ފުލުހުންނަށް ހާއްސަކޮށްގެން ހުޅުމާލޭގައި އެޅި ފްލެޓްތަކުގެ ތެރެއިން ފްލެޓަކަށް ކަރަންޓު ނުދީގެން ފުލުހުންގެ ކޯޕަރޭޓިވް (ޕޮލްކޯ) އާ ދެކޮޅަށް ކޯޓު އަމުރެއް ހޯދަން ސިވިލް ކޯޓަށް މައްސަލަ ހުށަހަޅަން ޖެހިއްޖެ އެވެ.

ސިވިލް ކޯޓުން އިއްޔެ ނިންމި ނިންމުމެއްގައިވާ ގޮތުން އެ ފުލެޓަށް ކަރަންޓު ދިނީ ކަރަންޓް ދިނުމަށް އަންގައި ސިވިލްކޯޓުން އަމުރެއް ނެރެދޭން އެދި އެ ފުލުސް މީހާ ހުށަހެޅުމުންނެވެ. އެ އަމުރު ނެރުމުގެ ކުރިން ޕޮލްކޯއިން ވަނީ އެ ފްލެޓަށް ކަރަންޓް ދީފަ އެވެ.

ފްލެޓަށް ކަރަންޓު ދިނުމުން، އެ މީހާ ވަނީ ވަގުތީ އަމަރެއް ނެރެދިނުމުގެ ކުރިން އެނާ ހުށަހެޅި މައްސަލަ ބާތިލުކުރަން ހުށަހަޅާފަ އެވެ. އެހެންވެ، އަމުރު ނެރުމުގެ ހާލަތު ނެތުމުން ކޯޓުން އިއްޔެ ވަނީ އެ ފޯމް ބާތިލުކޮށް، މައްސަލަ ނިންމައިފަ އެވެ.

ސިފައިންނާއި ފުލުހުންނަށް ހާއްސަކޮށް، ކުރީގެ ރައީސް ޑރ. މުހައްމަދު ވަހީދުގެ ވެރިކަމުގައި އަޅަން ފެށި ފްލެޓްތަކުގެ މަސައްކަތް ދިގުލައިގެން ގޮސް، 10 ވަރަކަށް އަހަރު ހޭދަވުމަށް ފަހު، އެ މަސައްކަތް ނިމި، ފްލެޓްތައް ދޫކުރީ މިދިޔަ އަހަރުގެ ފަހުކޮޅާއި މި އަހަރުގެ ތެރޭގަ އެވެ.