ރާއްޖޭގެ ރަށްރަށުގައި ފެނަކައިން ހިންގަމުންދާ ހުރިހާ މަޝްރޫއުއެއްގެ ކޮންޓްރެކްޓު ބާތިލުކޮށް އެމްޑަބްލިއުއެސްސީ އާ ހަވާލު ކުރުމުގެ މަސައްކަތް ކުރަމުންދާ ކަމަށް އިންފްރާސްޓްރަކްޗާ މިނިސްޓަރު، ޑރ. އަބްދުﷲ މުއްތަލިބު ވިދާޅުވެއްޖެ އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މުއްތަލިބާ ސުވާލު ކުރިއިރު އޭގެ ސުވާލަކަށް ޖަވާބު ދެއްވަމުން އޭނާ ވިދާޅުވީ ފެނަކައާ ހަވާލު ކޮށްގެން ރާއްޖޭގެ 20 ރަށެއްގައި ހިންގަމުންދިޔަ މަޝްރޫއުއެއް އެމްޑަބްލިއުއެސްސީއާ ހަވާލު ކުރަން ނިންމާފައިވާ ކަމަށެވެ.

މި މަސް ނިމުމުގެ ކުރިން އެމްޑަބްލިއުއެސްސީއާ ޕްރޮޖެކްޓުތައް ހަވާލު ކުރެވޭތޯ މަސައްކަތް ކުރަމުންދާ ކަމަށާއި ވީހައިވެސް އަވަހަކަށް އެމްޑަބްލިއުއެސްސީއާ މަސައްކަތްތައް ހަވާލު ކުރުމުގެ މަސައްކަތް ކުރެވޭނެ މަގެއް ފެނޭތޯ ޓެންޑާ ބޯޑާއެކު މަޝްވަރާ ކުރަމުންދާކަން އޭނާ ހާމަކުރެއްވި އެވެ.

"ފެނަކައަކީ މިކަހަލަ ކޮންޓްރެކްޓު މަސައްކަތް ހިންގާނެ ކޮންޓްރެކްޓަރަކަށް ނުވާތީ އާއި ހިދުމަތް ފޯރުކޮށްދޭ ސާވިސް ޕްރޮވައިޑާއަކަށް ވާތީ ސަރުކާރުން ނިންމީ އެ ޕްރޮޖެކްޓު މަސައްކަތް، އެގޮތަށް ހަވާލުކޮށްފައި، ފެނަކައާ ހަވާލުކޮށްފައި ހުރި ހުރިހާ މަޝްރޫއުތަކެއް، ކޮންޓްރެކްޓު ބާތިލުކުރުމަށް ފަހުގައި އެމްޑަބްލިއުއެސްސީއާ ވާހަކަދައްކައިގެން ޑައިރެކްޓު ނެގޯޝިއޭޝަނެއްގެ ތެރެއިން އެމްޑައިބްލިއުއެސްސީއާ ހަވާލު ކޮށްގެން ކުރިއަށް ގެންދިޔުން،" މުއްތަލިބު ވިދާޅުވި އެވެ.

މިނިސްޓަރު ވިދާޅުވީ އެއްވެސް ރަށެއްގައި ހިންގަމުންދާ މަޝްރޫއުއެއް ހުއްޓާލައިގެން ސަރުކާރުން ނުތިބޭނެ ކަމަށާއި ވީހައިވެސް އަވަހަކަށް މަޝްރޫއުތައް ފެށޭނެ ގޮތެއް ހޯދުމަށް މަސައްކަތް ކުރަމުންދާ ކަމަށެވެ.

އެގޮތުން 20 ރަށުގެ މަޝްރޫއުތައް ހިންގުމަށް އެއް ބިލިއަން ރުފިޔާ ހަރަދުވާނެ ކަމަށް އެމްޑަބްލިއުއެސްސީން ހުށަހަޅާފައިވާ އަންދާސީ ހިސާބަށް ބަލާއިރު ލަފާ ކުރެވޭ ކަމަށް ވެސް މުއްތަލިބު ވިދާޅުވި އެވެ. އެ 20 ރަށުގެ މަސައްކަތް ކުރިއަށް ގެންދާނީ އެއް ޕްރޮޖެކްޓެއްގެ ގޮތުގައި ކަމަށް ވެސް މުއްތަލިބު ވިދާޅުވި އެވެ.

މުއްތަލިބު މަޖިލީހަށް މިއަދު ހާޒިރުވީ ކެންދޫ ދާއިރާގެ އެމްޑީޕީ މެންބަރު، މައުރޫފް ޒާކިރު ކުރައްވާފައިވާ ސުވާލަކަށް ޖަވާބު ދެއްވުމަށެވެ. މައުރޫފް ޒާކިރު ސުވާލު ކުރެއްވީ ބ. ދޮންފަނުގައި ފަށާފައިވާ ނަރުދަމާގެ މަސައްކަތުގެ އާރްއޯ ޕްލާންޓާއި އެޑްމިން ބިލްޑިން އަދި ޕަމްޕް ސްޓޭޝަންތަކުގެ މަސައްކަތް ހުއްޓިފައި ހުރީ ކީއްވެތޯ އާއި އެ މަސައްކަތް ފެށި ރައްޔިތުންނަށް ހިދުމަތް ދެވޭނީ ކޮންއިރަކުންތޯ އެވެ.

ޖަވާބުގައި މުއްތަލިބު ވިދާޅުވީ އެ ރަށުގެ މަޝްރޫއުތައް ވެސް އެމްޑަބްލިއުއެސްސީއާ ހަވާލު ކުރުމުގެ މަސައްކަތް މިހާރު ކުރަމުންދާ ކަމަށެވެ.