ނިމިދިޔަ އެމްޑީޕީ ސަރުކާރުން ހިންގި ގެދޮރުވެރިޔާ ސްކީމުގެ ދަށުން މާލެ ސަރަހައްދުން ފުލެޓު ދޭނެކަމަށް ބުނެ ލިޔުންދިން ފަރާތްތަކަށް ފުލެޓު ހަވާލުނުކުރަން ޖެހޭ ސަބަބެއް ނެތްކަމަށް ރައްޔިތުންގެ މަޖިލީހުގެ ވެލިދޫ ދާއިރާގެ މެންބަރު މުހައްމަދު އައްބާސް ވިދާޅުވެއްޖެ އެވެ.

އަމިއްލަ އެކްސް އެކައުންޓުން ކުރެއްވި ޕޯސްޓެއްގައި އައްބާސް ފާހަގަކުރެއްވީ ކުރީ ސަރުކާރުން ހިންގި ބިންވެރިޔާ ސްކީމުގެ ދަށުން ގޯތި ދޭނެ ކަމަށް ބުނެ ލިޔުން ދިން ފަރާތްތަކަށް ބިން ހަވާލުކުރަމުންދާ ކަމެވެ. އެކަން އެހެން ހިނގާނަމަ ފުލެޓުތައްވެސް ދޭން ޖެހޭނެ ކަމަށް އޭނާ ވިދާޅުވި އެވެ.

"މާލެ ސިޓީ އިން ބިން ދޭނެ ކަމަށް އޭރުގެ ސަރުކާރުން ލިޔުން ދިން މީހުންނަށް ބިން ދޫކުރާ ފަދައިން ފުލެޓު ލިބޭނެ ކަމަށް ލިޔުން ލިބުނު ފަރާތްތަކަށް ފުލެޓު ނުދޭނެ ސަބަބެއް ނެތް،" ހައުސިން މިނިސްޓްރީ ޓެގުކޮށް އައްބާސް ލިޔުއްވާފައިވެ އެވެ.

އައްބާސް އަކީ މި ސަރުކާރާއެކު މަސައްކަތްކުރަމުންދާ އެމްޑީއޭގެ ނައިބު ރައީސް އަަދި ތަރުޖަމާނެވެ. މީގެ ކުރިންވެސް ފުލެޓުތަކުގެ މައްސަލާގައި އައްބާސް ވަނީ ހައުސިން މިނިސްޓްރީއަށް ފާޑުވިދާޅުވެފަ އެވެ.

މިދިޔަ ސަރުކާރުގެ ގެދޮރުވެރިޔާ ސްކީމަށް ފޯމު ހުށަހެޅި މީހުންގެ ތެރެއިން 15،046 މީހުން ޝަރުތު ހަމަވާ ކަމަށް އޭރުގެ ސަރުކާރުން ކަނޑައެޅި އެވެ. އެމްޑީޕީ ސަރުކާރުން ނިންމީ އެ ހުރިހާ އެންމެންނަށް ވެސް ފުލެޓު ދިނުމަށެވެ. ނަމަވެސް އެ ވެރިކަން ނިމުނުއިރު، ކޮންޓްރެކްޓު ކޮށް، މަސައްކަތް ފަށާފައި ވަނީ 4000 ފުލެއްޓެއްގެ އެވެ.

ފުރަތަމަ 4،000 ފްލެޓް ލިބޭނީ ޕޮއިންޓް ތަރުތީބުން އެންމެ ގިނަ ޕޮއިންޓު ލިބޭ މީހުނަށް ކަމަށް ކަނޑައަޅާފައިވަނިކޮށް އޭސީސީއަށް ހުށަހެޅު މައްސަލައަކާ ގުޅިގެން އެ މަސައްކަތް މަޑުޖައްސާލަން އެންގި އެވެ. އެ ސްކީމަށް ތައްޔާރުކުރި ޕޯޓަލްގެ އެކްސެސް ލިބުމުން، މައްސަލަ ތަހުގީގު ކުރުން ގެންދިޔުމަށް ފަހު، މަސައްކަތް އަލުން ފަށަން ކޮމިޝަނުން ހުއްދަ ދިނީ ފެބްރުއަރީ އެކެއްގަ އެވެ.

މި މައްސަލަ ބޮޑުވެ މަޖިލީހުގެ ތަޅުމަށާއި ކޮމިޓީތަކަށް ހައުސިން މިނިސްޓަރު ޑރ. އަލީ ހައިދަރު ހާޒިރުކުރުމަށް ތަކުރާރުކޮށް މަސައްކަތް ކުރި ނަމަވެސް ވަޒީރު ވަނީ އެކި ފަހަރުމަތިން އެކަމަށް ދެކޮޅު ހައްދަވާ އެކި އުޒުރުދައްކަވާފަ އެވެ.

ފުލެޓުތައް ދިނުން ލަސްވުމާ ގުޅިގެން އިދިކޮޅު އެމްޑީޕީން ސަރުކާރަށް ތަކުރާރުކޮށް ފާޑުކިޔަމުންދާއިރު ފުލެޓު ލިސްޓުގައި ނަން އޮތް މީހުން ވަނީ އެކި ފަހަރުމަތިން މުޒާހަރާވެސް ކޮށްފަ އެވެ.

ފުލެޓުތައް ދިނުމުގެ މަސައްކަތުގެ އަދާހަމައެއް މިނިސްޓަރު ދެއްވީ މަޖިލީހުގެ ކޮމިޓީއަށް ޖުލައި 29، ގައި ހާޒިރުކުރުމުންނެވެ. އެދުވަހު މިނިސްޓަރު ވިދާޅުވީ ފުލެޓު ލިބޭ މީހުންގެ ފައިނަލް ލިސްޓު މި އަހަރުގެ އޮކްޓޫބަރު މަސް ނިމުމުގެ ކުރިން އާންމު ކުރާނެ ކަމަށެވެ.

"އިމާރާތްކޮށް ނިމެންވާއިރަށް އަޅުގަނޑުމެން ހުރިހާ، ހޮވޭ ފަރާތްތައް އިއުލާނުކޮށް ފައިނަލް ލިސްޓު ގެޒެޓު ކުރާނަމޭ އިނގޭތޯ، އަޅުގަނޑަށް އެނގިފައިވާ ގޮތުގައި 32 ޓަވަރުގެ ތެރެއިން ފުރަތަމަ ހަ ޓަވަރު ނިމޭނީ އޮކްޓޫބަރު މަސް ނިމޭހައި ތަނަށް އަޅުގަނޑުމެން ފައިނަލް ލިސްޓު އާންމު ކުރާނަން،" ހައިދަރު އެދުވަހު ވިދާޅުވި އެވެ.