ލަންޑަން (އޮގަސްޓް 11) - މެންޗެސްޓާ ސިޓީ އަށް ކުޅެމުން އަންނަ ބްރެޒިލްގެ ކީޕަރު، އެޑަސަން މޮރާއެސް، އެ ކްލަބްގައި މަޑުކުރަން ނިންމައިފި އެވެ.

ބްރެޒިލް ގައުމީ ޓީމަށް ވެސް ކުޅޭ އެޑަސަން، 30، ސައުދީ ޕްރޯ ލީގުގެ ކްލަބްތަކާ މަޝްވަރާ ކުރަމުން އަންނަ ކަމަށް އިނގިރޭސި މީޑިއާތަކުން ވަަނީ ރިޕޯޓްކުރިއިރު، ބައެއް ކްލަބްތަކާ އެޑަަސަން ވަނީ އަމިއްލަ އަށް ވެސް ވާހަކަ ދައްކައިފަ އެވެ.

އެކަމަކު، އިނގިރޭސި ފުޓްބޯޅަ ސީޒަން ފެށުމުގެ ގޮތުން، ކުޅޭ ކޮމިއުނިޓީ ޝީލްޑް މެޗުގައި ރޭ ޕެނަލްޓީ ޖަހައިގެން 7-6 އިން މެންޗެސްޓާ ޔުނައިޓެޑް ބަލިކުރި މެޗަށް ފަހު، އެޑަސަން ދިން އިންޓަވިއުއެއްގައި ވަނީ ސިޓީގައި މަޑުކުރަން ނިންމާފައިވާ ކަމަށް ބުނެފަ އެވެ.

"ޕެޕް (ގާޑިއޯލާ)އާ އެކު، އަހަރެން ދެއްކި ވާހަކަތަކާ އެކު، މިހާރު ނިންމާފައިވާނީ މި ސީޒަނުގައި ވެސް ސިޓީގައި މަޑުކުރަން. އެއީ، އަހަންނަށް އަދިވެސް މި ޓީމުގައި ހުރެ ހާސިލްކުރެވޭނެ ކަންކަން އެބަހުރި،" އެޑަސަން ބުންޏެވެ.

އެޑަސަން ބުނީ، ކްލަބްގެ ވެރިންނާއި ކުޅުންތެރިންނަށް ވެސް އޭނާގެ ނިންމުން ހިއްސާކޮށްފައިވާނެ ކަމަށާއި މިއީ މި ވަގުތަށް ބަލާއިރު، ކެރިއަރަށް އެންމެ ފައިދާކުރާނެ ނިންމުން ކަމަށެވެ.

ސްޕެއިނުގެ މީޑިއާ ރިޕޯޓްތައް ބުނާގޮތުން، އެޑަސަން ހުރީ އަލް ނަސްރަށް ބަދަލުވުމުގެ ވިސްނުމުގައި ނަމަވެސް، އޭނާގެ ނިންމުން ބަދަލުކުރުމުގައި އިސް ރޯލެއް ކުޅުނީ ގާޑިއޯލާ އެވެ.

ބެންފީކާ ދޫކޮށް، 2017 ވަަނަ އަހަރު އެޑަސަން، ސިޓީ އަށް ބަދަލުވީ، 43 މިލިއަން ޑޮލަރުގެ ޑީލެއްގަ އެވެ. ސިޓީގައި ހޭދަކުރި ހަތް ސީޒަނުގެ ތެރެއިން ހަ ފަހަރު އިނގިރޭސި ޕްރިމިއާ ލީގު ކާމިޔާބުކުރިއިރު، ޗެމްޕިއަންސް ލީގާއި ފީފާ ކްލަބް ވޯލްޑް ކަޕް ވެސް ކާމިޔާބުުކުރި އެވެ.

ކޮމިއުނިޓީ ޝީލްޑް މެޗުގައި، ސިޓީގެ ޕެނަލްޓީއެއް ކާމިޔާބުކުރި އެޑަސަން ވަނީ، ޔުނައިޓެޑްގެ ޖޭޑަން ސަންޗޯ ޖެހި ޕެނަލްޓީ މަތަކޮށްފަ އެވެ.