"މިއަދު ވާނެ ވައިގަދަ އެއް ދުވަހަށް. ހުރިހާ ހިސާބަކަށް ވެސް ވައިގަދަ. އުތުރާއި މެދުރާއްޖެތެރެއަށް ވަރަށް ބޮޑަށް ގަދަ. އަދި މުޅި ރާއްޖެ އަށް ވެސް ވައިގަދަ ދުވަހަކަށް ވާނެ،"މީޓިއޮރޮލޮޖިސްޓް ހުސައިން ވަހީދު ވިދާޅުވި އެވެ

"ވައި ވަރަށް ގަދަ ދުވަހެއް ވީމަ ބްރިޖު ހުރަސް ކުރާއިރު ސަމާލުކަން ދޭންވާނެ. މާލޭ ސަރަހައްދުގައި ވައި އެބަ ހިފަހައްޓާ 25 މޭލުގައި. އެހެންވީމަ ސައިކަލްތަކުގައި ބުރިޖު ހުރަސް ކުރުމަކީ އުނދަގޫ ކަމަކަށް ވާނެ."

މިދިޔަ އަންގާރަ ދުވަހު މާލޭ ސަރަހައްދުގެ ބޯކޮށް ވާރޭވެހި، ކަނޑު ގަދަވެފައި ވަނިކޮށް ކިރު ދޫންޏެއް އުދިހިފައި ދަނީ -- ފޮޓޯ: މިރާޝް ނާޝިމް/އަދަދު

އުދައެރުމުގެ ފުރުސަތު

މެޓު އޮފީހުން ބުނި ގޮތުގައި މިއަދަކީ ކަނޑުގެ ބާނިތައް ބޮޑު ދުވަހެކެވެ. ދެކުނުގެ އަތޮޅުތަކުގައި ރާޅުގެ އުސްމިން 5-7 ފޫޓުގައި ހުރިއިރު، މެދުރާއްޖެތެރެ އާއި އުތުރުގައި ހުރީ 7-9 ފޫޓުގަ އެވެ. މިއަދު ދިޔަވަރު އެންމެ ބޮޑުވާނެ ކަމަށް ބެލެވެނީ ހެނދުނު 10:00 އެވެ.

ބައެއް ރަށްތަކަށް އުދަ އެރުމުގެ ފުރުސަތު އޮތް ސަބަބަކީ، ކަނޑު ވަރަށް ބޮޑަށް ގަދަވެ، ރާޅުތައް އުސްވެފައި ހުރުމުން ކަމަށް ހުސައިން ވަހީދު ވިދާޅުވި އެވެ.