އުރީދޫ މޯލްޑިވްސްގެ ފުރަތަމަ ބައިނަލްއަގުވާމީ އީސްޕޯޓްސް މުބާރާތް ކަމަށްވާ އުރީދޫ ނޭޝަން ގްލޯބަލް ފޭސްއޮފް ކާމިޔާބުކަމާއެކު ނިންމާލައިފި އެވެ.

ރާއްޖެ އާއި ގަތަރުގެ ހުނަރުވެރި ގޭމަރުންގެ މެދުގައި ރޮކެޓް ލީގުގެ ވަރުގަދަ ވާދަވެރިކަން ދައްކުވައިދިން މި މުބާރާތް ކާމިޔާބު ކުރީ ގަތަރުގެ ޓީމުންނެވެ.

"ރޮކެޓް ލީގުގެ ފޯމެޓްގައި ދެ ގައުމުގެ ގޭމަރުން ވަނީ ވަރުގަދަ ކުޅުމެއް ދައްކާފައި. މުޅި އިވެންޓް އުރީދޫ ނޭޝަން ޔޫޓިއުބް ޗެނަލްއިން ލައިވްސްޓްރީމްކޮށް، ރާއްޖެއާއި ގަތަރުގެ ގޭމިން ކޮމިއުނިޓީގެ ތެރޭގައި ހުރި ހުނަރާއި ދައްކުވައިދިން،" އުރީދޫއިން ބުންޏެވެ.

އުރީދޫ މޯލްޑިވްސްގެ ސީއީއޯ ހާލިދު އަލް ހަމާދީ ވިދާޅުވީ މި މުބާރާތަކީ މުސްތަގުބަލުގައި ބައިނަލްއަގްވާމީ އީސްޕޯޓްސް މުބާރާތްތައް ބޭއްވުމަށް މަގު ފަހިކޮށްދިން މުބާރާތެއް ކަމަށާއި ޑިޖިޓަލް ކުޅިވަރުތަކުގައި ދުނިޔެއާ ކުރިމަތިލާން ރާއްޖެ އޮތީ ތައްޔާރަށްކަން ދައްކުވައިދީފައިވާ ކަމަށެވެ.

އުރީދޫ ނޭޝަން ގްލޯބަލް ފޭސްއޮފްގައި ރާއްޖެއާއި ގަތަރުގެ ކުރިމަތިލުން ކާމިޔާބުކަމާއެކު ނިންމާލުން -- ފޮޓޯ: މިރާޝް ނާޝިމް / އަދަދު

ގޭމް ކުޅޭ ކުޅުންތެރިންނަށް މިފަދަ ޕްލެޓްފޯމެއް ފަހިކޮށްދީ، ރާއްޖެއާއި ގަތަރާ ދެމެދު އިތުރަށް ގުޅުން ބަދަހިކުރެވިގެން ދިއުމަކީ އުރީދޫއަށް ލިބޭ ވަރަށް ބޮޑު އުފަލެއް ކަމަށް އޭނާ ވިދާޅުވި އެވެ.

މި މުބާރާތަކީ އުރީދޫ ނޭޝަން މޯލްޑިވްސް އިން ބައިނަލްއަގްވާމީ އީސްޕޯޓްސް ދާއިރާއަށް ތައާރަފްކުރި ފުރަތަމަ މުބާރާތެވެ. އަދި މުބާރާތް ކުރިއަށް ގެންދިޔައީ 1،919 ޑޮލަރުގެ އިނާމު ޕޫލަކާއެކު އެވެ.

މި ސަރަހައްދުގެ ގޭމިން ކޮމިއުނިޓީއަށް މިފަދަ ފުރުސަތުތައް ހޯދައިދިނުމުގައި އަބަދުވެސް އުރީދޫއިން ދަނީ މަސައްކަތް ކުރަމުން ކަމަށް އެ ކުންފުނިން ބުނެ އެވެ. އަދި އީސްޕޯޓްސް ކޮމިއުނިޓީއާއެކު އުރީދޫ ނޭޝަންއިން މި އަހަރު ވެސް އަދި ގިނަ މުބާރާތްތައް ރޭވިފައިވާކަން އުރީދޫއިން ފާހަގަ ކުރެއެވެ.