މިހާރު ރާއްޖެއަށް ކުރަމުންދާ ވިއްސާރާގައި މާލޭގެ 252 ގެއެއްގައި ފެން ބޮޑުވެފައިވާ ކަމަށާއި 20 ރަށަކުން އެކިވަރުގެ ގެއްލުންވެގެން ރިޕޯޓުކޮށްފައިވާ ކަމަށް ނޭޝަނަލް ޑިޒާސްޓާ މެނޭޖްމަންޓު އޮތޯރިޓީ (އެންޑީއެމްއޭ) އިން ބުނެފި އެވެ.

އެ އިދާރާއިން އެންމެ ފަހުން ހިއްސާކުރި އަދާހަމައިގައި ބުނީ، ގެއްލުން ވެގެން ރިޕޯޓުކުރި 20 ރަށުގެ ތެރެއިން ހަތަރު ރަށެއްގެ އާއިލާތަކެއް ވަގުތީ ހިޔާތަކަށް ބަދަލުކުރަން ޖެހުނު ކަމަށެވެ. މީގެ ތެރޭގައި ގިނައީ އުތުރުގެ ރަށްތަކެވެ. އެކަމަކު އައްޑޫ ސިޓީގެ ތިން ރަށެއް ވެސް އޭގެ ތެރޭގައި ހިމެނެ އެވެ.

ވަގުތީ ހިޔާތަކަށް ބަދަލުކޮށްފައިވަނީ ހއ. ބާރަށުން ދެ އާއިލާއަކާއި ހއ. ހޯރަފުށިން ހަ އާއިލާއެއްގެ އިތުރުން ހއ. ކެލާގެ ދެ އާއިލާއަކާއި ހއ. އިހަވަންދޫގެ ދެ އާއިލާއެކެވެ.

މާލެއިން ފެން ވަދެގެން ރިޕޯޓުކުރި 252 ގޭގެ ތެރެއިން ވަގުތީ ހިޔާތަކަށް މީހުން ބަދަލުކޮށްފައިވަނީ ތިން ގެއަކުންނެވެ. މޫސުން އިތުރަށް ގޯސްވާނެ ކަމަށް ލަފާކޮށް މެޓް އޮފީހުން ވަނީ މިރޭގެ މެންދަމާ ހަމައަށް ރާއްޖޭގެ ހުރިހާ ސަރަހައްދަކަށް ރީނދޫ ސަމާލު ނެރެފަ އެވެ.

މި ވިއްސާރައާ ގުޅިގެން މާދަމާ އަކީ ސަރުކާރު ބަންދު ދުވަހެއްގެ ގޮތުގައި ހަމަޖައްސަން ރައީސް ޑރ. މުހައްމަދު މުއިއްޒު ވަނީ ނިންމަވާފަ އެވެ.

ރައީސް އޮފީހުގެ އިސް ތަރުޖަމާނު ހީނާ ވަލީދު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ސަރުކާރު އޮފީސްތައް ބަންދު ކުރަން ރައީސް ނިންމެވީ ރާއްޖޭގެ ވަރަށް ގިނަ ރަށްތަކަށް ބޯކޮށް ވާރޭވެހި މޫސުން ގޯސްވުމުގެ ސަބަބުން، ކިޔަވާ ކުދިންނާއި ވަޒީފާ އަދާކުރާ މީހުންނަށް ވެސް ދަތުރުފަތުރުކުރުމާއި ހިނގާބިނގާވާން ދަތިވާނެތީ ކަމަށެވެ.

މެޓުން ބުނާ ގޮތުގައި މިހާރު ރާއްޖެއަށް ކުރަމުން މިދަނީ ހުޅަނގު މޫސުމުގެ ބާރު ގަދަވެ ކުރަމުންދާ ވިއްސާރައެކެވެ. ބުރާސްފަތި ދުވަހާ ހަމައަށް ގުގުރުމާއެކު ބޯކޮށް ވާރޭވެހުމުގެ އިތުރުން 40 މޭލަށް ވައިގަދަވެ ކަނޑުތައް ގަދަވާނެ ކަމަށް ވެސް މެޓުން ވަނީ ލަފާކޮށްފަ އެވެ.